John 1 - Pupu Oharo Āre 1963 Genese 1970 Rute 1972

Hapaki oharo

¹ Avare koare la hoa, Oharo Iele aeaveape; Oharo Iele Aualari i hareho aeaveape; Oharo Iele va Aualari hovea hovea.

² Are va avare koare hoa Aualari i hareho aeaveape.

³ Eharu oaria are karikipe: are va karia va laila, karikivahaeape la eharu oaria va au karikivahaeaila. Eharu oaria are hiki karikivahaeape.

⁴ Ovokake are v'ila aeaveape. La ovokake haela oaria ve ovava leipe.

⁵ La ovava mea muru hoa heauapavila, mea muru arero auhohi kekela va ka.

⁶ Aualari haela ae kipareape; areve rare va John.

⁷ La haela ovava vavavakive ekepe, ehovea haela oaria are v'ila iki kelavakive.

⁸ La ovava are havahu ka, aka arero kiparaeape Aualari, ehovea la ovava v'ila vavavakive.

⁹ Meahaiapo ekevahaelula haela oaria aiaravila la ovava va iele.

¹⁰ Are meahaiapo aeaveape, are meahaiapo karikipe, aka meahaiapo haela arero ore au leila.

¹¹ Are are havahu ve eharu ve ekepe, aka areve haela arero auhohi au leila.

¹² Aka arero auhohi leivahaeape la haela, are erero aheke aiarape, Aualari ve akoremari hovea leikive, areve rare iele kelavalula la haela.

¹³ Ere va apu v'ila aka aivau v'ila au eravahaeaila, ere va Aualari v'ila erape.

¹⁴ Oharo Iele aivau maea leipe, ela i hareho aeaveape. (Ela areve haharika eavape, Oa ve la Akore haroapo ve haharika hovea) are ove meru i o iele ila.

¹⁵ John are v'ila mari kileape, Ara ma haela v'ila oropa kileape, Araro airekai ekeki la haela ere arave oropa ve ikivere leikilai ehovea are arave oropa ve aeaveape.

¹⁶ Elaviila oaria areve iele le avape, ikiore i ove meru ila hovea hovea, eapapo iele.

¹⁷ Ehovea pupu oaria Moses aiarape, aka meru i O iele ila Iesu v'ila ekevahaeape.

¹⁸ Haela oaria Aualari au eavaila, Aualari epape Akore haroapo hiki la, Oa ve iki ureve aeavila la akore, are hiki arero hihika amoeape.

John Baptist Iesu v'ila vavavape oharo

¹⁹ Jew haela va oharo haela i Levite haela ila uku Jerusalem ve paparaehape ehovea arero velavela leikive, A leita ha?

²⁰ John erero kavale mari maeaeape — are hehepo au leila, are erero hihika maeaeape, Ara Keriso ka.

²¹ Ere arero apevelavela leipe, Lehae a va Elias ha? Are macaeape, Ka. A va la peroveta haela ha? Are kavale maeaeape, Ka.

²² Laelave ere arero maeape, A va leita ha? — Ehovea elaro kipaparaehape la haela, ela kavale oharo maeaeakive — A va elare rare learia kimaeaeakilai ha?

²³ Are maeaeape, Ara huakara ita havila haela ve āra maria: — Amua ve okiharo ehohoe karikiki — Isaiah maeape oharo la.

²⁴ Arero velavela leikive ekevahaeape la haela va Pharisee haela.

²⁵ Ere arero velavela maria leivahaeape, A va Keriso, aka la peroveta haela leiki aue la leikilava, a va haela bapatiso leivahaevila ehovea leve ha?

²⁶ John erero kavale maeaeape, Ara ma v'ila bapatiso leivila, aka eve aru hihi ve haela le peave — e va arero haveva.

²⁷ La haela arave aire ekekilai, kai arave oropa leikilai, ara areve loa iilu ve ela helaukakive hovea va ka.

