Hebrew 8 - Pupu Oharo Āre 1963 Genese 1970 Rute 1972

Keriso va Akea Oharo Haela, mai mekakure ila, Judea oharo haela la hovea ka

¹ Elaviila hukavalula oharo ve iele ma: Elaviilave Akea Oharo Haela ma: Are va Kaia Akea ve la terona mekakure ve mai ore ukai ve haiavavila.

² Are va Hehe Ita ve haela; la ita Aualari kupe hehe ita iele, haela va au leila.

³ Oharo Haela oaria ve horova aeva ma: hehe ita meru paparaehakive. Laelave ma haela kara meru mekakure avarakilai.

⁴ Are va meahaiapo laeakilava are lahovea horova lei va ka, ehovea la horova leivahaeaki oharo haela le apearo, pupu ve la mai hovea.

⁵ Ereve horova kaia ve la iele ve ihova hovea hiki. Hoveahovea, Aualari Moses maria kileape — are hehe kovo uvi kekelape la hoa: Aualari arero maeape, Kiva leiki — ara kela ve leia avarape la ihova hovea, eve hehe uvi kukive.

⁶ Aka ma hoa areve kaia ve la horova va mekakure iele, Are va okoare veveke ve areve haela la okoare ve ipi iele.

⁷ Ehovea oropa la okoare haeae karia la leikilava, okoare aeva leve haropakive?

⁸ Ehovea are va la okoare ve haeae eavi maria maeape, Iapaila, Amua mariape, aireaki hare, Ara va Israel la hiru I Judah ve la hiru ila okoare āre arilai.

⁹ Ara ereve houva haela ila leipe la okoare hovea ka. Ara erero mai papaehai Egypt ve leia kari kihoaupe la hoa, ehovea ere va arave okoare Kiva au leivahaeaila, Laelave ara erero iki au kekelaila' Amua maeape.

¹⁰ Ara va Israel hiru maria okoare āre avarakilai Amua maeape, Ara arave pupu iele ereve iki ureve paraeakilai. Ereve iki ureve ara arave hohoa haeakilai. Ara ereve Aualari leikilai, Ere kai arave haela leivahaeakilai.

¹¹ Haela oaria elare apavara maria kileavahaea va ka, Kai apoheari apoheari aeva kilea va ka maria, Amua ore leivahaeaki Ehovea haela oaria araro ore leivahaeakilai, Ipi iele la haela aiai akea iele la haela;

¹² Ara ereve mai haeae v'ila ikihuru leivahaeakilai; Ereve mai heahaha oaria ara va iki aireaki kelava va ka.

¹³ Are va okoare āre iele ve oropa la okoare le hapururuka. Overa la eharu poae lei hapururukakilai.