Horova 4 - Pupu Oharo Āre 1963 Genese 1970 Rute 1972

Peter i John ila Amua haela oropa ve

¹ Ere haela oaria oharo maeaeape la hoa, oharo haela i Hehe Uvi ve kapena haela i Sadducee haela ila ereve leia ekevahaeape.

² Ere va ikihairihairi leivahaeape ehovea ere haela oaria Iesu v'ila api kai urouki oharo kileavahaeape.

³ Ere erealilara mai papaehai uvi muru oroa ve paparaehape, ehovea mea hailaea iele.

⁴ Lae vi va oharo iapavahaeape haela oaria iki kelavape: la haela oaria 5,000 hovea.

⁵ Iapai, la opoa hare ereve amua haela i haela hoaha i pupu haealula haela,

⁶ Annas, akea oharo haela, i Caiaphas, i John i Alexander i akea oharo haela ve apavara oaria ila hareho Jerusalem korukaiavahaeape.

⁷ Ere erealilara aru hihi aipevahaeai velavela mari leivahaeape, E va le aheke v'ila kai le rare v'ila ma horova laleila ha?

⁸ Ove Veveke Peter ve iki heloekoape. Are erero mari maeaeape E amua haela i Israel haela ve haela hoaha:

⁹ E va elalilara la heheavakilava, ela va ma maea heaha haela laleila horova veveke v'ila, are maea mekaka learia laleila:

¹⁰ E oaria ore leivahaeaki — Israel haela oaria kara, Aualari apape hoa lei urapape la Iesu Keriso Nazareth haela ve rare v'ila, kaire, are havahu v'ila, ma haela eve oropa ve maea aheke ila epavave.

¹¹ E uvi kupe haela hahaure leipe la have ma, are va uvi ve ihau aheke le leipe.

¹² Ae va haela ae ovokake avara va ka: ehovea kaia ve ihau ve elaviilave ovokake leiki rare aeva karia.

¹³ Ere Peter i John ila ve aheke ovohae eavi ore leivahaeape erealila va iki ore eapapo haela ka, laelave ere va ikihorahora eapapo leivahaeai ore lei, erealila Iesu i hareho veavelaripe.

¹⁴ Ere kara maea veveke leipe la haela ere i hareho epavila eavape, laelave ereve oharo kari le leipe.

¹⁵ Ere erero council ve mahokaea ve paparaehai elarelare oharo hukavape:

¹⁶ Elaviila ma haela leari leivahaeakilai ha? Ehovea erealila laleila la horova Jerusalem apealula haela oaria ore laleila. Elaviila la oharo kokaukakive hovea ka.

¹⁷ Aka haela oaria la horova ore leiki ave, elaviila erero aihukamaeakive — ere aireaki haela ae ma rare v'ila kilea va arekaea.

¹⁸ Ere erealilara itavi ape karava maeaeape erealila Iesu ve rare v'ila oharo kahukavalue, kai iroro kailue.

¹⁹ Aka Peter i John ila erero kavale maeaeape, E havahu heheavaki — Aualari ve oropa ve leari ehoe — eve oharo iapakive, aka Aualari ve oharo iapakive ha?

²⁰ Ehovea elalila ovohae eavape kai iapape la eharu elalila hihika maeaeakilai.

²¹ Ere erealilara kai aihukamaeai paparaehape, ehovea ere va erealilave kavale leikive haeae au koaraila, ehovea ere karikara haela oaria oaoka leivahaeape, ehovea haela oaria erealila leipe la horova v'ila Aualari morapaeape.

²² Ehovea la maea veveke leipe haela va hitolo 40 aeva kepea.

Peter i John ila elare apavara leia hoahukape

²³ Erealilara paparaehape la hoa erealila apavara ve leia auvahaeai oharo haela i haela hoaha ila maeaeape la oharo kileavahaeape.

²⁴ Ere oaria la oharo iapai ere hareho Aualari ve rare morapaeape maria, Amua a va Aualari, kaia i meahaiapo i ahea ma i ereve eharu oaria ila hareho karikivahaeape Aualari.

²⁵ A va ave horova haela David ve ape v'ila maeape: Ita lahua haela hihiri leivahaelula ehovea leve, Kai haela oaria iki naoae naoae kelavalula.

²⁶ Meahaiapo ve amua urahukape Amua haela oaria hareho Amua i areve Keriso ve hahari leikive Korukaiavahaeape.

²⁷ O iele, Herod i Pontius Pilate i ita lahua haela i Israel haela oaria ila hareho a hariripe la hehe akore Iesu hahari arive korukaiavahaeape.

²⁸ Ehovea a oropa kekelape la horova ere leivahaeape.

²⁹ Amua e, ereve hihiri oharo a iapaki. Ave horova haela ave aheke avaraki, ehovea ave oharo karava arive.

³⁰ Ave mai avihorapai haela lei makukurikive. Ave hehe akore Iesu ve rare v'ila, horova eapapo veveke hela leiki.

³¹ Ere ivaiva lei hareho korukaiape la ita lalaeapape. Ove Veveke erero oaria iki heloekoavape. Ere kara Aualari ve oharo ape aheke v'ila hukavavahaeape.

Eharu oaria herehere

³² Iki kelavape haela oaria iki ove ila haroapo hovea leivahaeae. Ere elare eharu oharo au maeaila — ere va eharu oaria herehere leivahaeape.

³³ Apostolo haela aheke havahu leivahaeai Amua Iesu apai kai uroupe la oharo vavavahaeape: ere oaria ikihuru eapapo ila apearoape.

³⁴ Ere oaria eharu kari v'ila heraho au leila, ehovea kekele i uvi ila la haela la eharu ilaea leivahaeai, la eharu ve kavale aikepe,

³⁵ Aposetolo haela ve loa ipi ve aipevahaeape. Ere haela oaria mae a hovea hamuri aiarape.

³⁶ Joses, aposetolo haela rare itavape rare Barnabas (La rare ve iele ‘Ikihuru ve Akore’), Levite haela i Cyprus hiru ve ekepe haela,

³⁷ areve kekele ilaea lei moni aviki aposetolo haela ve loa ipi ve aipepe.