Genese 47 - Pupu Oharo Āre 1963 Genese 1970 Rute 1972

¹ Laelave, Iosepa pekai Parao maeape: “Arave oa i arave apoheari ila, ereve mamoe i boromakau i eharu oaria ila, Kanana ve leia ve kihoahukape, ere va ma hoa Gosena la ita apearo.”

² Are areve apoheari 5 ila hareavi Parao oropa ve kari hoahukape.

³ Parao la apoheari maeaeape: “E va le horova leilula haela ha?” Ere Parao maeape: “Ave horova haela va mamoe kiva haela, elave aualau haela hovea.”

⁴ Ere Parao maeape: “Ela ve eve ita perehekai apeakive ekevahaeape ehovea ave horova haela ve ita Kanana hohera eapapo, laelave mamoe ve hohe karia; kahara, ela aro here leiro, ave horova haela Gosena ve ita hela apeakive.”

⁵ La hoa Parao Iosepa maeape: “Ave oa i ave apoheari ave leia kihoahukape.

⁶ Aigupito ita hareho ave oropa ve; a va ave oa i ave apoheari ila ita veveke avaraki; ere va Gosena la ita apeakive, heroe; a v'ore ereve aru ve haela mekaka la apeakilava, erero arave boromakau kiva leikive horova avarakive.”

⁷ La hoa Iosepa areve oa Iakobo Parao oropa ve lai hoaupe, aea Iakobo Parao lei morapaeape.

⁸ Parao Iakobo maeape: “Ave hitolo oaria leavaila ha?”

⁹ Iakobo Parao maeape: “Ara va ovokake ve hahi hoa va hitolo 130 ila; arave hitolo perehekai, kai heaha ila, aeka hitolo oaria havahu ka: ere va arave aualau ve hahi hitolo oaria hovea hovea au leila.”

¹⁰ Iakobo Parao lei morapaeape, kai Parao ve ita le hakurepape.

¹¹ Kahara, Iosepa areve oa i areve apoheari ila ita veveke avarape, kai erero Aigupito ve ita aea avarape, ita veveke iele la, Ramesese la ita ve, Parao arero maeape la oharo hovea.

¹² Iosepa areve oa i areve apoheari ila, kai areve oa ve lalava haela oaria, eapai hovea hovea aiarape, ereve akoremari ve numera hovea hovea.

Iosepa hohera hoa kiva leiki mai

¹³ Ita hareho eapai karia, ehovea hohera eapapo, laelave Aigupito i Kanana ila lei merava leipe, ehovea hohera heraho iele.

¹⁴ Iosepa Aigupito i Kanana ila la ita ve moni oaria, koni ilaea leivahaeape la moni, korukaiavahaeai Parao ve uvi leia aihoahukape.

¹⁵ Kahara, Aigupito i Kanana ila la ita ve moni ilaea lei karia leipe la hoa, Aigupito haela oaria iki Iosepa leia mari maeape: “Elaro hela eapai aikiarakive; ela ave oropa apihaeai ehovealeve ha? Ehovea elave moni karia leilai.”

¹⁶ Kahara, Iosepa kavale maeape: “Eve animala aikiaraki; eve moni karia la leikilava, ara eve boromakau ve eapai kakavae leikilai.”

¹⁷ Laelave, ere ereve animala Iosepa ve leia aiauvahaeape; Iosepa ereve hosi, boromakau, nanaikosi i asini ila ve eapai kakavae leivahaeape; are la hitolo haroapo ereve animala oaria ve eapai ve kakavae leivahaeape.

¹⁸ La hitolo karia lei aire la hitolo kara ere areve leia hoahukai maeape: “Ela elave amua oropa ve hehepo leivahaea va ka, elave moni karia leilai; elave amua elave animala le aeape, elave amua oropa ve elave eharu aea karia, elave maea i kekele ila hiki.

¹⁹ Ela ave oropa ve apihaea ehovealeve, ela i elave kekele kara? Ela i elave kekele ila eapai ve ilaea leikive; ela i elave kekele ila Parao ve au hahaeaki horova haela leivahaeakilai; elaro wheat hae aikiaraki, laria ela apihaea va ka, aka ovokake leivahaeakilai, elave ita kara merava lei va ka.”

²⁰ Laelave, Iosepa Aigupito ve mea hareho Parao ve ilaea lei avape, ehovea Aigupito haela oaria ereve oru ilaea leivahaeape, ehovea ere hohera ve heraho eapapo leivahaeape. Ita hareho Parao le avape.

²¹ Are haela oaria areve hahaeaki haela leivahaeape, Aigupito ita ve ukai ukai ve.

²² Oharo haela ve kekele hiki are ilaea au leila; ehovea Parao oharo haela ve kavale hovea hovea aiarape, ereve la kavale ve ereve ovokake hoveahovea leivahaeape; laelave are ereve ita ilaea au leila.

²³ La hoa Iosepa haela oaria maeaeape: “Iapaila, ara mahau hare e i eve kekele ila Parao ve ilaea laleila. Eve wheat hae uku ma, e kekele ve puravai velarikive apoporaukive.

²⁴ Hae hovare hoa, e va hiru 5 hamureaki, hiru haroapo Parao avaraki, hiru 4 ila e havahu ve, aeka apoporaukive, kai e i eve lalava haela i eve akoremari ve eapai ve.”

²⁵ Ere maeape: “A elaro lei la makukurila; elave amua ikivere la leikilava, ela Parao ve horova haela leivahaeakilai.”

²⁶ Laelave Iosepa la eharu Aigupito la ita ve pupu le leipe. La pupu ikiki ma hoa laria hiki aeavila; Parao ve hiru 5 ve hiru haroapo avakilai: oharo haela ve kekele hiki Parao au availa.

Iakobo ve hita hoa

²⁷ Laelave Iseraela Aigupito la ita, Gosena leia, apeape, ere leia eharu oaria koarape, ere kai haela maeakoko leivahaeape.

²⁸ Iakobo Aigupito la ita hitolo 17 aeaveape; laelave Iakobo ovokake hoa va hareho va hitolo 147.

²⁹ Iseraela ve apaki hoa maeamaea, la hoa are areve akore Iosepa itavi maria maeape: “A araro ikihuru iele la leikilava, ave mai arave mauki ureve aipeki, kai ave okoare arilai, a va arave ikivere oharo iapa hiki leikilai, Araro Aigupito ma ita karu iha va ka.

³⁰ Araro arave aualau ve la karu ita ihakive; araro Aigupito hareavi kaivi ereve la kapu ita ihakive hela.” Are kavale maeape: “Ave la oharo hovea ara leikilai.”

³¹ Are maeape: “Arave okoare havahu arive.” Are kai okoare havahu ape. La hoa Iseraela areve avuku haha ve haro ve le ekaopape.