Horova 1 - Pupu Oharo Āre 1963 Genese 1970 Rute 1972Hapaki oharo 1 Theophilus e, Iesu leivahaeape kai kileavahaeape la eharu oaria ara oharo overa hape, 2 Aiai are Ove Veveke v'ila are hareavape la aposetolo haela oaria areve pupu kileavahaeape kai kaia akea le pekape. 3 Are elare apai kai urai ovokake leipe la maea are hoa oaria hihika amoeape — hare 40 are ereve oropa ve kihoreavila kai Aualari ve basileia oharo ere v'ila hukavavila. 4 Are ere i hareho korukaiavahaeai erero ape karava maeaeape Jerusalem hakorepa va arekaea, aka Oa ve okoare la kariki, are erero overa maeaeape la eharu. 5 Ehovea John ma v'ila bapatiso leipe, aka haiapo ka e va Ove Veveke v'ila bapatiso leivahaeakilai. Iesu Kaia ve pekape hoa 6 Laelave, ere korukaiavahaeape hare aea arero velavela maria leivahaeape, Amua, a va ma hoa ave basileia Israel haela kai avarakilai ha? 7 Are erero kavale maeaeape, Mea i hoa ila e v'ila kileavahaea va ka. La eharu Oa ve aheke v'ila hiki aeavila. 8 Aka Ove Veveke e v'ila kihoreraki la hoa ero aheke la aiarakilai. E va Jerusalem i Judea i Samaria ila hareho ara v'ila vavavakilai aiai meahaiapo ve ukai ukai. 9 Are ma eharu avi ereve oropa ve le pekape. Meuru kai arero aerape — ere arero aireaki au eavaila. 10 Ere ovohae kaia ve eavape la hoa, iapai, pura houhuka ila haela orahokaila ere i hareho epavape. 11 Erealila erero maeaeape, E Galilee haela kaia ve lela eavaro ha? Ma Iesu, eve oropa ve lai pekape la haela, aireaki hoa e arero kaia ve pekavila laeavila, laria kai kihoaukilai. Aposetolo haela aea are hareavape 12 Ere Olivet kela hakorepai Jerusalem aeka hoahukape. Olivet kela va Jerusalem ila apehai ka — sabati hare haroapo ve loa la. 13 Ere uvi ve akea lalava pekahavi apeape. Peter i John ila, James i Andrew ila, Philip i Thomas ila, Bartholomew i Matthew ila, James Alphaeus ve akore, Simon Zealot i Judas James ve akore ila. 14 Ere oaria hareho i uavila i Mary, Iesu ve lou i areve apavara ila hareho ivaiva kiva leivahaeape. 15 La hoa Peter apavara oaria oropa ve uroupe (leia korukaiavahaeape haela va 120 hovea). 16 Are maeape, Apavara, hoveahovea overa hape buka oharo iele la horerakilai, Ove Veveke oropa hoa David ve ape ve Judas v'ila maeape, Iesu mai paeape la haela ve kari auki haela: 17 Ehovea are ela i hareho korukaeai ma horova herehere leipe. 18 (Ma haela areve haeae ve kavale v'ila kekele uku ilaea leipe. Are va la ita hihi ve au hilaupe, areve maea kohauarai e hihi ve horerape. 19 Jerusalem apearoape haela oaria ma oharo iapape, laelave ere la ita ereve uri ve rare itavape Akeldama, la oharo ve iele — apu ve ita.) 20 Ehovea Psalm buka ma hohoa hape: Areve uvi hauaka leikilai, Haela areve leia kaealue. Kai oharo aeva ma, Areve horova ita haela ae avakilai. 21 Laelave Iesu ela i hareho loaloape la hoa elaro iele koaravahaeape la haela oaria, 22 John ve bapatiso leipe hoa aiai Iesu akea pekape la hoa, la haela v'ila haroapo hareava, ehovea are ela i hareho areve apai kai uroupe la oharo vavavakive. 23 Laelave ere haela orahokaila hareavape — Joseph, itavape Barsabas, rare ae Justus, aeva Matthias. 24 Ere ivaiva lei mariape, Amua, a haela oaria ve iki ureve ore. 25 A va ma haela orahokaila v'ila elaro amoeakive, ehovea are Judas, au hilaupe kai elare ita aupe la haela ve horova ita avakive, ma horova i aposetolo mai ve leikive. 26 Ere rare ve koai koape. Matthias ve rare hihika leipe. Laelave are i haela eleven ila hareho mureape. |
Published by the British and Foreign Bible Society 1963-1972
British & Foreign Bible Society