Hebrew 1 - Pupu Oharo Āre 1963 Genese 1970 Rute 1972

Hapaki oharo

¹ Aualari elaviilave houva haela okiharo lahua lahua oaria peroveta haela ve ape v'ila kileavahaeape.

² Ma hoa are va are havahu ve Akore v'ila elaviilara oharo kimaeaeape. Are la akore eharu oaria, haruku hovea, aiarape; Are are v'ila meahaiapo karikipe.

³ Are va Aualari ve haharika iele, Aualari ve maea hovea hovea. Are lahua elaviilave mai heaha oropa hapururukavahaeape, aireaki are akea iele Aualari ve mai ore ukaki haiavape.

⁴ Aneru va mekaka, are havahu va mekakure iele: ere avape rare va mekakure, aka are Oa v'ila avape rare mekakure havahu.

Aualari ve Akore va Aneru akea ve

⁵ Ehovea are lela aneru mea aea mari maeape: A va arave akore, Ara havahu epape akore? Oharo aeka ma, Ara areve Oa iele leikilai; Are kai arave akore leikilai?

⁶ Oharo aeka ma, are akore koare meahaiapo avarape la hoa are mariape: Aualari ve aneru oaria arero morapaeakive, heroe.

⁷ Are aneru v'ila maria maeape: Are va aneru mea hovea karikivila: Are va horova haela a uru hovea karikivila.

⁸ Aka are akore maria maeape, Aualari, Ave terona iele va mea oaria aeavila; Ave basileia ve mai haru va mai ehoe hiki ve ihova:

⁹ Ava mai ehoe ikivere leipe, a va mai heaha iki hairihairi leipe; Laelave Aualari, o iele Ave Aualari, Aro Amua hovea ikiveveke leivila la la‐apu ila hariripe A va haela oaria ve akea ve.

¹⁰ Amua e, A va avare koare hoa meahaiapo ve ipi iele karikipe Kaia akea kara ave mai horova leipe.

¹¹ Ere hai ka leivahaeakilai aka a havahu aeavila; Ere va pura hoveahovea poae leivahaeakilai;

¹² A va erero maea pura hovea koravakaiakilai; Ereve maea koelarikilai, Aka a va hovea hovea hiki aeavila, A va heaha lei va ka.

¹³ Are ka lela aneru hoa aea maria maeape A va arave mai ore ukai ve haiavaki Aiai ara ave iri haela Ave loa pavaki haha hovea leikilai?

¹⁴ Ere oaria Ove ve horova haela; erero paparaehape iele ehovea ovokake haela ve horova koarakive.