Hebrew 5 - Pupu Oharo Āre 1963 Genese 1970 Rute 1972

¹ Ehovea Oharo Haela oaria hareavape iele ehovea Aualari ve horova leikive, areve meru i mai heaha hapururukaki la maea morava mai leikive.

² Are va haveva haela i oki haeae leivahaelula la haela ikihuru leivahaeakilai, ehovea are kara mai haeae ve heraho lei ore le leipe.

³ Laelave, are kai haela oaria i are havahu ve haeae v'ila maea morava mai leikilai.

⁴ Aka haela ae elare ikikekela ve hiki ma horova lei va ka, aka arero itavape la hoa hiki: Aaron kara laria leipe.

⁵ Laria kara Keriso elare hiki ve kekela ve Akea Oharo Haela au leila, aka Aualari arero itavape kai mariape, A va Arave Akore Ara va ave Oa mahau laleila.

⁶ Are ita ae kara mariape: A va mea oaria Melchisedec ve hiru ve Oharo Haela.

⁷ La haela va areve meahaiapo hoa ivaiva i apevelavela horova aheke havahu, hi ila, avahaeape: are arero lei makuriki Aualari velavela leipe, kai Aualari areve la oharo iapape.

⁸ Are va Akore havahu, aka are va kakare leipe la okiharo ve iapaki mai veveke ore leipe.

⁹ Laelave are mekakure leipe — are va ovokake haiapo iapailula oaria ve avarape.

¹⁰ Aualari arero Melchisedec hovea Akea Oharo Haela rare itavape.

Keriso ve okiharo veveke kiva auhohi leikive

¹¹ Ela va leia ve oharo oaria ero kileavahaeakilai, oharo aheke iele, ehovea e va avako perehekai hahuru.

¹² Ehovea e va ma hoa kilea haela iele — laelave ero Aualari ve pupu ve ipi iele maria kileaki va heroe — e va amae apu laralula haela hovea, eapai aheke larive hoveahovea va ka.

¹³ Ehovea amae apu hiki laralula haela va mai ehoe ve horahora leilula, ere va akoremari titaeka hiki,

¹⁴ Eapai aheke haela havahu hiki larilai hovea. Hovea hovea ere va ikiore leivahaeape, laelave ere va veveke i heaha ila heheavakive ore.