Horova 5 - Pupu Oharo Āre 1963 Genese 1970 Rute 1972

Ananias i Sapphira ila

¹ Haela ae rare Ananias i uva Sapphira ila kekele uku ilaea leipe.

² Kavale uku are muruhari elare aipepe, areve uva kara ore leipe; are uku hiki aposetolo haela ve loa ipi aipepe.

³ Aka Peter mariape, Ehovealeve Satan ave iki ure lakileaila Ove Veveke amuraeakive, kekele ve kavale uku elare muruhari aipekive.

⁴ Oropa, ilaea au leila la hoa, are va ave eharu, ava ilaea leipe la hoa kara a paeape la kavale are ka ave eharu ka ha? Ehovealeve a va ma horova ikikekelape ha? A va haela au amuraeaila — a va Aualari lamuraeaila.

⁵ Ananias ma oharo iapai mea ve hilai le apape. La oharo iapavahaeape haela oaria oaoka eapapo leivahaeape.

⁶ Harokou haela uku urai arero pura kohahai, mea ve oraiavi ai karu le ihape.

⁷ Haiapo ka, areve uva kara ekepe — are la horova haveva.

⁸ Peter arero apevelavela leipe, Araro kimaeaki — E va kekele ilaea lei maria kavale avape ha? Are kavale maeape, E, kavale laria.

⁹ Aka Peter arero maeape, Ehovealeve ealila elarelare oharo hukavi Amua ve Ove amuraeakive ha? Iapai, ave vila karu lihaila la haela ve loa okiape mahokaea ve apearo — ere aro kara oraiavi aukilai.

¹⁰ Are hoa haroapo areve oropa ve hilai le apape. Harokou haela iki arero huru aeavila eavi, arero mea ve oraiavi ai areve vila i hareho karu ihape.

¹¹ Ekalesia hareho ma eharu ore leivahaeai oaoka eapapo leivahaeape.

Aposetolo haela ve iahova i horova hoaha

¹² Ihova i horova lahualahua oaria aposetolo haela ve mai v'ila leivahaeape. Ere oaria hareho Solomon ve okiape la kavu hareho korukaiavahaeape.

¹³ Karikara haela oaria ere i hareho auvahaeaki oaoka leivahaeape, aka haela oaria erero momorapupe.

¹⁴ Iapavahaeape haela oaria Aualari rare iki kelavape, vilahoaha i uavila ila hareho.

¹⁵ Laelave ere maea heahaha haela kile i haha ila okiharo ve oraiavi auvahaeape, ehovea Peter ve heaorapaki hoa areve hare ve ove ereve uku haela aerakive.

¹⁶ Jerusalem maeamaea la karikara haela oaria kai maea heahaha haela i ovehahu ila haela oaria kari ekevahaeape. Ere oaria maea mekaka leivahaeape.

Peter i John ila aeka Amua haela oropa ve

¹⁷ Aka akea oharo haela i are i hareho apearoape la haela (ere va Sadducee haela) urahukai ikiheaha leivahaeape.

¹⁸ Ere aposetolo haela mai papaehai uvi muru paparaehape.

¹⁹ Amua ve aneru oroa hoa uvi muru okiape hapai erero kari kihoai mari maeaeape,

²⁰ E v'ai Hehe Uvi epavi haela oaria ovokake oharo iroro arive.

²¹ Ere ma oharo iapai, mea opape hoa ere Hehe Uvi pekahavi haela oaria kileavahaeape. Aka Akea oharo haela i are i hareho loape haela, elare council haela i Israel akoremari ve council ila korukaiavahaeai, haela uku uvi muru paparaehai erero kari ekevahaeakive.

²² Aka ere paparaehape la haela erero uvi muru au eavaila, laelave ere helari ai mari maeaeape:

²³ Ela uvi muru aheke kolakaukaila laeavila, kiva haela kara okiape mahokaea ve lapeaila: aka ela okiape hapai ureve haela va au koaraila.

²⁴ Hehe Uvi kapena haela i oharo haela ila ma oharo iapai, horahora eapapo leivahaeape, ehovea ma eharu eapapo havahu leiki ave.

²⁵ Haela haroapo iki leia erero mari maeaeape, Iapai, e uvi muru lapaparaehaila la haela Hehe Uvi haela oaria kileavahaelula epavaro.

²⁶ Kapena haela i areve koarai haela ila auvahaeai erero hahari hahari kari ekevahaeape, ehovea ere oaoka haela oaria erero have koavaki ave.

²⁷ Ere erero kari iki council haela oropa ve aipevahaeape. Akea oharo haela erero mari maeaeape,

²⁸ Ela ero ape karava maeaeape, ma rare v'ila kakileavahaelue. Iapai, E va eve kilea oharo Jerusalem heloe le koape. E va ikivere ma haela ve apu ve haeae mehau ela hiki avakive ha?

²⁹ Aka Peter i aposetolo haela ila kavale maeaeape, Ela va haela ve oharo iapa ka — Aualari ve oharo hiki.

³⁰ Elave vilali ve Aualari Iesu lai urapape — e va arero kora akea ve avikai hape.

³¹ Aualari areve mai ore v'ila arero morapaeai, Amua i Ovokake avaraki haela leikive, ehovea are v'ila Israel haela ve haeae ve ikihuru lei hapururukakilai.

³² Ela ma eharu vavahaelula, Aualari iapailula haela avarape la Ove Veveke kara.

³³ Ere ma oharo iapai hihiri eapapo leivahaeai erero haeakive ikivere leivahaeape.

³⁴ Aka haela ae va rare Gamaliel, haela oaria morapaeape pupu kilea haela, council ureve uroupe. Are erero la haela mahokaea ve paparaehakive maeaeape.

³⁵ Are erero maeaeape, Israel haela oaria, e kiva leila, e ma haela learia leivahaeakive.

³⁶ Ehovea overa hoa Theudas urai maea pelaea leipe — haela 400 arero koarai auvahaeape. Are apape, kai arero koarai auvahaeape la haela le titavi kari le leivahaeape.

³⁷ Aireaki Judas Galilee haela, kavana rare haeape la hoa, urai haela uku kara kari auvahaeape. Are kara apape: areve oharo iapavahaeape haela kara le titavape.

³⁸ Laelave ara ero maeaeaive. Ma haela kavale kalaivahaelue, ereve ikikekela i horova ila haela v'ila la leikilava, are kari leikilai.

³⁹ Aka are va Aualari ve la lailava, e va erero hereavakive hovea lei va ka, e va Aualari hahari leiki ave.

⁴⁰ Ere areve oharo iapape. Ere aposetolo haela itavi haru hai, ape karava maeaeape, Iesu ve rare kakilealue, kai erero paparaehape.

⁴¹ Laelave ere oaria council hakurepai ikiveveke eapapo leivahaeape ehovea Aualari erero rare v'ila kakare leikive hovea kekelape.

⁴² Hare oaria ere Hehe Uvi ve i elare uvi ve Iesu va Keriso iele oharo auhohi kileavahaeape.