Hebrew 4 - Pupu Oharo Āre 1963 Genese 1970 Rute 1972

Iesu, Akea Oharo Haela, Aaron akea ve

¹ Laelave elaviila oaoka maria leivahaeakive heroe — La okoare elaviilara avikiarape, elaviilave haela uku okoare havoavaki ave.

² Ehovea iroro oharo elaviila iapavahaeape: ere kara. Aka iroro avahaeape la oharo erero lei veveke havahu au leila, ehovea iapavahaeape haela mekari au iapavahaeaila.

³ Elaviila ikikelavalula haela basileia arahavakilai — areve oharo mariape, Arave hihiri lei okoare ape ma — ere va basileia arahava va ka. O iele areve horova meahaiapo avare koare ipopeavape la hoa karia kara la hoa leipe.

⁴ Are va hare 7 ve ma oharo buka aeva maria hape, Aualari hare 7 hoa horova oaria ve iki paraeape.

⁵ Ita aeva maria hape, Ere va arave basileia ve arahava va ka.

⁶ Laelave, ehovea uku haela arahavakilai, aeka oropa oharo veveke iapavahaeape la haela oaria au arahavaila, ehovea ere iki au kelavaila

⁷ Are aeka hare haroapo la maeape, David ve la ape ve, ela overa maeaeape la oharo, maria, E va areve āra iapaki hoa, eve iki aheke kalaivahaelue.

⁸ Ehovea Joshua erero ikiparaeakive hoa la avarakilava, Aualari aireaki ikiparaeaki hare ve oharo erero maea va ka.

⁹ Laelave Aualari ve haela oaria ve iki paraeaki hare aeva le aeave.

¹⁰ Ehovea iki paraeaki ita araeaki la haela, are va elare horova hoa karia leikilai, hoveahovea Aualari elare horova ve iki paraeape.

¹¹ Laelave elaviila horova aheke la leivahaeakilai, aiai iki paraeaki la hoa, haela ae la ikikekelaki aue mai ve lei hilauki ave.

¹² Ehovea Aualari ve oharo iele va ovokake i aheke ila, hoi mare ve mare va perehekai, la oharo va mare iele, are va iki i ove ila kovaelakive hovea, uki i aivau ila. Are va haela oaria ve iki ureve ore havahu iele.

¹³ Haela oaria areve oropa ve hihika leilula. Ela va iki kelavalula la Aualari eharu oaria kara areve oropa ve hihika leilula.

¹⁴ Elaviilave Akea oharo Haela iele le aeave — kaia ve overa pekape la Iesu, Aualari ve Akore. Laelave elaviila avahaeape la okoare kiva auhohi leivahaeakive heroe.

¹⁵ Ehovea elaviilave Akea Oharo Haela elaviilave heraho oaria ore overa leipe. Are va amuraeharae hoa kara ore leipe, elaviila hovea hovea; aka are mai heaha au laila.

¹⁶ Laelave elaviila areve ikiheroe meru avakive oaoka kalaivahaelue. Laria are elaviilara ikihuru leivahaeakilai. Elaviilave heraho hoa areve la ikiheroe meru elaviilara koarakilai.