James 2 - Pupu Oharo Āre 1963 Genese 1970 Rute 1972

Erohoho haela i merava haela ila

¹ Apavara, e va elaviilave Amua Iesu Keriso, Amua mekakure, momorapulula la mai hovea, haela v'ila lei v'arekaea.

² Ehovea, haela ae eve leia maupa veveke i pura mekakure ila la kihoaukilava, kai haela ae, merava haela, pura heaha ila la kihoaukilava,

³ E va pura i maupa ila mekakure la haela oropa la kelavakilava, kai arero maria la maeakilava, A va ma ita veveke haiavaki, kai merava haela la maeakilava, A va leia pavaki, aka arave loa pavaki haha haiavaki.

⁴ E va opore morapaeakilai, eve ikikekela kara haeae.

⁵ Apavara e, ikiheroe: Aualari meahaiapo merava leivahaeape haela, basileia ve erohoho haela hovea itavavahaeape: Arero iele ikivere leivahaealula haela la basileia are okoare maeape.

⁶ Aka e va merava haela hahaure leivahaeape. Erohoho haela ero hararualula; ere ero heheavaki ita kari auvahaelula.

⁷ Ero itavape la rare mekakure kara ere o heaha arula.

⁸ Eve okiharo veveke iele ma — buka ve pupu mekakure maria, A va a i hareho aeavila haela ikiheroe leiki. La pupu kiva auhohi leivahaeaki.

⁹ E va haela la morapaeakilava, e haeae leilula: e va pupu haerapailula.

¹⁰ Ehovea pupu oaria kiva leivahaeai haroapo hiki haerapaki la haela are pupu oaria hovea haerapaive.

¹¹ Ehovea, Airi pavora mai kalailue, maeape la haela aeka maeape, Haela kahelue. Laelave a va airi pavora mai leikiaue la leikilava, aka haela la harilava, a va pupu v'ila haeae leive.

¹² A va oharo veveke arive, kai horova veveke leikive — laria a va ovokake pupu kiva leilula haela.

¹³ Ehovea ikiheroe leikiaue haela, heheavaki hoa ere arero ikiheroe lei va ka. Ikiheroe mai aireaki aheke leikilai, heheavaki hoa va mahuka.

Ikikekela mai i horova mai ila

¹⁴ Haela ae ikikekela aheke la leikilava, are va learia veveke leikilai ha? Areve ikikekela arero lei makurikilai ha?

¹⁵ Apoheari aka mariloa maheare la leikilava, kai eroa la harilava,

¹⁶ Haela ae arero maria la maeakilava, A havila ila aukive, a va maea ahea leiki — ave eharau huharaki — aka arero la pura i eapai ila aiarakiaue la leikilava, e va le veveke leikilai ha?

¹⁷ O iele, ikikekela lahua, horova mai karia ila, are va iele karia.

¹⁸ Kaire! Haela ae maeakilai, A va ikikekela ila, ara ka horova mai veveke ila. A va horova karia ila la ikikekela araro amoeaki — ara va horova mai veveke ila la ikikekela aro amoeakilai.

¹⁹ A va Aualari haroapo iele kekelavila — veveke la. Haelaharihu kara laria kelavalula kai oaoka leilula.

²⁰ Aka — a va auhohi iapaki, a pelaea iele haela, horova mai karia ila la ikikekela va iele karia.

²¹ Elaviilave vilali Papa Abraham, areve akore Isaac arura haha avarape la hoa, horova mai veveke ila lei ehoe au leila ha?

²² A kai eavaki — areve ikikekela veveke i horova mai veveke ila lei ehoe le leipe.

²³ Oharo iele havahu hape maria, Abraham Aualari iapai kekelape — laelave arero lei ehoe leipe. Ere arero rare itavape rare Aualari ve loaukai.

²⁴ E va laria eavaki — haela ve ikikekela hiki arero lei ehoe lei va ka, aka horova veveke mai kara.

²⁵ Aeka — harari uamari Rahab, meu haela koarai oki lahua paparaehape la hoa, are va horova v'ila lei ehoe au leila ha,

²⁶ Ehovea, hoveahovea, maea va ove karia la leikilava, are huru iele, ikikekela mai horova veveke mai leiki aue la leikilava, are kara huru iele.