Hebrew 11 - Pupu Oharo Āre 1963 Genese 1970 Rute 1972

Oropa ikikekela aheke haela

¹ Ikikekela mai va ikivere mai kara, Au eavaila la eharu ve iele.

² La okiharo ve oropa haela rare veveke le avape.

³ Ikikekela ve okiharo ve elaviila ore leivahaeakilai, Aualari meahaiapo oaria karikivahaeape — laria, hihika la eharu muruhari eharu v'ila kihoreavape.

⁴ Abel ve ikikekela aheke leipe, laelave are Aualari arura meru veveke leipe, Cain ve meru va perehekai. Laria, Aualari Abel ve mai veveke vavavape, kai areve meru hihika leipe. Laelave apape haela oharo ehoe ma hoa kileavila.

⁵ Enoch iki ehoe kekelape, laelave Aualari arero koelaripe, are apaki hoa ore au leila. Haela arero au eavaila, ehovea Aualari arero lai pekape. Ehovea Aualari oropa vavavape, Are va Enoch ikivere leipe.

⁶ Aka ikikekelaki aue haela Aualari ikivere va ka; ehovea Aualari ve oki ekeki haela, Aualari iki iele kekela va heroe, Aualari arero auhohi haropaki la haela kavale iele leikilai,

⁷ Noah iki iele kekelape, laelave are Aualari ve oharo iapai oaoka leipe. Are vevaea hahai elare lalava haela oaria lei ovokake leivahaeape. Laria are meahaiapo hahape; are va mai ehoe haela, haruku iele avape.

⁸ Abraham iki iele kekelape. La hoa Aualari arero itavape ehovea ita lahua aukive; la ita are va aireaki hoa elare le avakilai. Are Aualari ve oharo iapape; are haveva leipe la okiharo kai aupe,

⁹ Ehovea are iki iele kekelape, are okoare ape la ita naoae aeaveape, ita lahua hovea. Are i Isaac i Jacob ila kovo ita hovea apearoape. Erealila are i hareho haruku avaki haela.

¹⁰ Are va karikara iele, ipi aheke ita, la karipe. La karikara ve karikiki haela va Aualari iele.

¹¹ Ehovea ikikekela aheke, Sara ero‐ila leipe, kai areve lauapau hoa aheke lei akore epape, ehovea are okoare ape la Aualari iapai iki kekelape.

¹² Laelave haela eapapo haroapo, apaki hoa maeamaea la haela, meavohula oaria erape, maeokoko, kaia ve kou oaria ve numera hovea, miri la horo hoveahovea.

¹³ Ma haela oaria ikikekela aheke lei apihaeape. Ere okoare iapape, arai ve hiki eavape. Ere ikikelavape kai maria avahaeape — ere va meahaiapo hoa hahi loa loalula haela hiki.

¹⁴ O iele, laria arula haela hihika maealula ere va ita iele haropalula.

¹⁵ O iele ere hakurepape la ita la kelavakilava, ere va helari aukive, heroe.

¹⁶ Aka ere Kaia ve la ita mekakure kelavape, laelave Aualari iki hairihairi va ka rare ereve Aualari rare avakive, ehovea Are ere v'ila ita veveke karikipe.

¹⁷ Abraham iki aheke kekela Isaac arura haha ve avarape; okoare avape la haela elare akore havahu avarape.

¹⁸ Are v'ila maeape, Ave akore Isaac v'ila meavohula oaria erakilai.

¹⁹ Areve ikikekela Aualari apape la haela lei ovokake leikilai. Are akore kai avape, api kai urouki la parabole hovea.

²⁰ Isaac ikikekela ve la okiharo ve Jacob i Esau ila lei momorapupe, ehovea aireaki kihoreavaki eharu ve.

²¹ Jacob apape hoa ikikekela aheke v'ila Joseph ve akoremari orahokaila lei momorapupe. Are elare kaika mai pai ivaiva leipe.

²² Joseph ikikekela ve oki ve, Israel ve hoahukakive oharo maeape, kai areve uki aiaukive pupu oharo maeape.

²³ Ikikekela okiharo ve, Moses ve oa i lou ila arero epape hoa, arero au avarapape, ehovea erealila eavape are va maea mekakure. Ere amua ve pupu oaoka au leila,

²⁴ Ikikekela ve okiharo ve, areve haela havahu hoa, Moses Pharaoh ve mari ve akore rare haure leipe. Are mai heaha ve erohoho ve okiharo ikivere au leila.

²⁵ Are va Aualari ve haela i hoa haroapo kakare leikive ikivere leipe; mai heaha ve erohoho okiharo are haure le leipe.

²⁶ Keriso ve heraho are ikivere leipe; Egypt ve erohoho oaria are haure leipe, ehovea are aireaki la kavale mekakure iki kekelape.

²⁷ Ikikekela okiharo ve, are Egypt hakurepape; amua ve hihiri are oaoka au leila, are aheke leipe, ehovea are au eavaila la Amua iki kekelape.

²⁸ Ikikekela okiharo ve are Passover hurae leipe — apu haririkive la hurae — akoremari koare haeaki la aneru erero haeaki ave.

²⁹ Ikikekela okiharo ve, ere Ahea Ma Ovoka kekele kakarara hovea elahukape. Egypt haela ereve aire ve elahuka ma le ihahape.

³⁰ Ehovea ikikekela ve, Jericho ve karikara ve āra Israel haela hoa 7 helari hupakaeape — la āra le hihilaupe.

³¹ Ehovea ikikekela ve — harari uamari, Rahab, ikikelavaki aue haela ila hareho au apaila, ehovea Israel meu haela are havila ila auhohi leipe.

³² Aeka, le oharo arilai ha? Gideon, Barak, Samson, Jephtha, David, Samuel, hare hovea ka ma haela ve hari oharo hukavakive.

³³ Ehovea ereve ikikekela ve ere vilaipipi heaorapape, horova ehoe leivahaeape, okoare mekaka aeape, lion ve ape kokaukape;

³⁴ A eapapo huhurape, lelao mare ve kakare hereavape, mahuka hoa aheke leivahaeape, hahari hoa heaorapape, iri haela oaria haruapape.

³⁵ Uku api kai urahukape, kai elare lalava haela koarape; uku maea kakare koarape; ovokake ikivere au leila, ehovea ere va aireaki la ovokake kelavape.

³⁶ Uku heheo oaria i haru oaria ila koarape. Haela erero auri horou hahai uvi muru paparaehape.

³⁷ Haela erero have koavape, erero mai heaha leivahaeape, au amuraeape. Ere erero lelao mare ila huru haeape. Ere elare maea mamoe i goat ila ve iilu hahai naoae loa loape: ere va merava i heraho eapapo leivahaeape, kai kakare oaria koarape.

³⁸ (Meahaiapo ereve mai mekaka ve hoveahovea au leila). Ere ita huakara i kela ita ila naoae loa loape. Ere va kekele i kela ve have ura ila hiki apearoape.

³⁹ Ere oaria ikikekela veveke ve oki v'ila rare veveke avape: aka okoare ve iele au koaraila.

⁴⁰ Aualari elaviila v'ila aireaki eharu mekakure aiarakilai. Ere elaviila ila hareho mekaka iele leivahaeakilai.