Hebrew 7 - Pupu Oharo Āre 1963 Genese 1970 Rute 1972

Keriso va Akea Oharo Haela Melchisedec hovea

¹ Ehovea ma haela Melchisedec, Salem ve amua, akea iele Aualari ve oharo haela: Abraham ai ita lahua amua oaria haeai helari ekepe la hoa are arero oki koarape kai lei morapaeape.

² Abraham avape eharu uku arero avarape. Are va iele mai ehoe ve amua, rare aeva Salem ve amua, la va iele havila ve amua.

³ Are oa i lou ila karia, kai vilali karia, kai meavohula karia. Areve ovokake va ipopeavaki hoa karia, kai karia leiki hoa kara karia. Are va Aualari ve Akore hovea leipe. Are va mea oaria Oharo Haela leivila.

⁴ Ma haela ve aheke iki kelavaila, ehovea Abraham kara mare ve kailape eharu uku arero aiarape.

⁵ O iele Levi ve la hiru haela kara, ere va hehe haela iele. Ere va pupu ila haela ve hehe meru aealula, ereve apavara erero kavale laria leilula; ere va Abraham ve erape akoremari.

⁶ Aka Melchisedec, are va haela lahua, are ereve hiru haela ka, aka are Abraham ve hehe meru avape, aeva okoare avape la haela are morapaeape.

⁷ Laelave, o iele akea haela areva ipi haela lei morapaeavila.

⁸ Maia va apihaealula haela hehe meru aealula, aka leia meru avaki haela va o iele ovokake aeavila la haela.

⁹ Oharo aeka ma — Levi meru avape, aka are kara Abraham ve meru avarape.

¹⁰ Ehovea Melchisedec Abraham koarape la hoa oropa, Levi aireaki epape.

¹¹ Laelave, Levi oharo haela ve la hiru oki veveke la avarakilava (ehovea la hiru pupu iele avarape), ehovealeve elaviila aeka Oharo Haela, Melchisedec hovea, haropakilai ha? kai Aaron ve la hiru hovea hovea lei va ka ha?

¹² Ehovea Oharo Haela ve hiru lahua leipe, laelave pupu kara lahua leikilai.

¹³ Ehovea ma oharo maeape haela va hiru ae ve haela. La hiru arura haha oropa ve horova au leila.

¹⁴ O iele elaviilave Amua Judah ve epape. Moses la hiru ve Oharo Haela rare au itavaila.

¹⁵ Melchisedec hovea oharo haela kihoreraki la hoa, ma va hihika iele.

¹⁶ Ehovea ma oharo haela are va meahaiapo la pupu v'ila au leila, aka ovokake haiapo ve aheke v'ila.

¹⁷ Arero vavavaki oharo ma, A va Melchisedec hovea Oharo Haela.

¹⁸ Oropa pupu, ehovea are va mahuka kai iele karia, le hakurepape.

¹⁹ Pupu oharo eharu aeva mekakure au laila, aka okiharo are iele leipe, ehovea laria elaviila Aualari maeamaea pekahavakilai.

²⁰ Okiharo veveke iele la, ehovea are va okoare iele ila.

²¹ (Oropa hoa ve Oharo Haela okoare iele au aila, aka are va okoare iele ila ehovea arero maeape oharo iele maria, Amua o iele okoare ape, Kai iki helari va ka A va mea oaria Melchisedec hovea Oharo Haela.)

²² Laria, Iesu ve okoare mekakure ve ihova le leipe.

²³ Oharo aeva ma — ere haela oaria iele oharo haela leivahaeape, aka ereve apaki hoa ereve oharo haela hoa haerapakilai.

²⁴ Aka areve ita avaki haela karia, ehovea are mea oaria aeavila.

²⁵ Laelave, areve la oki ve Aualari ve ekevahaeaki haela oaria are lei makukurikilai, ehovea are mea oaria ere v'ila velavela leivila.

²⁶ Elaviilave Akea Oharo Haela iele la, are va hehe ila, heaha karia, kaia akea ve lai pekape, mai heaha haela ve leia karia.

²⁷ Oropa la oharo haela oaria elare mai heahaha ve maea morava mai leivahaeape, kai haela oaria ve kara. Aka are la mai lei va ka, ehovea areve apape hoa la horova hoa haroapo hovea leipe.

²⁸ Ehovea haeae leilula haela pupu v'ila Akea Oharo Haela leivahaelula, aka okoare o iele ila va mea oaria mekakure leivila Akore la horova avarape.