Hebrew 10 - Pupu Oharo Āre 1963 Genese 1970 Rute 1972

Keriso ve maea morava mai akea iele, Moses ve maea morava mai hovea ka

¹ Ehovea pupu va aireaki kihoreavaki eharu ve ihova hiki, la eharu ve iele havahu ka. Laelave la pupu ve hitolo oaria ve maea morava mai oaria v'ila haela lei mekaka leivahaea va ka.

² Ere laria la leivahaeakilava, ere va maea morava mai overa haerapakilai, ehovea veveroro leivahaeaki la haela, mai heaha aire kelava va ka.

³ Aka hitolo oaria maea morava leiki la hoa, mai heahaha kara iki kelavalula.

⁴ Ehovea boromakau mea i goat ila ve apu mai heahaha hapururuka va hovea ka.

⁵ Laelave are meahaiapo kihoauki la hoa are maria ave, Maea morava i meru leiki mai ila a va ikivere lei va ka: A va ara v'ila maea karikipe,

⁶ A mai heaha hapururukaki a veape aivau i meru eharu ila a haure leivila.

⁷ Laelave are mariape, Aualari, ara ave ikivere horova leikive mave ekeve (Pupu buka ureve ara v'ila hape oharo ma).

⁸ Are v'oropa ape oharo ma, A va ikivere ka maea morava mai i a veape meru eharu ila — mai heaha ve arura eharu a haure leivila (Ma eharu va pupu ve okiharo hiki ve eharu).

⁹ Are aireaki maeape oharo ma, Aualari e, ara va ave ikivere horova leikive ekeve. Oropa la eharu le hapururukape, ehovea aireaki la eharu aheke leikive.

¹⁰ Ma aireaki oharo elaviilave lei mekaka leivahaeaki eharu. Hoa haroapo Iesu Keriso ve maea morava mai veveke la okiharo ve.

¹¹ Oharo haela oaria hare oaria arura haha oropa ve epavi maea morava mai hoveahovea leilula. La horova mai heaha hapururukakive hovea ka.

¹² Aka ma haela (Iesu) hoa haroapo hiki elare maea morava lei heaha oaria hapururukape. Aireaki are Aualari ve mai ore ukai ve haiavape,

¹³ Aiai areve iri haela oaria areve loa pavaki haha hovea leivahaeape.

¹⁴ Ehovea areve la maea morava mai haroapo hiki haela oaria lei mekaka leivahaeape.

¹⁵ Ove Veveke ma oharo ve iele elaviila v'ila vavavakilai — ehovea are oropa maeape oharo ma:

¹⁶ Ara ere v'ila aireaki leiki okoare ma: Ara va arave pupu ereve iki ureve aipekilai. La pupu ara ereve iki ureve la hohoa haeakilai,

¹⁷ Ereve mai heaha oaria ara aireaki kekela va ka.

¹⁸ Laelave, ehovea overa hapururukape, elaviila maea morava mai aeva lei va ka.

Ahilaki oharo — kiva leiki oharo

¹⁹ Laelave, apavara, ehovea elaviila Iesu ve apu v'ila hehe ita havahu pekahavakive oaoka ka,

²⁰ La okiharo āre i ovokake ila are elaviila v'ila hehe leivahaeape, areve aivau ve okiharo la.

²¹ Elaviilave Akea Oharo Haela Aualari ve uvi aeavila.

²² Laelave elaviila ikikekela aheke i iele ila; elaviilave iki veveroro overa leivahaeape. Elaviilave maea ma veveke overa huhelavape.

²³ Elaviilave ikikekela aheke lei horahora leivahaea v'arekaea: (Ehovea okoare ape la Aualari va iele havahu).

²⁴ Elaviila elarelare ikiheheroe mai i horova veveke ila kiva auhohi leivahaeakilai.

²⁵ Elaviila ivaiva ve korukaiaki mai hakurepa v'arekaea; uku haela ve mai laria; aka elaviila elarelare aihukamaeakilai, aheke havahu heroe, ehovea Basileia hare va maia iele.

²⁶ Elaviila o iele ore leivahaeape haela mai heaha la leivahaeakilava, aireaki mai heaha hapururukaki oki va karia.

²⁷ Aka heheavaki hoa heaha iele elaviila koarakilai, elaviilave hai ka leivahaeaki heheavaki hoa. Aualari ve iri haela haeaki hoa va la.

²⁸ Moses ve pupu haure leipe haela, areve la haeae vavavape haela 3 hovea la haela, ere huru havahu hape.

²⁹ Laelave, ikikelavaila, Aualari ve Akore haure havahu leipe la haela, are va heaha eapapo koarakilai. Ehovea are va Okoare ve apu naoae naoae kekelape: arero hehe leipe la haela are heaha rare ape; are ve ikiheroe meru ve ove iele haure le leipe.

³⁰ Elaviila ore, Aualari mariape: Haeae ve kavale ara leikilai. Amua maeape, Ara havahu kavale leikilai. Oharo aeka ma: Amua havahu areve haela heheavakilai.

³¹ Heaha iele ma: ovokake Aualari ve oropa ve haeae leikive.

Aeka aheke leiki oharo

³² Oropa hoa iki alalakive: E va ovava eavape la hoa eva heraho eapapo leivahaeape.

³³ Ehovea haela oaria eve kakare ovohae eavavahaeape — eva rare heaha le avape: aeva e va la heraho koaravahaeape haela oaria i hareho korukaiavahaeape.

³⁴ Ehovea e va au hahape la haela ikihuru leivahaeape: haela eve eharu naoae kailape la hoa, e va ikiveveke leivahaeape, ehovea e v'ore overa leivahaeape e va Kaia ve erohoho mekaka aireaki koarakilai.

³⁵ Laelave eve la iki aheke hakurepa v'arekaea. La iki aheke leivahaeai veveke aireaki avakilai.

³⁶ Auhohi apeaki, e va Aualari ve ikivere horova la leivahaeakilava, e va okoare mekakure aireaki avakilai.

³⁷ Haiapo ka Ekeki la haela iele havahu ekekilai,

³⁸ Mai ehoe haela ikikekela ve okiharo ve ovokake leikilai. Oaoka i mahuka leiki la haela, Ara va arero ikihairihairi leive.

³⁹ Elaviila lahovea oaoka leivahaeai havoavaki haela va ka. Elaviila ikikekela aheke kai ove ovokake leivahaeaki haela.