Hebrew 6 - Pupu Oharo Āre 1963 Genese 1970 Rute 1972

¹ Laelave, Keriso ve la kileaki oharo ela hakurepakilai. Elaviila areve la mekakure oharo hukava va heroe: Elaviila iele karia la mai heaha ve ikihuru okiharo kekela v'arekaea;

² Elaviila Aualari ikikelavaki mai kara oharo hukavakilai, bapatiso mai, mai koharaki la mai ila; api kai uroukive la oharo, kai aireaki heheavaki hoa ve, leia hiki v'arekaea.

³ Aualari elaro oki la avikiarakilava, ela maria leikilai.

⁴ Ehovea iki ovava overa leivahaeape la haela, kai Kaia ve meru ore overa leivahaeape, Ove Veveke iele koarape la haela,

⁵ Aualari ve oharo veveke maea hovave overa leivahaeape la haela, aeva aireaki la ovokake ve aheke koarape la haela,

⁶ La haela la titavakilava, ere va aireaki laria lei ikihuru leivahaeai helarikive. Ehovea ere haela ve Akore satauro akea ve āre harive haela, kai arero lei haeae leivahaeairo.

⁷ Ehovea meahaiapo mea oaria ihauvila la lai koaravila, kai kora mere veveke lei aheauvila, haela ve ikivere kora mere va la, la meahaiapo Aualari ve mekakure avavila.

⁸ Aka are va kora mamareke merava ila la aheaukilava, are va aukapakive hovea, arero aireaki a harilai.

⁹ Aka, apavara e, elave ikikekela eve oki veveke koarakilai, ovokake mekakure la okiharo, lae vi va, ela oharo laria kiriro.

¹⁰ Ehovea Aualari heaha va ka, are eve horova veveke haveva lei va ka, areve Rare morapaeape la horova, ehovea e va areve hehe haela kiva leivahaeape, kai ma hoa kara kiva leivahaelula.

¹¹ Ela v'ikivere e oaria la mai kiva auhohi leivahaeakive, aiai basileia aeaki hoa.

¹² Elaviila maea mahuka v'arekaea, aka oropa horova auhohi leivahaeape la haela ve mai hovea hovea leivahaeakive; laria elaviila basileia ve okoare koarakilai.

Ikiveveke ehovea Aualari ve okoare

¹³ Ehovea Aualari Abraham okoare maeape la hoa, ehovea rare eapapo aea karia, are elare rare v'ila okoare maeape.

¹⁴ Are maeape, O iele ara aro lei veveke leikilai, ara aro lei eapapo leikilai.

¹⁵ Laelave, are aheke aiai okoare ve iele le koarape.

¹⁶ Ehovea haela va eharu eapapo v'ila okoare maeaelula — aeva okoare iele la leikilava, are o hahari le haerapakilai.

¹⁷ Laelave, Aualari, ehovea are v'ikivere areve okoare haruku aeaki haela areve iki ehoe ore leivahaeakilai, la iki ehoe okoare v'ila hihika ape.

¹⁸ Laelave, ma eharu iele orahokaila, okoare i O iele ila. Aualari opore mai au leila: laelave elaviila iki aheke leivahaeakilai, ehovea elaviila ovokake avakive ma okoare v'ila harava ekevahaeape.

¹⁹ Ma okoare iele elaviilave ove iele lei makukurikilai, o iele i aheke ila, aiai aireaki la Ove basileia ve.

²⁰ Leia elaviilave oropa haela overa pekape, Iesu havahu, Melchisedec la hiru ve Akea Oharo Haela hovea hovea le leipe.