Genese 49 - Pupu Oharo Āre 1963 Genese 1970 Rute 1972

Iakobo ve peroveta oharo

¹ Iakobo areve akoremari oaria itavavahaeai mari maeaeape: “E hareho korukaiavahaeaki, ara ero aireaki hare kihoreavaki eharu oaria kileavahaeakilai.

² Iakobo ve akoremari e, korukaiavahaeai auhohi iapavahaeaki, eve oa, Iseraela, ve oharo iapavahaeaki.

³ Reubena e, a arave akore koare, arave aheke, arave aheke ve oropa ve horerape akore, a va maea pelaea i ahea ila ve oropa haela.

⁴ A va ma ve la mahuka hoveahovea, a va iele akea haela lei va ka, ehovea a ave oa ve avuku ita lapekaila, kai arero lei haiae leipe, a va arave avuku haha uavakive pekape!

⁵ Simeona i Levi ila va apoheari iele; erealila ve hoi mare va hahari heaha leiki eharu.

⁶ Arave ove e, erealila ve oharoharo hukavaki hoa kakoaralue; arave iki ureve hela, ere i hareho kekela v'arekaea: ehovea erealilave hihiri hoa erealila haela haeavahaeape, erealilave heaha leiki hoa, erealila boromakau ve maea lei heaha leivahaeape.

⁷ Erealilave hihiri lei heaha leikilai, ehovea are eapapo iele, kai erealilave ikikakare va haiae iele leivila! ara erealilara Iakobo ve hoa ve hareavakilai, kai erealilara Iseraela ve aru ve kopurapakilai.

⁸ Iuda e, ave apoheari aro morapaeakilai; ave mai ave iri haela ve avea mai korakilai; ave oa ve akoremari ave oropa ve ekakaopakilai.

⁹ Iuda va liona ve mere; a va hahari koarape la eharu harepai pekape. Are ekaopape; are liona hovea avuku uavape, liona abu hovea kara; arero hurapakive hovea leita ha?

¹⁰ Basileia ve ahea ve kaika Iuda ve hakurepa va ka; amua va la haru areve loa ve aru ve haela hareava va ka, aiai are areve amua havahu arero o iele avakilai; vilaipipi oaria areve ipi ve leivahaeakilai.

¹¹ Are areve hosi mere vine kora hahakilai, are areve asini mere vine mekakure koperereakilai, are areve pura wine ila huhelakilai; are areve maea pura vine hae ve apu huhelakilai.

¹² Areve ovohae wine ma ovoka leikilai, kai areve kao, amae apu la houhuka hovea leivahaeakilai.

¹³ Sebulona ahea ma poe ve aeakilai; are vevaea ve kiva leiki ruma leikilai; areve hoa va Sidona ve leia.

¹⁴ Isakara va mamoe ve āra ve aru ve uavavila asini hovea;

¹⁵ are ovohae eavape, ikiparaeaki ita veveke la, kai la ita va mekakure; laelave are areve horo eharu mehau oraiavakive ekaopape, are kavale aue horova haela hovea leipe.

¹⁶ Dana areve haela Iseraela ve hiru aea hovea heheavakilai.

¹⁷ Dana va okiharo ve hereavaki ekaroa hovea leikilai, okiharo poe ve ekaroa heaha, are hosi ve loa ikipi buravavila, laelave hosi ve horeaki haela aireaki lei oaukilai.

¹⁸ Iehova e, ara ave lei ovokake leiki hoa la kari.

¹⁹ Maora haela Gada ve leia hahari avahaeakilai, aka are ereve loa ikipi ve hahari leikilai.

²⁰ Asera ve eapai kapare iele leikilai, are king ve eapai mekakure koarakilai.

²¹ Napatali va au paraeape deer abu, are mere mekaka erakilai.

²² Iosepa va hae oaria ila kora maeako, ma hoho hirore poe ve kora maeako veveke; areve mamaeako oaria have haua hoa haroapo akea ve pekai kokaukakilai.

²³ Apo haela arero hahari eapapo leivahaeape; ere arero ape heheape, kai arero lei heraho eapapo leipe;

²⁴ kahara, areve apo aheke ila heava?-?haeape; Iakobo ve Aualari Aheke, (Mamoe kiva haela, Iseraela ve Have eapapo), areve mai orahokaila lei aheke leivahaeape.

²⁵ Ave oa ve Aualari aro hukapakilai; Akea iele Aualari aro lei morapaeakilai, kaia akea ve la mekakure, meahaiapo ve ipi havahu la mekakure; uavila ve amae i airoa ila ve mekakure.

²⁶ Ave oa ve lei veveke leiki eharu va eapapo iele, mea oaria apealula la kela ehoaha i haiapo apealula la kela ve veveke va titaeka; la mekakure, areve apoheari ve hareavape la haela, Iosepa ve haro korakilai.

²⁷ Beniamina va viva aeha iele; vevelare hoa are animala paeai le larilai; hailaea hoa are hai ka leivahaeaki animala hamureakilai.”

²⁸ Ma oaria va Iseraela ve la hiru 12 ila; ereve oa erero haroapo haroapo lei morapaeaki oharo maeaeape la hoa, are lahovea oharo maeaeape.

Iakobo ve api kai karu ihape hoa

²⁹ La hoa Iakobo erero maria ahilape: “E va araro arave aualau haela ve la ita paraeakilai: Hiti haela, Eperona ve la ita arave aualau ve la have ura araro karu ihakive,

³⁰ Makepela la oru, Kanana ita Mamere ve kauri ukai ve, Makepela la ara ureve la have ura ve; la ita Aberahamo Hiti haela Eperona ve ilaea leipe, ehovea kapu ita leikive.

³¹ Ere Aberahamo i areve uva Sara ila koru leia ihape; ere Isako i areve uva Rebeka ila koru leia ihape; ara leia kara Lea koru ihape.

³² La oru i areve ureve la have ura ila ere Hiti haela ve ilaea leipe.”

³³ Iakobo areve akoremari ve ahilaki oharo karia leipe, la hoa, are areve loa avuku haha akea ve paraeape; are iki hua karia lei le apape, are elare aualau haela ve leia le korukaiape.