James 1 - Pupu Oharo Āre 1963 Genese 1970 Rute 1972

Kileaki oharo uku

¹ Ara, James, Aualari i Amua Iesu Keriso ve horova haela — ita lahua lahua oaria ve apealula Israel hiru 12 ve haela, ikiheroe!

² Apavara, e va heraho koaraki hoa oaria ikiveveke leivahaeaki.

³ Ehovea e v'ore leivahaeaki, amuraeaki hoa oaria elaviilara lei aheke leivahaelula.

⁴ E va aheke iele havahu leivahaeaki, e va oaria mekaka leivahaeakilai, heaha karia.

⁵ Ikiore uku karia la haela Aualari apevelavela leivahaeaki. Aualari haela oaria meru oaria aiaravila, are o heaha e va ka; La haela la ikiore avakilai.

⁶ Areve velavela leiki hoa iki iele kekelakive, horahora kalailue. Ehovea horahora leivila la haela are va ahea ma ve haha hovea, mea oaria naoae koavila.

⁷ La haela kekela v'arekaea are Amua v'ila eharu aeakilai.

⁸ Iki orahokaila la haela ve okiharo naoae naoae.

⁹ Ipi ve la apoheari lai urapaki hoa ikiveveke leikilai, heroe.

¹⁰ Erohoho haela ipi ve leiki la hoa kara ikiveveke leikive, ehovea mea ve la hohe i pupuri ila hoveahovea, are karia leikilai.

¹¹ Ehovea hare akea pekai ahea eapapo leiki la hoa, are hohe haroropakilai — pupuri kara laria leivahaeakilai, are va heaha le leikilai. Lahovea kara erohoho haela heaha lei karia leikilai.

¹² Amuraeaki hoa aheke leiki haela ikiveveke leikilai, ehovea amuraeharae karia leiki la hoa are ovokake iele ve korona avakilai. Amua arero ikivere leilula haela oaria okoare ape la ovokake.

¹³ Amuraeaki hoa haela maria kamaealue, Aualari araro amuraeape — ehovea Aualari amuraeaki hoa ava va ka — are haela kara amuraea va ka.

¹⁴ Aka haela oaria amuraeharae aeakilai; are havahu ve iki ureve la haeae arero amuraeavila.

¹⁵ Ikikekela haeae ve akore va mai haeae. Mai haeae ve epaki eharu va apaki hoa.

¹⁶ Ma oharo v'ila, apavara e, horahora kalaivahaelue.

¹⁷ Meru mekaka oaria akea ve kihoahukalula, ovava oaria ve Oa ve leia ve kihoahukalula. Are ikihelari va ka: Areve la ovava meahaiapo ve la muru koa va ka.

¹⁸ Ehovea are havahu ikivere leipe, are elaviilara o iele ve erape. Elaviila va areve ovokake haela oaria ve akoremari koare.

Aualari ve mai veveke

¹⁹ Laelave, apavara, ikihuru iele, haela oaria elavelave iapakive, oharo hahari hahari hukavakive, hihiri elavelave arekaea.

²⁰ Ehovea haela ve hihiri mai Aualari ve mai ehoe koara va ka.

²¹ Laelave, ikiheaha oaria i ikikekela heaha ila aikilapaki; oharo veveke iele maeoka ila availa. Haela oaria ve lei makukuriki oharo va la.

²² Oharo ve iele ve horova leivahaeaki, au hiki iapavahaea v'arekaea. Elare iki kamuraealue.

²³ Ehovea au hiki iapai leiki aue la haela are elare ove, ma ureve ovohae eavaki haela hovea.

²⁴ Are elare ove la eavi elare oki auki la hoa are elare oropape hovea iki hoapakilai.

²⁵ Aka ovokake iele la pupu ovohae eavaki la haela, kai kiva auhohi leivila la haela, ehovea are la pupu iki hoapa va ka, aka horova iele leikilai; ma haela areve horova v'ila ikiveveke leikilai.

²⁶ Elare mai veveke kekelaki haela va ape haeae kiva leiki aue la leikilava, elare iki ureve lamuraeakilava, areve mai veveke iele karia.

²⁷ Oa Aualari ve oropa ve, mai veveke iele ma: Merava haela i uavila maitava ve heraho hoa kiva leivahaeakive, aeva meahaiapo la mai heaha leivahaea v'arekaea.