Hebrew 12 - Pupu Oharo Āre 1963 Genese 1970 Rute 1972

Iesu ikikekela ve ihova mekakure

¹ Laelave, ehovea ma o iele vavavahaelula haela oaria elaro iki ureve aheke aikiararula, elaviila hereavaki eharu mehau oaria aikilapakilai; elaviilaro heraho leilula la mai heaha kara. Elaviila ore leivahaeape okiharo veveke auhohi pekahavakilai; hivove iele vivilakive heroe.

² Elaviila Iesu ovohae eavakilai, ehovea are elaviilave ikikekela ipopeavape: Are elaviilave ihova veveke avarakilai. Are va satauro ve heraho haure au leila, ehovea are aireaki la mekakure kekelape. Are va ma hoa Aualari ve terona ve mai ore ukai ve aeavila.

³ Mai heaha haela oaria arero leipe la heaha ikikelavaila; e va maea hairihairi mahuka leivahaeaki ave.

Pupu kiva leiki mai ve iele

⁴ E va mai heaha mare avahaeaki hoa eve apu au hakaitapaila.

⁵ Ero akoremari hovea aihukamaeape la oharo e va ikihoapape, Arave Akore e, Amua ve kileaki okiharo haure lei v'arekaea: Are aro erereaki hoa iki mahuka kalailue,

⁶ Ehovea Amua ve ikivere haela are o aheke kileavila Areve akoremari are haru ila kileavahaevila.

⁷ E va kakare hoa horahora leiki aue la leikilava, are ero akoremari hoveahovea kelavakilai. Ehovea lela oa areve akoremari haru koa va ka ha?

⁸ E va kakare karia la leivahaeakilava, haela oaria herehere leilula la kakare, e va Oa ve akoremari iele karia.

⁹ Aeka ma, elaviilave meahaiapo oa oaria elaviilara aihukamaeape; elaviila erero momorapupe. Laelave, veveke, elaviila Ove Oa iele ve aihukamaeaki oharo iapai ovokake leivahaeakilai.

¹⁰ Ehovea ere va hare uku hiki elaviilara aihukamaeape, ehovea ere havahu ve ikivere. Aka are elaviilave veveke kekelavila, ehovea elaviila areve la hehe hoa herehere leivahaeakilai.

¹¹ O iele, elaviilave ikikekela maria — aihukamaeaki oharo va ikiveveke leiki eharu va ka, heaha hiki. Aka aireaki la oharo iele iapaki haela are havila i mai ehoe v'ila ikiveveke leikilai.

¹² Laelave mai mahuka aheke leivahaeaki, loa ari mahuka aheke leivahaeaki.

¹³ Eve loa ve okiharo lei ehoe leivahaeaki; loa heaha la haela heraho leivahaeaki ave. Loa heaha veveke leikive heroe.

Ahilaki oharo i kileaki oharo ila

¹⁴ Haela oaria hoa haroapo havila i hehe mai ila ikivere leivahaeaki. E va le eharu karia la leivahaeakilava, e va Amua ovohae eavakive oki va karia.

¹⁵ Kiva auhohi leivahaeaki: haela ae Aualari ve ikiheroe meru havoavaki ave; eve leia haela ve ikiheaha eapapo leivahaeai haela oaria lei heaha leivahaeaki ave.

¹⁶ Kiva leila: haela ae mai heaha leiki ave, kai Esau ve la meahaiapo mai heaha hoveahovea leiki ave; ehovea Esau areve haruku mekakure eapai perehekai iele ve kakavae leipe.

¹⁷ E v'ore, aireaki hoa are v'ikivere haruku avakive la hoa, Oa arero haure leipe. Ehovea are va ikivere Oa arero ikihuru leikive, are o ma ila haropape, aka la ikihuru are au availa.

Meahaiapo Siona i Kaia ve la Siona

¹⁸ Ehovea e va mai koharaki la kela au ekeila, a eapapo la ita, aka mea muru la ita, mea heaha eapapo la ita;

¹⁹ Puva hohoape la ita, aeva āra hape la ita: La āra iapavahaeape haela apevelavela leipe, ere va aireaki la āra iapa v'arekaea.

²⁰ (Ehovea ere va la āra hape kileaki oharo hoveahovea au leila): La kela ve pupu maria, Loa loalula eharu mai la koperereakilava Ere va arero have harilai, Aka lape huhakilai.

²¹ La kela va hehe eapapo, heaha iele, laelave Moses mariape, Ara oaoka eapapo, maea paialapaiala leivila.

²² E va Sion Kela mekakure ekevahaearo, ovokake Aualari ve karikara mekakure, kaia ve la Jerusalem, kai aneru maeokoko la karikara.

²³ E va akoremari koare ve korukaiaki ekalesia ekevahaearo. Ereve rare Kaia ve overa haeape. E va Aualari, haela oaria ve heheavaki Aualari ve ekevahaearo: e va mai ehoe haela ve ove ve korukaiaki ita ekevahaearo.

²⁴ E va Iesu okoare āre ve huaki haela kai ekevahaearo: Au hariripe la apu hoa ve kileaki oharo mekakure, Abel la hoa hovea ka.

²⁵ Oharo kileaki la haela ve oharo haure leivahaea v'arekaea. Ehovea meahaiapo hoa au kileape oharo hahaure leivahaeape la haela heaha leivahaeape. Laelave elaviila kaia ve la kileaki oharo hahaure la leivahaeakilava, elaviila heaha eapapo koarakilai.

²⁶ Oropa hoa la āra meahaiapo lalaeapape, aka ma hoa areve okoare maria, Ara va ma hoa kaia i meahaiapo ila hoa haroapo lalaeapakilai.

²⁷ Oharo aeka ma — la oharo ve iele — au lalaeapape la eharu are hareavakilai (ehovea au karikipe eharu hiki) aka lalaeapaki aue la eharu aheke apeakilai.

²⁸ Laelave ehovea elaviila lalaeapaki aue la basileia avakilai, elaviila ikiheroe meru kiva leivahaeakilai. Elaviila Aualari ve horova veveke oaoka ila kai ikiveveke ila kiva auhohi leivahaeakilai.

²⁹ Ehovea elaviilave Aualari va a ahea iele mekakure hovea.