Horova 10 - Pupu Oharo Āre 1963 Genese 1970 Rute 1972

Peter i Cornelius ila

¹ Haela ae Caesarea aeaveape — areve rare Cornelius — are va Italia hevehe hiru aeva kapena.

² Are hehe haela iele, are Aualari oaoka lei kekela merava haela meru oaria aiari mea oaria ivaiva kiva auhohi leipe.

³ Are ivahi hoa, hare 3 o’clock hovea, Aualari ve aneru areve leia ekevila hihika eavape. Aneru areromaeape, Cornelius!

⁴ Are arero eavi oaoka lei mariape, Amua, le ha? Are arero maeape, Ave ivaiva i meru oaria ila aro morapaeaki — Aualari ve leia pekape.

⁵ A haela uku Joppa paraeaki Simon rare Peter lai ekekive.

⁶ Are Simon loa iilu hahavila haela ve mirikoaka uvi aeavila.

⁷ Arero oharo maeape la aneru hoaupe la hoa, are uvi horova haela orahoka i areve horova koaravila mai ehoe hevehe haela ila itavavahaeape.

⁸ Are oharo oaria erero kileai Joppa la paparaehape.

⁹ La opoa hare, ere hahi auvahaeai karikara maeamaea ve ekevahaeape la hoa, Peter uvi akea ve ivaiva arive pekape — hare hihi hovea.

¹⁰ Are eroa ha eapai ikivere leipe. Aka ere eapai karikipe la hoa are avuku i ivahi eavape.

¹¹ Are kaia hapai eharu eara eapapo hovea kaokao hahai akea ve kihoauvila eavape.

¹² Areve ureve loaloalula i hai vealula eharu i kaia ve ori oaria ila apearoape.

¹³ Ara kaia ve ha arero maeape, Peter, urou, eharu hai lela.

¹⁴ Aka Peter maeape, Amua, arekaea, ehovea ara va eharu lahua aka hirihiri le va haveva.

¹⁵ Ara aeka arero maeape, Aualari veveroro leipe la eharu, lahua oharo kamaealue.

¹⁶ Ma horova hoa 3 leipe — eara kai elavelave kaia ve le lai pekape.

¹⁷ Peter va ikihorahora eapapo are eavape la eharu ve iele le; la hoa Cornelius Simon ve uvi ve velavela leikive kiparaeape la haela iki okiape mahokaea ve epavape.

¹⁸ Ere āra hai velavela leipe — Simon rare aea Peter la haela la uvi aeavila ha?

¹⁹ Peter ivahi ve eavape la eharu ikikekelape la hoa Ove arero maeape, Iapai — haela ilehoila aro haroparo.

²⁰ Urou, ipi hoai ere i hareho aukive, ikihorahora kalailue, ehovea ara erero paparaehape.

²¹ Peter hoai la haela eavi mari ape, Eavaila, e haroparo la haela, ara ma. E va leve leikevahaeaila ha?

²² Ere maeape, Cornelius — mai ehoe i Aualari ve oharo iapavila haela, Jew haela oaria morapaealula haela, Aualari ve aneru au maeape — are aro areve uvi ekekive maeakive, ehovea ave oharo iapakive.

²³ Laelave Peter erero uvi ve auhohi leivahaeape. La opoa hare are urai ere i hareho auvahaeape. Joppa apavara uku kara erero koarai auvahaeape.

²⁴ Avea hare ere Caesarea pekahavape. Cornelius i apavara haela oaria ila erero karipe.

²⁵ Peter uvi pekape la hoa Cornelius iki areve oropa ve ekaopi morapaeape.

²⁶ Peter arero lai urapai mari maeape, Urou, ara kara haela.

²⁷ Are oharo hukavila uvi pekai au korukaiape la haela oaria eavape.

²⁸ Are erero maeaeape, E va ore Jew haela ita lahua haela koarai aeakive pupu eapapo leipe. Aka Aualari araro mari kileape ara haela aeva merava aka hirihiri oharo maea va arekaea.

²⁹ Laelave ara ikihairihairi au leila, eve oharo iapai le ekepe. Ara ero velavela leive, Ehovealeve e araro itavape?

³⁰ Cornelius maeape, Hare 4 kari mave leive, ara hare hoa 3 o'clock elare uvi ivaiva kiva leipe. Iapai — pura veveke haela ae arave oropa ve epavi,

³¹ mari maeape, Cornelius, ave ivaiva overa iapai, ave meru oaria Aualari iki le kelavape.

³² Haela Joppa paparaehaki, ehovea Simon rare aea Peter itavakive: are Simon loa iilu hahavila haela ve mirikoaka uvi aeavila.

³³ Laelave ara haela elavelave paparaehape: a va veveke leipe ehovea a elavelave ekepe. Ela oaria va Aualari oropa mave korukaeaive ehovea Amua aro maeape oharo iapakive.

Peter ve iroro oharo

³⁴ Peter ape ha mari ape, O iele, ara va ore lei Aualari haela oaria hoveahovea kelavila.

³⁵ Are vilaipipi oaria ve arero kelavalula haela i mai ehoe leilula haela oaria ikivere leivahaevila.

³⁶ Are Israel akoremari ve paraeape la oharo veveke, ehovea Iesu haela oaria ve Amua, havila veveke avikepe la iroro oharo, e kara ore leivahaeape.

³⁷ Ehovea la oharo Judea ita oaria kopurapape, Galilee hoa, (John kileape hoa oropa), Iesu Nazareth haela kai kileape.

³⁸ Ehovea Aualari arero Ove Veveke i aheke ila paraeape. Are ita oaria horova veveke leivila veavelaripe, ovehahu ila la haela iki ovava leivahaeape, ehovea Aualari are i hareho veape.

³⁹ Are Jew haela ve ita oaria i Jerusalem ila leivahaeape la eharu oaria ela ka vavavaki haela. Ere arero kora akea ve avika huru le hape.

⁴⁰ Aualari arero hare 3 hoa lai urapape, kai arero haela hihika eavakive avarape;

⁴¹ Are haela oaria eavakive au avaraila, are ikivere leivahaeape vavavaki haela hiki, Kaire, ela ma, ela areve apai kai uroupe hoa are i hareho eapai i ma ila lalavahaeape.

⁴² Are elaro ape karava maeaeape, haela oaria la iroro arive, kai are Aualari ovokake i apihaeape haela ve heheavaki haela leipe la oharo vavavakive.

⁴³ Are v'ila peroveta haela oaria vavavalula ehovea areve rare v'ila ikikekela haela oaria ve mai heahaha le hapurururukakilai.

Ita lahua haela Ove Veveke i Bapatiso mai ila avape

⁴⁴ Peter ma oharo avi areve oharo iapavahaeape haela oaria Ove Veveke le avape.

⁴⁵ Peter i hareho ekevahaeape ikikekelalula Jew haela va ikihorahora eapapo leivahaeape, ehovea ita lahua haela kara Ove Veveke la meru le avape.

⁴⁶ Ehovea ere ma haela uri lahua oharo hukavalula i Aualari momorapulula iapavahaeape.

⁴⁷ Peter kavale maeaeape, Elaro leita hereavakilai ela ma haela ma v'ila bapatiso leivahaeakilai ha, elaro leivahaeape la bapatiso hoveahovea.

⁴⁸ Are ape karava mari ape erero Iesu Keriso ve rare v'ila bapatiso leivahaeakilai. Ere arero hare uku ere i hareho apeakive velavela leipe.