Horova 8 - Pupu Oharo Āre 1963 Genese 1970 Rute 1972

Ekalesia haela hararuape kai ita lahualahua haruapape

¹ Saul arero harive ikivere leipe. La hoa Jerusalem apealula la ekalesia haela oaria, ereve eapapo hararuaki hoa ipopeavape. Ere oaria Judea i Samaria ila la kaipu karikara ve titavape, aposetolo haela hiki au titavaila.

² Hehe haela uku Stephen karu iha are v'ila ikihuru eapapo leivahaeape.

³ Aka Saul ekalesia hararuape: are va uvi oaria pekai vilaita i uavila ila hareho hakekeapuvahai uvi muru paparaehape.

Philip Samaria leia

⁴ Au titavape la haela oaria ita oaria iroro oharo avahaelula loaloape.

⁵ Philip Samaria karikara ai Keriso la oharo leia kileavahaeape.

⁶ Haela oaria Philip maeaeape la oharo iapai areve ihova eavi iki le kelavape.

⁷ Ehovea ovehahu ila la haela v'ila ovehahu āra hai le kihoahukape. Epeapo heheva haela i ora heahaha haela ila lei makukuripe.

⁸ La karikara ikiveveke eapapo leipe.

Simon, harea haela

⁹ Aka haela ae rare Simon leia aeaveape. Are va overa hoa harea horova eapapo lei elare rare akea haela hovea leipe. Laelave Samaria haela oaria ikihorahora eapapo leivahaeape.

¹⁰ Ere oaria la haela ve oharo iapai mari maeape, Ma haela va Aualari ve aheke, eapapo rare itavape la Aheke.

¹¹ Ere areve oharo kelavape, ehovea mea haiapo iele ere va areve harea horova v'ila horahora leivahaeape.

¹² Aka ere Philip Aualari ve basileia i Iesu Keriso ila ve la oharo iapai bapatiso leivahaeape, vilahoaha i uavila ila hareho.

¹³ Simon kara iapai kekelape. Are bapatiso lei Philip i hareho veape. Are areve ihova i horova oaria ovohae eavi ikihorahora eapapo leipe.

Peter i John ila Samaria leia

¹⁴ Jerusalem apearoape la aposetolo haela, Samaria haela Aualari ve oharo iapavahaeape la oharo ore lei Peter i John ila ereve leia paparaehape.

¹⁵ Erealila iki leia ere v'ila Ove Veveke avakive ivaiva leivahaeape,

¹⁶ Ehovea la hoa Ove Veveke erero au koaraila. Ere Amua Iesu ve rare v'ila hiki bapatiso leivahaeape.

¹⁷ Ere erero mai kohari Ove Veveke ere i hareho le aeape.

¹⁸ Simon, Ove Veveke aposetolo haela ve mai v'ila ekepe, ovohae eavi, erero moni avarakive ikivere leipe.

¹⁹ Are maeaeape, Araro ma aheke avikiara, ara kara haela mai kohari Ove Veveke avarakilai.

²⁰ Aka Peter arero maeape, A ave moni ila apihaeakilai, ehovea ave ikikekela Aualari ve meru moni ilaea leikive hovea.

²¹ A va ma eharu i hareho aea va ka, ehovea a va Aualari oropa ve iki ehoe au leila.

²² Ave haeae ve ikihuru lei Amua ivaiva leikive, ehovea a ikikekelape la haeae are hapururukakilai.

²³ Ehovea ara eavave ave iki haeae iele, kaeake hovea, kai mai heaha aro le hahape.

²⁴ Simon kavale maeape, A havahu ara v'ila Amua ivaiva leiki, a laila la eharu oaria ara v'ila kihoreavaki ave.

²⁵ Ere va Amua ve oharo iroro ai Jerusalem aeka pekahavape. Ere pekahavape hoa Samaria karikara oaria kara iroro oharo ape.

Philip i Ethiopia Eunuch ila

²⁶ Aka Amua ve aneru Philip oharo mari kileape, Urou, diho hoa Jerusalem aiai Gaza la okiharo ve aula — la ita va huakara.

²⁷ Are urai aupe. Iapai, are Ethiopia eunuch haela dedehi ae eavape, Candace, Ethiopia uamari amua ve haela aheke — are areve erohoho eharu oaria kiva leivahaeape haela. Are Jerusalem aupe ehovea Aualari morapaeaki ivaiva arive.

²⁸ Are overa helari ai elare chariot haiavi Isaiah peroveta haela ve oharo mureape.

²⁹ Ove Veveke Philip maeape, Areve leia ma haela i hareho haiavakive.

³⁰ Philip vivila arero Isaiah peroveta haela ve oharo mureavila iapai, arero mari maeape, A mureavila la oharo ve iele a ore ha?

³¹ Are kavale maeape, Ara leari ore leikilai arave kilea haela karia? Are arero apevelavela leipe are i hareho haiavi kileakilai.

³² Are buka oharo mari mureape: Ere arero mamoe hovea harive lai aupe Hoveahovea, mamoe akore areve kolo hailaeaki haela oropa ve muruha hiki aeavila Are kara oharo maea va ka.

³³ Areve maeoka hoa ere arero ehoe au heheavaila: Areve vilakao leita maeakilai, Ehovea areve ovokake meahaiapo ve le hareavape.

³⁴ Eunuch Philip kai velavela leipe maria, Araro hela kimaeaki — Peroveta haela ma oharo leita v'ila hape — are havahu v'ila, aka haela ae?

³⁵ Philip ape ha, ma oharo hoa aiai Iesu ve oharo kara arero kileape.

³⁶ Ere auvahaeape la hoa la haela dedehi mariape, Eavi — ma haru ma, a va araro bapatiso leikilai, heroe ha?

³⁷ Philip maeape A va iele iki hareho la kekelakilava, ara leikilai heroe. Eunuch haela kavale maeape, Ara va ikikekela! Iesu Keriso Aualari ve Akore.

³⁸ Are chariot horova haela au pavakive maeape — erealila hareho Philip i la Eunuch haela ila ma ve hoai — Philip arero bapatiso leipe.

³⁹ Erealila ma ve urahukai Ove Veveke Philip hareavi lai aupe. La Eunuch haela arero aireaki au eavaila, ehovea are elare oki iki veveke ila aupe.

⁴⁰ Aka Philip Azotus pekape, kai leia harepai karikara oaria iroro oharo ape aiai Caesarea ve leia pekape.