Horova 12 - Pupu Oharo Āre 1963 Genese 1970 Rute 1972

Herod Ekalesia haela hararuape: Peter uvi muru ve kihoaupe hari

¹ La hoa hovea Herod amua ikivere ekalesia haela uku hararuakive.

² Are James ve akoreapo John lelao hape.

³ Are eavi Jew haela la mai v'ila ikiveveke leivahaeape, are Peter kara hareavape — La va muramura aue pai ve hurai hoa.

⁴ Are arero kaivi uvi muru paraeai hevehe haela ve hiru 4 kiva leikive avarape. Areve ikikekela hurai kari leiki la hoa arero haela oaria avarakive.

⁵ Ere Peter uvi muru kokauka kiva leipe, aka ekalesia haela oaria hareho Aualari are v'ila ivaiva leivahaeape.

⁶ Oroa aea Herod arero lai kihoaukive kekelape, la oroa, Peter hevehe haela orahokaila ve aru hihi ve auri horou ila hahai uavape. Kiva hevehe haela okiape oropa ve epavi kiva leipe.

⁷ Iapai, Amua ve aneru are i hareho pavape: ovava kara lalava heaoapape. Are Peter kararapi koa hurapai maeape, Elavelave urou. Areve auri horou kara areve mai ve helauka hohoape.

⁸ Aneru arero maeape, Erekai hopa hahai, loa iilu oreuvahaeaki. Are lari leipe. Are arero maeape, Ave maea pura kohahai arave airekai ekeki.

⁹ Are areve aire aupe. Are va horahora aneru leipe la horova iele la, aka ivahi hiki.

¹⁰ Erealila ure kiva leipe haela i mahokaea ve kiva leipe la haela haitapai karikara horeraki la okiape ve le kihoaupe. La okiape erev'ila hapape, haela au leila, erealila mahokaea ve hoahuka — aneru arero elavelave harepape.

¹¹ Peter iki auhohi kekelape la hoa — are maeape, Ara v'ore iele, Amua aneru lakiparaeaila, ehovea araro Herod ve mai ve i Jew haela oaria ve ikivere ve hareavakive.

¹² Are lari kekelavila, Mary, John rare aeva Mark, ve lou ve uvi ve aupe. La uvi haela oaria ivaiva leivila korukaiavahaeape.

¹³ Are okiape kokoea, mari hekai rare Rhoda iapakive ekepe.

¹⁴ Are Peter ve āra iapai ore lei ikiveveke lei okiape au hapaila, are uvi ureve harava pekai erero maeaeape — Peter okiape mahokaea ve epavape.

¹⁵ Ere arero maeape, A va ikihaveva iele — aka, are ape aheke maeape, Are va iele la. Ere maeape, Areve aneru la.

¹⁶ Peter au hiki kokoeape, laelave ere okiape hapai arero eavi ikihorahora eapapo leivahaeape.

¹⁷ Aka are erero mai larua ereve oharo oaria la haerapai, erero Amua arero uvi muru lai kihoaupe la oharo maeaeape. Are kai maeaeape — ma oharo James i apavara oaria maeaeaki. Are leia harepai ita lahua hoaupe.

¹⁸ La opoa vevelare havahu hevehe haela oaria va horahora leivahaeape ehovea Peter learia leipe la.

¹⁹ Herod arero haropi au koaraila, laelave are kiva haela heheavi erero huru haeakive maeaeape. Are Judea hakorepa Caesarea ve leia hoai aeaveape.

Herod apape hari

²⁰ Herod Tyre i Sidon ila haela hihiri leivahaeape. Ere hoa haroapo iki areve leia hoahukape. Ere Blastus, amua ve uvi kiva haela, kake lei havila leikive velavela leipe, ehovea ereve eapai avaki ita la amua ve ita.

²¹ Herod oropa maeaeape hare elare maea maupa pura veveke oreuvahaeai, terona akea pekai, erero oharo eapapo ape.

²² Haela oaria āra maria hape, Haela ve āra ka, Aualari ve āra la.

²³ La hoa haroapo Amua ve aneru arero koape, ehovea are Aualari au morapaeaila; areve maea hehe lala, are le apape.

²⁴ Aualari ve oharo aheke lei ikikekela haela oaria leivahaeape.

²⁵ Barnabas i Saul ila Jerusalem ve horova karia lei helari auvahaepe. Ere John, rare aeva Mark, lai aupe.