John 16 - Pupu Oharo Āre 1963 Genese 1970 Rute 1972

Hakurepaki oharo

¹ Ara ma oharo ero lamaeaeaila e hihilauvahaeaki ave.

² Ere ero synagogue mahokaea ve huikapai paparaehakilai — kaire — aireaki hare ero haeaki la haela ere va maria kelavakilai, Ere Aualari ve horova laria leilula.

³ Ere ma eharu leivahaeakilai ehovea ere Oa i araro ila ore au leivahaeaila.

⁴ Aka ma oharo ara ero lamaeaeaila, ehovea la hare la kihorerakilava ara ero maeaeape oharo e iki kelavakilai. Ara ma eharu ero avare koare hoa maeaeape, ehovea ara e i hareho apeape.

⁵ Aka ma hoa ara araro kiparaeape la haela ve leia pekakilai. E va haela oaria araro velavela maria au leila, A lahoa aukilai?

⁶ Aka ehovea ara ero ma oharo lamaeaila, e oaria ikihuru eapapo laleivahaeaila.

⁷ Laeviva, ara ero oharo iele la maeaeaive: veveke ara ero haitapakilai — ara ero haitapaki aue la leikilava, Hakakaeaki haela eve leia kihoau va ka: aka ara laukilava, ara arero kiparaeakilai.

⁸ Are kihoauki la hoa meahaiapo mai heaha v'ila heheava hahakilai, kai mai ehoe i heheavaki mai v'ila.

⁹ Mai heaha v'ila, ehovea ere araro kelava va ka.

¹⁰ Mai ehoe v'ila, ehovea ara Oa ve leia pekakilai, e kara araro aire eava va ka.

¹¹ Heheavaki mai v'ila, ehovea ma heahaiapo ve amua are overa heheavape.

¹² Ara va ero maeaeaki oharo oaria le apearo, aka ma hoa e va la oharo iapakive hovea ka.

¹³ Laeviva, are O iele ve Ove kihoauki la hoa are ero O iele ve okiharo kari aukilai, ehovea are are v'ila oharo maea va ka: are iapaki la oharo are ero maeaeakilai — are ero aireaki kihoreavaki eharu kileakilai.

¹⁴ Are araro morapaeakilai — ehovea are arave iele la avaki ero le amoeakilai.

¹⁵ Oa ve eharu oaria arave eharu — laelave ara lamaeaila are arave iele la avaki ero amoeakilai.

¹⁶ Haiapo ka, e araro eava va ka, kai aeka haiapo ka, e va araro eavakilai.

¹⁷ Areve kilea haela uku maeape, Are elaro lakimaeaila oharo ve iele le, Haiapo ka, e araro eava va ka — kai aeka haiapo ka e araro eavakilai, aeka ma ehovea ara Oa ve leia aukilai?

¹⁸ Laelave ere maeaeape, Areve ma oharo iele le — haiapo ka? Ela areve oharo va horahora leiro.

¹⁹ Iesu eavape ere ikivere arero apevalavela leikive: are erero maeaeape, E va elarelare velavela leilula ma oharo v'ila ha, ehovea ara lamaeaila — haiapo ka, e va araro eava va ka, kai aeka haiapo ka e araro eavakilai?

²⁰ O iele, ara ero maeaeaive — E va hivavara arilai, aka meahaiapo ikiveveke leikilai, e va ikihuru leivahaeakilai, aka eve ikihuru koelari ikiveveke le leikilai.

²¹ Avaha kakare la uamari ikihairhairi leive, ehovea areve akore epaki hoa la; akore epaki la hoa are kakare kekela va ka, ehovea are va ikiveveke akore hekai meahaiapo ve overa epai.

²² E va ma hoa ikihuru ila, aka ara ero aireaki eavakilai — E la hoa ikiveveke leivahaeaiklai — haela eve la ikiveveke hoa haerapa va ka.

²³ La hare e va araro eharu ae velavela leiva ka — O iele ara ero maeaeaive — e va lela eharu aea velavela la leikilava, are arave rare v'ila avarakilai.

²⁴ Oropaki, e va arave rare v'ila eharu velavela au leila. Apevelavela leivahaeaki, e le avakilai, ehovea e ikiveveke eapapo leivahaeakilai.

²⁵ Ara ero ma oharo hihika havahu au maeaila — aireaki hare ara ero muruhari hovea maeaea va ka, aka ero Oa v'ila hihika maeaeakilai.

²⁶ La hare e va arave rare v'ila velavela leivahaeakilai. Ara ero maria maeaea va ka — ara e v'ila Oa velavela leikilai.

²⁷ Ehovea Oa havahu ero ikiheheroe leivahaevila, ehovea e araro ikiheroe leivahaeape, kai ikikelavape ara Oa ve kihoaupe.

²⁸ Ara Oa ve leia meahaiapo ve le kihoaupe. Ara aeka meahaiapo harepai Oa ve leia pekakilai.

²⁹ Areve kilea haela maeaeape, Iapai — ma hoa a va oharo hihika maeaivila, ave la oharo ve iele au avarapaila.

³⁰ Mahau ela v'ore a va eharu oaria ipovearai, a va ikivere ka haela aro velavela leikive. Laelave elave ikikekela a va Aualari ve kihoaupe.

³¹ Iesu erero kavale maeaeape E va ikikelavaro ha?

³² Iapai — hoa maea iele, mave kihorerave — la hare ero oaria kopurapakilai. Haela oaria elarelare, kai araro hakorepaki iele, ara lahua aeakilai, laeviva ara lahua aea va ka, ehovea Oa ara i hareho aeavila.

³³ Ara ero ma oharo lamaeaila ehovea e ara v'ila havila avakilai. Meahaiapo ve e va heraho eapapo leivahaeakilai — aka ikiveveke leivahaeaila, ara meahaiapo heaorapape.