Hebrew 2 - Pupu Oharo Āre 1963 Genese 1970 Rute 1972

¹ Laelave, elaviila iapavahaeape la oharo oaria iki auhohi kelava va heroe, elaviila hihilaukaki ave.

² Ehovea aneru maeaeape la oharo iele araikilava, mai haeae i iapaki aue mai kavale iele lavakilava,

³ Elaviila la ovokake haure la leikilava, elaviila learia la kavale heaha ve lei makukurikilai ha? Ka ovokake oharo Amua oropa maeape, kai iapavahaeape la haela elaviilara kimaeaeape.

⁴ Aualari kara ereve oharo ihova i horova lahua lahua v'ila vavavaivila. Are va horova hoaha i Ove Veveke ve meru oaria leivahaevila, are havahu ve ikivere hovea hovea.

⁵ Ehovea elaviila maria hukavalula — la aireaki ovokake hoa are aneru kiva leikive au aiaraila;

⁶ Aka haela aea buka ae ve hohoa haeape, A haela iele leve kekelakive? A haela ve akore iki leve kekelakive ha?

⁷ A va hoa perehekai hiki arero aneru ve ipi ve aipepe Ava arero morapai haharika avarape: Ave mai karikivahaeape la eharu oaria a arero kiva leikive aiarape.

⁸ A va eharu oaria areve loa ipi ve aipevahaeape. Eharu oaria are va kiva leivahaevila, laelave are va kiva leiki aue eharu va karia. Aka ma hoa elaviila eharu oaria areve ipi ve eavavahaea va ka.

⁹ Elaviila Iesu ovohae eavaro: are oropa aneru ve ipi ve leipe, ehovea apakive maea ore leikive; aireaki are va akea iele le leipe. Are va Aualari ve ikiheroe meru ve haela oaria v'ila apape.

¹⁰ Ehovea meahaiapo are v'ila iele ovokake leivila, laelave veveke maria: are va haela oaria lei makukurikilai. Are va ovokake ve oropa haela, areve kakare leipe la okiharo ve.

¹¹ Are erero apoheari leivahaeakive makiri lei va ka, ehovea ovokake leivahaeape la haela kai erero hehe leivahaeape la haela hareho hovea hovea leivahaeakilai.

¹² Areve oharo maria: Ara ave rare apavara kileakilai Hehe Uvi ureve ara ave rare morapaeaki hivi ve morapaeakilai.

¹³ Oharo aeka ma, Ara areve rare ikikekelakilai, Aeka oharo ma: Ara i Aualari araro aikiarape akoremari mae.

¹⁴ Laelave, ehovea akoremari aivau i apu ila herehere laralula, are kara ereve maea hovea hareho avape, ehovea laria are va apakive la okiharo ve are haela haeavila la haela, diabolo havahu la, are harilai.

¹⁵ Laria kara, mea oaria apihaeakive oaoka leilula la haela are lei makukurikilai.

¹⁶ Ehovea are aneru ve ovokake lei va ka: are Abraham ve meavohula lei makukurikilai.

¹⁷ Laelave, veveke maria: areve maea areve apoheari hovea hovea leikive. Laria are ikihuru i ikiheroe ila Aualari ve mai hovea hovea leikilai, ehovea haela oaria Aualari oropa ve lei ehohoe leivahaeakive.

¹⁸ Ehovea are havahu amuraeharae hoa ore leipe, laelave Diabolo amuraeavila la haela kara are koarakilai.