Horova 6 - Pupu Oharo Āre 1963 Genese 1970 Rute 1972

Diakono haela 7 hareavape

¹ Ma hoa iki kelavape haela oaria iele leivahaeape, Greek haela uku Jew haela hihiri leivahaeape, ehovea hare oaria eapai meru hamureape la haela, ereve uavila maitava uku iki au kekelaila.

² Haela 12 iapavahaeaki haela oaria korukai mari maeaeape, Hovea ka, ela Aualari ve oharo arive horova hakurepa eapai horova leikive.

³ Laelave, apavara, eve haela 7 haropaki, mai ehohoe haela, Ove i ikiore la haela 7: ela erero mai horova kiva leikive maeaeakilai.

⁴ Ela va ivaiva i iroro arive la horova kiva auhohi leivahaeakilai.

⁵ Haela oaria la oharo ikivere leipe. Ere hareavape haela ae va Stephen, ikikekela aheke i ove veveke ila haela, aeva Philip, i Prochorus i Nicanor i Timon i Parmenas i Nicolas, Antioch ve Judea mai leivila haela.

⁶ Ere ma haela aposetolo haela ve oropa kari ekevahaeape: ere ere v'ila ivaiva leivahaeai mai koharape.

⁷ Aualari ve oharo aheke lei Jerusalem apealula kilea haela maeakoko leivahaeape. Oharo haela perehekai oaria kara iapai iki kelavape.

Haela Stephen hahari leipe

⁸ Stephen Aualari ve iki aheke ila ihova i horova ehoaha oaria haela v'ila leivahaeape.

⁹ Uku synagogue haela, ereve hiru rare Libertines, i Cyrene Jew haela uku, i Alexandria Jew haela i Cilicia Jew haela i Asia Jew haela ila — Stephen oharo hahari avahaeape.

¹⁰ Ereve la hahari oharo areve iki ore i ove ila heaorapakive hovea au leila.

¹¹ Laelave ere haela uku kari ekevahaeape ehovea mari maeaeakive, Ela va iapape are Moses i Aualari v'ila o heaha maeaeape.

¹² Ere karikara haela i haela hoaha i hohoa haealula haela kurupaeape, ehovea arero mai pai council ve oropa ve lai ekekive.

¹³ Ere haela uku kari ekevahaeape, ehovea opore oharo vavavakive maria, Ma haela mea oaria ma hehe ita i pupu ila o heaha avila.

¹⁴ Ehovea ela areve oharo iapape maria, Ma Iesu Nazareth haela ma ita kopararapai Moses elaro aiarape la pupu veveke koelarikilai.

¹⁵ Council avape haela oaria areve oropape aneru ve oropape hovea hovea eavape.