James 5 - Pupu Oharo Āre 1963 Genese 1970 Rute 1972

Erohoho haela haela ae heaha kalailue

¹ E erohoho haela, auila: e va aireaki koaraki heraho i kakare v'ila hi ma hoa avahaeakive, heroe.

² Eve erohoho heaha le leiroape, eve pura kara ihoko le lakarape.

³ Eve auri i ario ila poae le leivahaeape, ereve apu ero heaha lei hahakilai: la apu eve aivau a hovea harilai, ehovea e va ma hita hare erohoho oaria korukaiavahaeape.

⁴ Eve oru eapai ikaeape la horova haela ve kavale, e korea kaili au avaraila; la kavale ve hi iapaila, horova haela ve hi eapapo. Amua eapapo kara iapape.

⁵ E va ikiveveke ila meahaiapo apeapea mai haeae le leiroape. E va mare hoa hovea eharau le huharavape.

⁶ E va mai ehohoe haela au hahai haeavahaeape: ere ero hereava va ka.

Auhohi apeaki mai

⁷ Apavari, auhohi apeapea Amua ve ekeki hoa la kari. Eavaila, oru horova haela are kekele ve eapai hovare la karive — are haiapo iele la eapai la karive, aiai oropa hoa i aireaki hoa ve lai veveke.

⁸ E kara auhohi apeaki. Iki aheke leivahaeaki — ehovea Amua ve ekeki hoa maeamaea.

⁹ Apavara, elarelare ikiheaha kalaivahaelue, haela ero haeae heheavaki ave. Eavaila, heheavaki haela okiape oropa ve peave.

¹⁰ Apavara, Amua ve rare ve iroro avahaeape la peroveta haela eve ihova hovea leivahaeaki: ereve kakare i heraho ila leivahaeape la hoa ere va ikihairihairi au leivahaeaila.

¹¹ Eavaila, elaviilave ikikekela aheke apeaki la haela va iki veveke leivahaeaki haela. E va Job ve auhohi aeaveape mai ve hari overa iapape. Amua ve hoa e kai eavavahaeape. Amua va ikiheroe i ikihuru eapapo ila leivahaevila.

¹² O iele, apavara, kaia ve rare ve, meahaiapo ve rare ve, aka rare aea ve, o heaha kavahaealue. E va mari ari, E, e, aeka, Ka, ka, e va heaha koaraki ave.

Ivaiva ve aheke

¹³ Eve haela ae heraho la leikilava, are ivaiva arive heroe. Haela ae va ikiveveke la leikilava, are hehe hivi helakive, heroe.

¹⁴ Eve haela ae maea kakare leive ha? Are va ekalesia ve oropa haela itavakive, heroe. Ere va areve ivaiva arilai, kai arero Amua ve rare la la‐apu haririkive.

¹⁵ Ikikekela haela ve ivaiva maea kakare haela lei makurikilai; Amua arero lai urapakilai. Are va mai heaha va laila, la mai heaha hapururukakilai,

¹⁶ Elarelare mai hahaeae hihika hukavaki; elarelare ivaiva arive; ehovea eve heaha elavelave laria leikilai. Mai ehoe haela ve ivaiva aheke o iele horova veveke leikilai,

¹⁷ Elias va elare maea i iki ila elaviilave maea i iki ila hoveahovea. Are lai ihauki aue ivaiva ape. O iele hitolo ilehoila papare 6 ila, meahaiapo lai au ihaila.

¹⁸ Are aeka ivaiva ape la hoa, kaia lai eapapo kiparaeape — meahaiapo eapai hovare oaria leivahaeape.

¹⁹ Apavara, eve haela ae oharo iele arive la mai la hakurepakilava, kai haela ae areve iki la helarikilava,

²⁰ Arero kileaki — mai heaha haela lei helariki la haela are areve ove kara lei ovokake leikilai, are mai heaha oaria kara hapururukakilai.