Hebrew 13 - Pupu Oharo Āre 1963 Genese 1970 Rute 1972

Lei aheke leiki oharo

¹ Apavara hovea la ikiheroe mai leivahaeaki.

² Hahi haela auhohi leivahaeaki — laria uku haela aneru hahi haela hovea kiva leivahaeape.

³ Uvi muru apealula la haela iki kelavaki, hovea hovea e va ere i hareho apeakilai. Heraho leilula la haela kara, ehovea e kakare maea ve heraho leilula haela.

⁴ Uva laeaki mai kiva auhohi leivahaeaki: Korea mai i airi pavora mai ila kalaivahaelue.

⁵ Erohoho eharu hiki ikivere kalaivahaelue. Eve maea hovea eharu v'ila ikiveveke leivahaeaki: ehovea Aualari mariape: Ara ero hahaure lei va ka, ara ero haitapa va ka.

⁶ Laelave elaviilave oharo aheke ma, Amua arave koaraki haela, Ara oaoka lei va ka Haela araro leari heaha leikilai ha?

Oropa haela ve oharo iapai kiva leivahaeaki

⁷ Eve oropa haela iki kelavaki: Aualari ve oharo ero kileavahaeape la haela. Ereve okiharo veveke kelavaki, eve ikikekela ereve la ikikekela hovea hovea leivahaeaki.

⁸ Iesu Keriso va hovea hovea, overa hoa, ma hoa, kai aireaki hoa kara.

⁹ Eva kileaki oharo lahua lahua ve iki heraho kalaivahaelue. Ehovea veveke maria — Ikiheroe meru elaviilave iki lei aheke leikive. Eapai ve eharu hiki iki ehoe i aheke ila lei va ka.

¹⁰ Elave arura haha ve pupu maria — Hehe Ita kiva haela areve oropa ve eapai larive kekela v'arekaea.

¹¹ Ehovea Akea oharo haela hehe ita ureve mai heaha hapururukakive avipekape la apu ve maea eharu, ere karikara mahokaea ve a aroupe.

¹² Laelave Iesu kara, ehovea are elare apu v'ila haela oaria hehe leivahaeape, areve maea karikara mahokaea ve apape.

¹³ Laelave elaviila karikara mahokaea ve areve leia hoahukakilai, areve heaha herehere lei avakilai.

¹⁴ Ehovea maia elaviila ve haiapo apeaki karikara karia; elaviila aireaki la karikara iele haropalula.

¹⁵ Laelave, elaviila are v'ila Aualari mea oaria morapaeakilai; o iele, elaviilave ape oharo ve iele arero thank you oharo arilai.

¹⁶ Ikiheroe mai veveke leikive iki ka hoapalue, ehovea Aualari lahovea horova ikivere iele.

¹⁷ Eve kiva haela ve oharo iapa hiki — pupu kiva auhohi leivahaeakive — ehovea ere eve ove kiva leilula, hovea hovea ereve horova kara aire heheavakilai. Ere va ikiveveke ila la horova leivahaeakilai, ikihairihairi va karia; laria, e kara heaha leivahaea va ka.

Hita oharo

¹⁸ Ela v'ila ivaiva kiva leivahaeaki; Elave iki veveroro leive; ela va ikivere mea oaria mai ehoe ila apeakive.

¹⁹ Ara ero ma oharo ape karava maeaive, ehovea ara va ikivere eve leia elavelave elaukive.

²⁰ Havila ve Aualari, Amua Iesu apape hoa lai urapape la Aualari, (Mamoe Kiva Haela mekakure la Iesu), mea oaria aeavila la Okoare ve apu ve okiharo ve.

²¹ Ero lei mekaka leivahaeakive, ehovea ikivere horova leivahaeakive. Are eve iki ureve areve ikivere mai veveke kileavahaeakive, ehovea Iesu Keriso ve harihari. Areve rare mea oaria lei morapaeaki. Amene.

²² Ara ero ape karava maeaeaive — apavara, arave aihukamaeaki oharo hela iapaila, ehovea ara eve ma hohoa perehekai hiki lahaeaila.

²³ E v'ore leivahaeaki, elaviilave apoheari, Timothy, uvi muru ve le kihoaupe. Are maeamaea la ekekilava, ara are i hareho ero ovohae eavakilai.

²⁴ Eve akea haela oaria hela arave ikiheroe oharo maeaeaki; hehe haela oaria kara. Italy apealula haela oaria ero ikiheheroe leivahaeairo.

²⁵ E va ikiheroe meru ila hareho apeaki.