John 17 - Pupu Oharo Āre 1963 Genese 1970 Rute 1972

Iesu ve Ivaiva

¹ Iesu ma oharo maeai ovohae kaia ve iupei maria maeape Oa! Hoa havahu ma! Ave Akore morapaeaki — ave akore kara aro morapaeakilai.

² A va arero aivau oaria akea ve aheke la avarape, ehovea a arero aiarape la haela oaria are ovokake haiapo avarakilai.

³ Ovokake haiapo maria Aualari iele haroapo la i Iesu Keriso, a kiparaeape la haela ila, ere ore leivahaeakilai.

⁴ Ara aro meahaiapo ve morapaeape, a araro avikiarape la horova kari le leipe.

⁵ Oa e, a mahau a i hareho araro morapaeakive, elavaila avare koai meahaiapo aue hoa aeape la haharika v'ila.

⁶ A araro meahaiapo ve aikiarape la haela ara ave rare kileape. Ere va ave haela, a erero araro aikiarape: ere arave oharo iapai kiva auhohi leivahaeape.

⁷ Mahau ere va ore a araro aikiarape la eharu oaria v'ila kihoahukape.

⁸ Ehovea a araro aikiarape la oharo oaria ara erero aiarape. Ere erero avape: ere kai ore leipe ara a v'ila kihoaupe: ere kara ikikelavape a araro kiparaeape.

⁹ Ara ere v'ila ivaiva leive. Ara meahaiapo v'ila ivaiva lei va ka, a araro aikiarape la haela v'ila hiki ara ivaiva leive. Ehovea ere ave haela.

¹⁰ Arave eharu va ave eharu hoveahovea: ave eharu kara arave eharu: ara ere v'ila lei morapaeavila.

¹¹ Ara ma hoa meahaiapo aea va ka — ere meahaiapo apealula: ara ave leia pekakilai. Oa, Hehe Iele, a araro aikiarape la haela ave rare v'ila kiva hela leivahaeaki — ere va haroapo hovea leikilai, elavaila haroapo laria.

¹² Ara ere i hareho aeape la hoa a araro aikiarape la haela ara ave rare v'ila kiva leivahaeape — ara erero kiva auhohi leivahaeape, laelave ere va haela oaria heaha au leila, haroapo hiki, la havoavaki akore la, ehovea buka hape la ohare iele leikilai.

¹³ Ara mahau ave leia pekakilai. Ara va ma eharu meahaiapo kileavahaeavila, ere oaria arave la ikiveveke hareho avakilai.

¹⁴ Ara ave oharo erero aiarape — meahaiapo erero ikiheaha leivahaeape ehovea ere meahaiapo v'ila ka, hoveahovea ara kara meahaiapo v'ila ka.

¹⁵ Ara aro velavela lei va ka, ehovea erero meahaiapo ve hareavakive, aka ehovea a va erero haelaharihu ve oki ve hareavakive.

¹⁶ Ere meahaiapo v'ila ka, hoveahovea, ara kara meahaiapo v'ila ka.

¹⁷ Ave o iele v'ila erero hehe leikive — ave oharo iele la.

¹⁸ A va araro meahaiapo ve kiparaeape — ara erero meahaiapo ve laria paparaehakilai.

¹⁹ Ara ere v'ila araro hehe leikilai, ere kara o iele v'ila lei hehe leivahaeakilai.

²⁰ Ara ere v'ila hiki ivaiva lei va ka. Ara ereve oharo v'ila iapavahaeaki la haela oaria.

²¹ Ehovea ere oaria haroapo hovea leivahaeakilai. Hoveahovea, Oa e, a va arave ureve aeavila, ara kara ave ureve aeavila, ere kara elavaila ve ureve apeakilai: laelave meahaiapo iki kekelakilai, a araro kiparaeape.

²² A araro avikiarape la haharika ara erero avarape, ehovea ere haroapo leikilai, hovea hovea elavaila va haroapo.

²³ Ara va ereve ureve, ere va arave ureve, erero oaria haroapo ureve mekakure leikilai; meahaiapo laria ore leikilai a araro kiparaeape, aeva hoveahovea a araro ikivere leivila, a kara erero ikivere leivahaeape.

²⁴ Oa e, a araro aikiarape la eharu oaria ara va ikivere ara aeavila la ita ere kara apeakilai: laria a araro avikiarape la haharika ere eavakilai: ehovea a va araro meahaiapo avare koai leipe la hoa a va araro ikiheroe oropa leipe.

²⁵ Mai ehoe Oa e, meahaiapo aro ore au leila, aka ara aro ore leipe; ma haela ore leipe a va araro kiparaeape.

²⁶ Ara ave rare erero hihika kileape, kai aeka kileakilai — ehovea a araro leipe la ikiheroe ereve ureve aeakilai, ara kara ereve ureve aeakilai.