James 3 - Pupu Oharo Āre 1963 Genese 1970 Rute 1972

Ape kiva leiki mai

¹ Apavara, kilea haela oaria hoveahovea kalaivahaelue, ehovea kilea haela ve heheavaki hoa aheke havahu leikilai.

² Ehovea elaviila oaria hahaeae leilula haela. Haela ae va oharo v'ila haeae leiki aue la leikilava, are va haela mekakure, are va elare maea kiva auhohi leikive ore.

³ Elaviila horse ve ape ve hereavaki ela hahalula, ehovea ere elaviilave oharo iapakive; laria elaviila ereve maea hoa haroapo helarikilai,

⁴ Vevaea kara eavaila: Ere va ehoaha, kai mea eapapo erero kari auvahaelula, aka hihe haela erero helarikive ore, areve ikivere hoveahovea.

⁵ Lahovea, haela ve auri va eharu hekai, aka are va horova eapapo leikive ore: a kara hekai, are va a eapapo ililakilai.

⁶ Auri are va a kae hovea, heaha eapapo leikive hovea: elaviilave maea ve eharu oaria are heaha leikive ore: are va a hovea Hell ve horova heaha eapapo leikive ore.

⁷ Ehovea loa loalula eharu, ori, kai ekaroa, kai ahea ma ve apealula la eharu, la eharu oaria haela lei maraha le leivahaeape.

⁸ Aka haela ve auri haela ae lei maraha leikive ore va ka. Are va heraho leivila eharu heaha, muramura heaha hovea.

⁹ Elaviila auri v'ila Oa Aualari ve rare lei morapaeakive ore. Elaviila auri v'ila o heaha arive kai ore. Elaviila Aualari ve maea hovea karikivahaeape haela.

¹⁰ La ape haroapo ve horeavaki eharu va oharo veveke i oharo heaha ila. Apavara, laria mai veveke ka.

¹¹ Mea ureve pekaki ma va hoa haroapo hirore i kaeake ila ha?

¹² Hia kora hoa haroapo lauka hae huhoreavakilai ha? Vine kora kara suke hae huhoreavakilai ha? Laelave, ma hoho va hoa haroapo ma koa i ma kaikara ila horeava va ka.

Opore ikiore i Ikiore o iele ila

¹³ E va leita haela va ikiore eapapo leivila haela ha? Veveke, are va maeoka ila areve ikiore ve horova veveke hihika leikive.

¹⁴ Aka, e va elarelare ikiheaha i hahari mai la leivahaeakilava, leia ve pelaea kalaivahaelue, aeva opore mai lei v'arekaea.

¹⁵ Ma ikiore akea ve kihoau va ka, are meahaiapo ve hiki, maea ve la ikiore heaha.

¹⁶ Ehovea ikiheaha i hahari ila la ita va heraho i lamuki lamuki ila kara.

¹⁷ Aka akea ve kihoauvila la ikiore va veverororo i mekakure ila, harita harita, heaha karia, ikihuru i mai veveke ila, hehepo i hihiri ila karia.

¹⁸ Mai ehoe ve hae veveke; are va havila hoa aporape eharu, are va havila iele leiki eharu.