Hebrew 3 - Pupu Oharo Āre 1963 Genese 1970 Rute 1972

Keriso akea ve, Moses ipi ve

¹ Laelave, hehe apavara oaria, basileia haela iele, Iesu Keriso, elaviilave Akea oharo Haela i aposetolo haela, iki auhohi kelavaila.

² Arero paraeape Aualari are ikikekelape. Hovea hovea Moses Aualari ve horova kiva auhohi leipe.

³ Ehovea ma haela va akea ve, Moses va ipi ve, ehovea uvi kupe la haela va eapapo, are kupe la uvi va hekai.

⁴ Ehovea uvi oaria va haela ve mai ve kukueape. Aka eharu oaria Aualari karikivahaeape.

⁵ Moses i elare uvi ila horova veveke kiva leipe, horova haela hovea; aireaki kihoreraki eharu ve ihova la.

⁶ Aka Keriso, Akore havahu, elare uvi ve horova kiva leipe. Elaviila mea oaria aheke hiki la apeakilava, elaviila kara Keriso ve uvi.

⁷ Laelave, Ove Veveke ma hoa elaviilara kileavahaeakilai: Mahau, e va areve oharo la iapakilava,

⁸ Elare iki aheke kalaivahaelue, Hovea hovea, overa huakara ve la amuraeaki hoa ere iki aheke leivahaeape.

⁹ Eve papa haela araro amuraeape: Ere hitolo 40 hoa arave horova ore leivahaeape.

¹⁰ Laelave la vilakao ara iki hairihairi leipe Kai mariape, Ere va mea oaria iki haeae kelavalula: Ere arave okiharo haveva la leivahaeape.

¹¹ Laelave arave hihiri lei okoare mariape: Ere arave Basileia iele arahava va ka.

¹² Apavara e, kiva leila, eve iki heaha lei aheke leivahaeaki ave — e Ovokake Aualari hakurepaki ave.

Ikikekela veveke mea oaria kiva leiki

¹³ E va hare oaria elarelare aihukamaeaki — ma hoa havahu e va mai heaha lei haeae leivahaeaki ave.

¹⁴ Ehovea, elaviila oropa ikikelavape la mai mea oaria hovea hovea kiva la leivahaeakilava, elaviila Keriso ila hareho herehere leilula.

¹⁵ Elaviila mahau kara la oharo iapa va heroe: E va areve ara iapaki hoa Iki aheke kalaivahaelue, Overa Israel haeae leipe la hoa hovea hovea.

¹⁶ Ehovea uku haela oharo iapai haure le leivahaeape. Moses i hareho Egypt kihoahukape la haela oaria hareho kara ha?

¹⁷ Hitolo 40 hovea Are leita la hihiri leipe ha? Mai heaha leivahaeape la haela ka ha? Ere va huakara hiki apihaeape.

¹⁸ Are leita haela maeaeape — ere va basileia arahava va ka ha? O iele, areve oharo au iapaila la haela.

¹⁹ Laelave elaviila eavaro: Ere va au arahavaila iele ehovea ikikekelaki aue mai.