Horova 7 - Pupu Oharo Āre 1963 Genese 1970 Rute 1972

Stephen ve iroro oharo

¹ Akea oharo haela maeape, La oharo iele ha?

² Stephen maeape, Apavara i oa lou haela ila iapai — Aualari mekakure, elaviilave vilali Abraham Mesopotamia aeaveape la hoa areve oropa ve kihoaupe. Ma va oropa hoa, Abraham Haran aireaki aeaveape.

³ Are arero maeape, Ave la ita i apavara ila haitapai, ara aro amoeakilai la ita aukive.

⁴ Are Chaldean haela ve la ita harepai Haran aeaveape. Areve oa oropa api aireaki Aualari arero e mahau apealula ita kai kiparaeape.

⁵ Are arero mea havahu au avaraila, kaire, areve loa epavape la ita au avaraila. Are va arero okoare mariape — are va aireaki avarakilai — are i areve meavohula ila, aka la hoa are va akore karia.

⁶ Aualari mari maeape — areve meavohula ita lahua apeakilai. Ere va horova ahea iele ita heaha iele apeapea hitolo 400 hovea.

⁷ Aualari mari kara maeape, Erero hahaeavahaeape la vilaipi ara heheavakilai — aireaki ere kihoahukai ma ita ve arave horova leikilai.

⁸ Are arero peritome la okoare avarape. Laelave Abraham Isaac epape kai areve hare 8 hoa arero peritome mai leipe. Isaac Jacob epape: Jacob elaviilave vilali haela 12 erape.

⁹ Vilali haela Joseph hihiri lei Egypt ilaea lei paraeape.

¹⁰ Aualari arero koarai ai areve heraho ve hareavi Pharaoh, Egypt ve amua, oropa ve le morapaeape. Are arero areve uvi i Egypt hareho ve kiva haela leipe.

¹¹ Egypt i Canaan ila mea avora leipe, heraho eapapo iele. Elave vilali haela eapai au koaraila.

¹² Aka Jacob eapai Egypt aeavila iapai, elaviilave vilali haela oropa hoa paparaehape.

¹³ Aire hoa Joseph areve maea huhohoaha oropa ve hihika leipe. Pharaoh kara Joseph ve huhohoaha ore leivahaeape.

¹⁴ Joseph areve oa Jacob i apavara oaria ila, haela 75, itavavahaeape.

¹⁵ Jacob Egypt hoai aireaki le apape. Are i elaviilave vilali haela kara.

¹⁶ Ere erero Shechem oraiavi auvahaeai, Abraham Hamor Shechem haela kavale leipe la kapu ita, karu le ihahape.

¹⁷ Aualari Abraham okoare maeape la hare kihorera maea iele, la hoa Egypt apearoape la haela aheai haela oaria le leipe.

¹⁸ Amua lahua Egypt kiva leipe, are Joseph haveva.

¹⁹ Are elaviilave haela au amuraeape, kai elaviilave vilali heaha leivahaeape, ereve akoremari aikilapaki haeakive maeaeape, akoremari ovokake leiki ave.

²⁰ Moses la hoa epape, akore veveke iele. Ere arero oa ve uvi papare three kiva leipe.

²¹ Arero mea paraeape la hoa Pharaoh ve mari arero laeai elare akore havahu le leipe.

²² Moses Egypt haela ve ikiore oaria le avape — are va ape i horova v'ila aheke leipe.

²³ Are va hitolo 40 hoa, areve iki kekela elare apavara Israel akoremari ovohae eavakive.

²⁴ Are ereve kakare leipe haela ae eavi koarape — arero koape la haela are kavale koa le hape.

²⁵ Areve ikikekela areve apavara ore leipe — Aualari areve mai v'ila erero ovokake leivahaeakilai: aka ere va iki auhohi au kekelaila.

²⁶ La opoa hare are kihoai ereve haela hahari arula eavape. Are ikivere erero hereavakive kai mari ape, Haelakaru, e va apavara elarelare hahari ehovealeve ha?

²⁷ Aka areve apavara haeae leipe la haela arero huikapai mariape, Aro elave amua i heheavaki haela leita leipe ha?

²⁸ A va ikivere araro harive, a haila hare Egypt haela lahila hovea hovea ha?

²⁹ Moses ma oharo iapai oaoka lei hukaupe. Are va Midian ita aeai akoremari orahoka erape.

³⁰ Hitolo aeva 40 karia lei, Sinai ve huakara ve, aneru haroapo kora ve huhuraki aue a ureve areve oropa ve ekepe.

³¹ Moses laria eāvi ikihorahora leipe, are iki maeamaea ovohae eavi Aualari ve āra mari iapape,

³² Ara va ave papa ve Aualari, Abraham i Isaac i Jacob ila ve Aualari. Moses iki ihiaha eavakive oaoka leipe.

