John 14 - Pupu Oharo Āre 1963 Genese 1970 Rute 1972

Oa ve leia pekaki okiharo

¹ E va horahora va arekaea. E va Aualari kelavalula, araro kara iki kelavaila.

² Arave Oa ve eravo lalava oaria apearo. Laria la leikiaue va lailava, ara ero overa la maeaki, ehovea ara va eve ita kariki aukilai.

³ Ara eve ita kariki la aukilava, ara aeka ekekilai — ero ara i hareho korukaiakive. Ehovea ara aeavila la ita e kara apeakilai.

⁴ Ara v'auki la ita e va oki ore.

⁵ Thomas arero maeape, Amua — ela ore va ka — a va lahoa aukilai: Ela oki learia ore leivahaeakilai?

⁶ Iesu arero maeape, Ara va okiharo i oharo iele, i ovokake ila. Haela ae Oa ve leia oki ae v'ila peka va ka — ara v'ila hiki.

⁷ E va araro ore la lailava, e va arave Oa kara ore leipe. Aireaki e va arero ore leikilai, ehovea e va arero overa eavape.

⁸ Philip arero maeape, Amua, Oa elaro amoeaki — ela iki le kekelakilai.

⁹ Iesu maeape, Ara e i hareho haiapo iele aeavila, Philip, a va araro ore au leila ha? Araro eavape la haela Oa kara eavape. A va leari maeakilai, Elaro Oa amoeakive.

¹⁰ E iapa va ka ha — ara Oa ve ureve aeavila, Oa kara arave ureve aeavila. Ara ero maeaeaki oharo ara ara v'ila maeaea va ka — aka arave ureve aeavila la Oa areve horova leivahaevila.

¹¹ Arave oharo iapai, ara Oa ve ureve aeavila, Oa kai arave ureve aeavila. Aka ehovea horova ve iele araro ikikekelakive.

¹² O iele, ara ero maeaeaive — araro ikikekela la haela ara leivahaevila la horova are kara leivahaeakilai. Are kai horova ehoaha ae va leivahaeakilai, ehovea ara Oa ve leia pekakilai.

¹³ E va arave rare v'ila velavela leiki la eharu ara laria leikilai, ehovea Oa Akore v'ila lei morapaeakilai.

¹⁴ E va arave rare v'ila eharu velavela la leivahaeakilai, ara leikilai.

Ove Veveke ve okoare

¹⁵ E va araro ikiheroe la leikilava e va arave pupu kiva leivahaeakilai.

¹⁶ Ara Oa ve ivaiva leikilai — are ero Hakakaeaki haela ae avarakilai. Are e i mea oaria aeakilai.

¹⁷ O iele ove havahu la. La ove meahaiapo ava va ka, ehovea are arero eava va ka kai arero kara ore va ka. E va arero ore, ehovea are e i hareho aeavila — are eve ureve aeakilai.

¹⁸ Ara ero naoae naoae haitapa va ka — ara eve leia ekekilai.

¹⁹ Haiapo ka meahaiapo araro eava va ka: aka e araro eavakive: ara ovokake leikilai, laelave e kara ovokake leivahaeakilai.

²⁰ La hoa e va ore leivahaeakilai, ara Oa ve ureve aeavila, e va arave ureve aeavila, ara eve ureve kara aeavila.

²¹ Arave pupu oharo iapai kiva leiki la haela are araro ikiheroe iele leivila. Araro ikiheroe leivila la haela, arave Oa kara arero ikivere leikilai: ara kara arero ikiheroe lei ara va areve oropa ve hihika leikilai.

²² Judas (Iscariot ka) arero maeape, Amua, learia, a va elave oropa hihika leikilai, aka meahaiapo ve oropa va ka.

²³ Iesu arero kavale maeape, Haela araro ikivere la leikilava, arave oharo kara are iapai kiva leikilai, arave Oa kara arero ikivere leikilai. Elalila areve leia hoahukakilai, are i hareho apeakilai.

²⁴ Araro ikivere leiki aue la haela, arave oharo kara iapai kiva lei va ka. E va iapailula la oharo arave oharo ka, araro kiparaeape Oa ve oharo.

²⁵ Ara e i hareho aeavila ma oharo ero lamaeaeaila.

²⁶ Aka Hakakaeaki haela, Oa arave rare ve kiparaeaki la Ove Veveke la, are ero eharu oaria kileavahaeakilai, aeva ara ero maeaeape oharo oaria are ero ikikekelakive koarakilai.

²⁷ Havila ara e v'ila hakurepakilai: arave havila ara ero avarakilai. Meahaiapo avaraki la havila hovea ara ero avara va ka: e va ikihorahora kalailue, oaoka kara kalailue.

²⁸ E va arave oharo iapai — ara aukilai kai aireaki ekekilai. E va araro ikiheroe iele va lailava, e va ikiveveke le leivahaeakilai, ehovea ara lamaeaila — ara Oa ve leia aukilai. Ehovea arave Oa va eapapo, ara va hekai.

²⁹ Ara ero mahau oropa lamaeaila eharu aireaki horeavakilai. Laelave eharu kihoreavaki la hoa e va iki kelavakilai.

³⁰ Aireaki ara e i hareho oharo oaria hukavava ka, ehovea ma meahaiapo amua ekekilai. Are ara ila horova leikive hoveahovea va ka.

³¹ Kahara, ehovea meahaiapo ore leikilai, ara Oa ikivere leivila, aeva Oa araro maeaeape la horova ara laria leikilai. Urahukaila, elaviila hoahukakilai.