James 4 - Pupu Oharo Āre 1963 Genese 1970 Rute 1972

Hiri lahua lahua v'arekaea

¹ Eve leia ve la hahari oaria lahoa ve ekevahaeape? O iele, ere va eve ma mai heaha i ikiheaha leilula mai ve ekevahaealula.

² E va ikivere eharu iele koara va ka; e va ikivere havahu iele leilula, aka eharu iele aea va ka. E va ape hahari arula, aka ikivere eharu koara va ka; ehovea e Aualari apevelavela leivahaea va ka.

³ E va apevelavela leilula, iele koara va ka, ehovea e va apevelavela haeae leilula, ehovea e ikivere ka mai heaha hakurepakive.

⁴ E va mai heaha leilula haela: e ore va ka — e va meahaiapo kake la leivahaeakilava e va Aualari hahari leivahaeakilai? Laelave meahaiapo ikivere la haela are va Aualari ve iri haela.

⁵ Eve iki learia? Buka oharo naoae hape ha, Elave ureve la ove va mai heaha ikivere leivila?

⁶ Aka are va ikiheroe meru aeva avarakilai; laelave areve oharo maria, Aualari pelaea haela hereavakilai, aka are maeoka la haela ikiheroe meru avarakilai.

⁷ Ehoveala — e va Aualari ve okiharo kiva leiki — diabolo hahari arive la hoa are ero oaoka lei hukaukilai.

⁸ Aualari ve ukaki auila, are ero maia iele kihoai koarakilai. E va mai heaha haela, elare mai huhelavaki va heroe: eve iki veveroro leivahaeaki, iki orahokaila orahokaila v'arekaea.

⁹ Ikihuru leivahaeai hi avahaeaki — are a keaki mai kahara — ikiveveke naoae naoae mai hakurepa, iki mehau kara leivahaeaki.

¹⁰ Amua oropa ve maeoka leivahaeaki, are ero lei urapakilai,

¹¹ Apavara e, elarelare oharo haeae ka hukavalue. Areve apoheari v'ila oharo haeae maeaki la haela, areve apoheari heheavaki la haela, pupu ve oharo haeae kara maeaivila. Ava la pupu la heheavakilava, a va pupu kiva haela ka, a va pupu heheavaki haela.

¹² Pupu avaraki haela va haroapo hiki; are va aheke ehovea lei ovokake leikive kai hai ka leikive. A va leita ha? Haela ae kaheheavalue.

Erohoho haela pelaea v'arekaea

¹³ Iapaki — e va maia oharo leve arula, Mahau hare aka opoa hare ela va karikara ae pekakilai; ela va hitolo haroapo leia apeakilai, ela va kakavae horova arilai, moni oaria koarakilai?

¹⁴ Ehovea a va opoa ve kihoreavaki eharu haveva. Eve ovokake iele le? Are va a mahuvu hovea, areva haiapo aea va ka, au hahai pekai karia le leikilai.

¹⁵ Maria arive heroe, Amua ikivere la leikilava, ela va ovokake leivahaeakilai, maria leivahaeakilai, aka laria leivahaeakilai.

¹⁶ Aka ma hoa e va eve pelaea v'ila ikiveveke leilula. Laria ikiveveke mai va heaha iele.

¹⁷ Laelave mai veveke leikive ore la haela veveke leikiaue la leikilava, are va mai heaha haela.