²⁸ Ma eharu Bethabara, Jordan ukai ve, leivahaeape. John bapatiso horova leipe la ita.

²⁹ La opoa hare John Iesu ekevila eavi mariape, Eavaila, Aualari ve Mamoe Akore — Meahaiapo haela ve heahaha hapururukavila la Mamoe Akore.

³⁰ Ara ma haela v'ila maeape, Arave aire ekeki la haela arave oropa leikilai, ehovea are arave oropa ve aeaveape.

³¹ Ara arero ore au leila, aka ara v'ore hiki are Israel haela oropa ve hihika leikilai, laelave ara ma v'ila bapatiso leikive ekevila.

³² John maria vavavape, Ara Ove huva hovea kaia ve kihoauvila eavape, are areve akea ve epavape.

³³ Ara arero ore au leila, aka araro ma ve bapatiso leikive kiparaeape la haela araro mari kimaeape, A va Ove areve akea ve ma kihoaila eavaki la haela — Are Ove Veveke v'ila bapatiso leivila haela.

³⁴ Ara eavape — kai vavavape — la haela are va Aualari ve Akore.

John Baptist ve kilea haela i Iesu ila

³⁵ La opoa hare John i kilea haela orahokaila ila epavape.

³⁶ Are Iesu veavila eavi mari maeaeape, Eavaila, Aualari ve Mamoe Akore.

³⁷ La kilea haela orahoka areve oharo iapai, Iesu airekai auvahaeape.

³⁸ Iesu helari erealilara eavi maeape, Ealila le la haroparo ha? Erealila kavale maeape, Rabbi (la oharo ve iele Haelapo), a va lahoa aeavila ha?

³⁹ Are erelilara maeaeape, Ari iki ovohae eavaila. Erealila ai are aeaveape la uvi eavape kai la hare are i hareho apeape, ehovea hailaea hoa 4 o'clock.

⁴⁰ John ve oharo iapai Iesu airekai auvahaeape haela ae ve rare Andrew, Simon Peter ve akoreheari.

⁴¹ Are oropa Simon areve akoreapo koarai mari maeape — Ela Messiah (la oharo ve iele, Keriso) lakoaraila.

⁴² Are arero Iesu ve leia lai aupe. Iesu arero eavi mari maeape, A va Simon, Jona ve akore, a va aireaki rare itavaki rare, Cephas — (la rare ve iele, Peter — have).

⁴³ La opoa hare Iesu ikivere Galilee hoaukive. Are Philip koarai mari maeape, Araro airekai ekela.

⁴⁴ Philip va Bethsaida haela, Andrew i Peter ila ve karikara.

⁴⁵ Philip Nathaniel koarai mari maeape, Ela va Moses pupu buka i peroveta ila ve oharo haeape, la haela koarape — Iesu Nazareth haela Joseph ve akore.

⁴⁶ Nathaniel mariape, Eharu veveke Nazareth karikara kihorerakilai ha? Philip arero maeape, Iki ovohae eavaki.

⁴⁷ Iesu Nathaniel ekevila eavi are v'ila maeape, Eavaila — iki veveroro Israel haela la.

⁴⁸ Nathaniel arero maeape, A araro ore lahoa leipe ha? Iesu arero kavale maeape, Philip aro aire lamaeaila ara aro oropa laeavila, lauka kora ipi ve.

⁴⁹ Nathaniel kavale maeape, Rabbi, a va Aualari ve Akore! A va Israel ve Amua!

⁵⁰ Iesu arero kavale maeape, Ehovea ara aro mari maeape, Ara aro lauka kora ipi ve laeavila, a araro iki lakekelaila ha? La va iele karia — a va aireaki eharu ehoaha iele havahu eavavahaeakilai.

⁵¹ Are arero maeape, O iele, o iele, ara aro maeaive, aireaki hoa a va kaia hapaila eavakilai, kai Aualari ve aneru pekahavaki kihoahukaki v'ila eavakilai.