Hebrew 9 - Pupu Oharo Āre 1963 Genese 1970 Rute 1972

Overa hehe ita, hehe ita are hovea

¹ O iele, oropa la okoare are va morapaeaki pupu ila, kai meahaiapo hehe uvi ve.

² Oropa hoa ere hehe uvi kupe. La hehe uvi ve eharu ma — Hehaā, haha, hehe pai — la va hehe eharu la.

³ Ureve lalava va hehe havahu la ita.

⁴ Are va gold arura haha, kai okoare ve la maua iele, gold ve maupa leipe — areve ureve manna uku aeaveape — kai Aaron ve la haru, overa hoa pupuri horerape la haru, kai okoare ve la have hohoa.

⁵ Areve akea ve haharika ila la Cherubim apearoape, ereve maho ikihuru haha aerape. Ma eharu oaria v'ila elaviila oharo oaria hukava va ka.

⁶ Ma eharu oropa leivahaeape hoa, Oharo Haela oropa la lalava Aualari ve horova leikive pekahavape.

⁷ Aka ureve lalava Akea Oharo Haela lahua pekape, hitolo haroapo hoa haroapo hiki. Are va apu meru ila pekape, la meru ehovea are i haela oaria ve haeae hapururukakive.

⁸ Ove Veveke maria kirive: Oropa lalava laeakilava, ureve la lalava haela oaria ve pekaki oki karia.

⁹ La va ma hoa ve ihova kara — ehovea ere leivahaeape meru i maea morava mai oaria ila, la horova leipe haela iki ureve mekakure au leila.

¹⁰ Ehovea la eharu va eapai i ma ila hiki, maea huhelaki mai, maea ve horova hiki, pupu hovea leivahaeape aiai Okoare are ve hoa.

Keriso ve maea morava mai haela oaria lei veveroro leivila

¹¹ Aka Keriso, okoare mekakure āre ve Akea Oharo Haela iele, eapapo iele la lalava, haela ve mai ve au karikikila la lalava, (o iele ma hoa ve hehe uvi la) are araeape.

¹² Are araeape iele; goat i boromakau mere ila ve apu au laila, aka are elare apu v'ila hehe ita iele pekape. Laelave ovokake haiapo kara are elaro avikiarape.

¹³ Boromakau mea i goat ila ve apu, kai a veape mere ve aivau, mai haeae haela ve heaha la hapururukakilava.

¹⁴ O iele Keriso ve apu elaviilave iki ureve veveroro leivahaeakilai aiai elaviila ovokake Aualari ve horova iele leivahaeakilai: ehovea Keriso Ove Veveke ve la okiharo elare maea veveroro hiki meru hovea avarape.

¹⁵ Are va okoare are ve leiki haela, ehovea areve apaki maea, oropa la okoare ureve la hahaeae oaria hapururukape; laelave au itavavahaeape la haela ovokake haiapo la okoare avakilai.

¹⁶ O iele, haela okoare arilai, kai le apakilai.

¹⁷ Haela la apakilava, areve la okoare haeae lei va ka. Are haeae la leikilava, o iele areve ovokake hoa kara are iele karia.

¹⁸ Laelave Aualari ve oropa okoare apu v'ila huape.

¹⁹ Ehovea Moses oropa pupu oaria haela oaria kileavahaeape, aireaki are boromakau mere i goat ila ve apu, ma, kai pura ovoka, kai hyssop, kailape. La eharu are buka i haela oaria ila koape.

²⁰ Are erero maeaeape, Ma va Aualari ero avarape okoare ve apu ihova ma.

²¹ Are kai hehe ita kara apu koape, areve hehe eharu oaria kara.

²² Eharu perehekai oaria ve pupu maria — apu v'ila huhelakive: apu karia la leikilava, haeae ve hapururukaki oki karia.

Areve la maea morava mai mekakure iele

²³ Laelave, veveke ma — ma meahaiapo ve ihova oaria ma eharu v'ila lei veveroro leivahaeakive heroe. Aka kaia akea ve la eharu va maea morava mai mekakure avakilai heroe.

²⁴ Ehovea Keriso mai ve kupe la hehe ita au pekaila — are va o iele la eharu ve ihova hiki, are kaia akea iele pekape; leia are Aualari ve oropa ve, elaviila ve.

²⁵ Keriso elare maea hoa oaria maea morava mai lei va ka, meahaiapo la Akea Oharo Haela hehe ita hitolo haroapo hoa haroapo pekape la mai hovea, eharu ae va apu v'ila.

²⁶ Laria are va meahaiapo avare koare karikipe hoa ikiki ma hoa kakare hoa oaria leipe — aka ma meahaiapo karia leiki hoa, Are va hoa haroapo hiki pekape, ehovea areve kakare v'ila haela oaria ve mai heahaha hapururukakive.

²⁷ Hovea hovea, haela oaria va hoa haroapo apihaeakilai, kai heheavaki hoa eavakilai.

²⁸ Laria, Keriso hoa haroapo hiki apape, ehovea haela oaria ve mai heahaha ve mehau kaivakive. Arero iele haropalula la haela, are va aireaki hoa haroapo mai heaha karia ila, ereve oropa ve hihika lei ovokake avarakilai.