John 10 - Pupu Oharo Āre 1963 Genese 1970 Rute 1972

Mamoe kiva haela veveke

¹ Iele havahu, ara ero maeaeaive mamoe ve kara okiape havahu ve hoauki aue, kara ikupa muruhari hareauki la haela, are va opore korea haela va la.

² Aka okiape havahu hoauki la haela are va mamoe kiva haela iele.

³ Okiape kiva haela are v'ila okiape la hapakilai, mamoe areve āra iapakilai. Are elare mamoe ereve rare la itavi kari hoaukilai.

⁴ Are elare mamoe kari hoai ereve oropa aukilai — ere kara areve aire auvahaeakilai — ehovea ere areve āra ore.

⁵ Ere haela lahua ve aire auvahaea va ka: ere arero oaoka lei hukaukilai, ehovea ere haela lahua ve āra ore va ka.

⁶ Ma parabole Iesu erero maeaeape — aka are erero maeaeape oharo ve iele ere auhohi au iapaila.

⁷ Laelave Iesu erero aeka maeaeape, O iele havahu, ara ero maeaeaive — mamoe oaria ve okiape ara ma.

⁸ Araro oropa ve ekevahaeape haela va opore haela i korea haela ila, aka mamoe ereve oharo au iapaila.

⁹ Okiape va ara ma. Haela ara v'ila la pekakilava, are ovokake leikilai areve aula kelari hoa eapai veveke koarakilai.

¹⁰ Korea haela korea lei haela hai ka leivahaeakive ekelula. Ara erero ovokake leivahaeakive ekepe. Ovokake veveke iele avakive.

¹¹ Ara va mamoe kiva haela veveke. Mamoe kiva haela veveke elare ovokake mamoe v'ila avarakilai.

¹² Kavale horova leivila haela are va mamoe kiva haela havahu ka; mamoe are havahu ve mamoe ka, laelave are viva meikila eavi mamoe haitapai oaoka lei hukaukilai; viva mamoe korea huveverai koharuapakilai.

¹³ Are oaoka lei hukaukilai, ehovea are va kavale horova leivila haela hiki, are mamoe kekela va ka.

¹⁴ Ara va mamoe kiva haela veveke; ara havahu ve mamoe ara ore, arave mamoe kara araro ore.

¹⁵ Hovea hovea Oa araro ore, ara kara Oa ore: ara arave ovokake mamoe v'ila avarakilai.

¹⁶ Arave mamoe lahua le apearo. Ere ma kara ure hiki apea va ka. Ara erero kara kari ekekilai: ere arave āra iapakilai, ere oaria hiru haroapo leikilai, mamoe kiva haela va haroapo.

¹⁷ Laelave Oa araro ikivere leivila ehovea arave ovokake ara avari kai aireaki le avakilai.

¹⁸ Haela ae arave ovokake hareava va ka, ara havahu avarakilai. Ara va aheke hovea — avarakilai kai aireaki avakilai. Ma oharo Oa araro kimaeaepe.

¹⁹ Jew haela oaria iki lahua lahua kelavape ehovea ma oharo.

²⁰ Ereve haela uku maria avahaeape, Are ovehahu ila, ihape iele — e areve oharo leve iapakilai ha.

²¹ Haela uku maeaeape, Ma oharo ovehahu ila haela ve oharo ka. Haelaharihu ovohae kariri haela ve ovohae leari lei kohelaukakive?

Iesu Jerusalem hurae eapapo pekape

²² La hoa Jew haela ve Okoare Hurai Jerusalem ve leia leipe. Mea vevehere hoa la.

²³ Iesu Hehe Uvi leia Solomon ve okiape maelai loa veavelaripe.

²⁴ Jew haela areve leia korukaiavahaeai maria maeape, Elave ikihorahora hoa a leahau haerapakilai ha? A va Keriso iele la leikilava, elaro hihika kimaeaeaki.

²⁵ Iesu erero kavale maeaeape, Ara ero maeaeape — e va iki au kelavaila. Ara Oa ve rare v'ila leivahaevila la horova — ere ara v'ila vavavailula.

²⁶ Aka e va kelava va ka, ehovea e va arave mamoe ka

²⁷ Arave mamoe arave āra iapailula — ara erero ore — ere kara arave airekai auvahaelula — ara erero ovokake haiapo avarakilai.

²⁸ Ere apihaea va ka; haela erero arave mai ve huveveraia va ka.

²⁹ Erero araro aikiarape la Oa areve haela oaria ve akea ve — aheke iele, haela ae erero Oa ve mai ve huveveraia va ka.

³⁰ Ela i Oa ila haroapo iele.

Jew haela ve ikiheaha

³¹ Jew haela have kailape ehovea arero have koavakive.

³² Iesu erero kavale maeaeape, Ara Oa ve horova veveke oaria ero amoeavahaeape. E va araro have la koakilava — le la horova ae kavale leikilai ha?

³³ Jew haela arero maeape, Ela aro have koava va ka, ehovea horova veveke, aka ehovea Aualari ve rare heaha leikive la oharo — aeva ehovea a va haela, a va elare maea Aualari maea hovea leivila.

³⁴ Iesu erero maeaeape, Eve pupu buka au haila ha, Ara ero maeaeape, e oaria va aualari?

³⁵ Are aualari rare erero itavi maea araikilava, Aualari ve oharo avape la haela (hohoa hape la oharo hakurepa va ka).

³⁶ Aualari hehe lei meahaiapo kiparaeape la haela v'ila e va leve arula, A Aualari heaha leivila, ehovea ara maeape, Ara Aualari ve Akore?

³⁷ Ara arave Oa ve horova leiki aue la leikilava, arave oharo ka iaparue.

³⁸ Aka ara erero iele la leikilava, e kara araro iapaki aue la leikilava, heroe, e va horova la kelavaki, ehovea e ore leivahaeakilai, Oa ara i aeavila, ara kara Oa i aeavila.

³⁹ Ere arero mai paeakive ikivere leivahaeape, aka are ereve mai ve le aupe.

⁴⁰ Are kai ita lahua ai Jordan ukai ve elaupe — John oropa hoa bapatiso horova leipe la ita. Are leia aeaveape.

⁴¹ Areve leia haela oaria auvahaeape. Ere maeaeape, John ihova ae va au leila — aka John ma haela v'ila maeape — oharo oaria iele havahu.

⁴² Haela perehekai oaria arero leia iki kelavape.