³³ Amua arero maeape, Ave loa iilu hehelauka aipe, ehovea a peavila la ita hehe ita havahu.

³⁴ Arave Egypt apealula haela ve kakare ara overa eavi, ereve hivavara ara overa iapai. Ara va erero paparaehakive leikila. Ekela, ara aro Egypt paraeakilai.

³⁵ Ma Moses ere haure leipe: ere are v'ila maeape, Aro akea haela i heheavaki haela leita leipe? Huakara ve areve oropa ve ekepe la aneru ve mai v'ila Aualari arero akea haela i ovokake leiki haela leikive le paraeape.

³⁶ Ma haela oropa ihova i horahora leiki eharu Egypt i Ahea Ma Ovoka hoa ve leivahaeai aireaki are erero kari aupe.

³⁷ Ma va la Moses — are kai Israel akoremari maeaeape, Peroveta ara hovea Aualari eve apavara v'ila lai urapakilai.

³⁸ Ma haela, i arero Sinai kela ve oharo maeape la aneru ila hareho i elaviilave vilali haela ila, huakara ve ekalesia apearoape: are ovokake oharo iapape ehovea elaro aikiarakive.

³⁹ La oharo elaviilave houva haela au iapaila, aka arero haure lei avakai ikihelari Egypt ve mai ikivere leivahaeape.

⁴⁰ Ere Aaron mari maeaeape, Ela v'ila kari auvahaelula harihu eharu karikikive. Ehovea elaro Egypt ve kari ekepe ma Moses ela v'ore ka are lehae laleila.

⁴¹ Ere la hoa boromakau mere karikipe, areve oropa elare maea morava leivahaeape, elare mai ve karikipe la eharu ve ere ikiveveke leivahaeape.

⁴² Aualari helari erero kaia ve eharu morapaeakive haitapape — peroveta buka oharo hape laria: Israel haela e, au haeape eharu i maea morava mai ila Huakara hoa hitolo 40 ve, e araro aikiarape ha?

⁴³ Ka — eva Moloch ve hehe haha aualari Remphan ve kou ila kailape. E karikipe la ihova ehovea momorapukive: Ara ero Babylon ve ukai ve kari aukilai.

⁴⁴ Elaviilave houva haela okoare ve hehe haha huakara ve avape. Are Moses maeape laria — are eavape la ihova hovea karikikive la hehe haha.

⁴⁵ Elaviilave Joshua ve hoa houva haela kara, elare ita havahu pekahavape hoa la haha avipekape. Aualari elaviilave houva haela ve oropa ve huikapai paraeape aiai David ve hoa.

⁴⁶ Are va Aualari ve oropa ve veveke leipe. Are Jacob ve Aualari ve uvi kukive ikivere leipe.

⁴⁷ Aka Solomon are v'ila Uvi kupe.

⁴⁸ Lae vi va — Akea Iele Aualari mai kupe la uvi ve aea va ka, peroveta haela maeape la oharo hovea.

⁴⁹ Arave terona kaia ve: Arave loa pavaki haha meahaiapo ve. E va ara v'ila le la hovea uvi kukilai ha? Arave iki paraeaki ita lahoa?

⁵⁰ Arave mai ma eharu oaria au karikila ha?

⁵¹ E iki pelaea i avako ipi hahuru haela. E va mea oaria ove veveke hahaure leilula; eve houva haela leivahaeape la mai e kara leivahaelula.

⁵² Eve vilali haela lela peroveta haela au haila ha? Oropaki mai ehoe haela ve ekeki oharo maeaeape la haela e haeape — e va ma hoa ereve hihila epaki haealula haela iele.

⁵³ E va aneru kileape la pupu kaivi kiva au leila.

Stephen ve apape hari

⁵⁴ Ere va ma oharo iapai iki heaha eapapo leivahaeai, are v'ila kao heheavape.

⁵⁵ Aka are Ove Veveke ila kaia ve ovohae iupei Aualari ve haharika i Iesu areve mai ore ukai ve epavila eavi mari maeaeape,

⁵⁶ “Iapaila — ara kaia hapai haela ve Akore Aualari ve mai ore ukai ve epavila eavave.”

⁵⁷ Ere āra eapapo hai avako kokaukavahaeai vivila arero mai paeape.

⁵⁸ Ere arero karikara mahokaea ve huikapai paraeai have koavape. Are v'ila vavavape la haela ereve pura, haela rare Saul ve loa ipi ve aipevahaeape.

⁵⁹ Ere Stephen have koavape. Are Amua itavi mariape “Amua Iesu — arave ove kaivaki.”

⁶⁰ Are loa ari haiavi āra eapapo mari hape, Amua, ma haeae ve kavale erero kavararue. Are mari avi le apape.