Genese 46 - Pupu Oharo Āre 1963 Genese 1970 Rute 1972

Iakobo i lalava haela ila Aigupito ve hahi

¹ Iseraela i areve eharu oaria hareho ila hahi lei Beera‐sieba leia ekepe; are leia areve oa Isako ve Aualari v'ila maea morava leipe.

² Aualari oroa hoa ivahi ureve Iseraela maria maeape: “Iakobo, Iakobo!” Are maeape: “Ara ma!”

³ Are maeape: “Ara Aualari, ave oa ve Aualari; a Aigupito hoaukive oaoka kalailue; ehovea ara leia a v'ila vilaipi eapapo leikilai.

⁴ Ara a i hareho Aigupito leia hoaukilai; ara kai aro aeka lai kihoaukilai; Iosepa ve mai ave ovohae apukilavakilai.”

⁵ La hoa Iakobo Beera‐sieba hakurepape. Iseraela ve akoremari ereve oa Iakobo kai ereve akoremari titaeka i ereve uavila ila Parao ere v'ila paparaehape la wagon ureve oraeavi auvahaeape.

⁶ Ere Kanana hoa koaravahaeape ereve animala i eharu ila kara Aigupito leia aiauvahaeape, Iakobo i areve meavohula oaria ila,

⁷ areve akoremari, areve meavohula, areve marita, kai meavohula marita ila, areve lalava haela oaria hareho, are are i hareho Aigupito kari hoahukape.

⁸ Aigupito hoahukape Iseraela ve meavohula ve rare ma: Iakobo i areve akoremari ila; Reubena, Iakobo ve akore koare;

⁹ Reubena ve akoremari: Hanoka, Palu, Heserona, Karemi ila.

¹⁰ Simeona ve akoremari: Iemuela, Iamini, Ohada, Iakina, Sohara, kai Kanana uamari ve akore Saulo ila;

¹¹ Levi ve akoremari: Geresona, Kohata, Merari ila.

¹² Iuda ve akoremari: Era, Onana, Sela, Peresa i Sera ila (Era i Onana ila Kanana leia apihaeape); Peresa ve akoremari va Heserona i Hamula ila:

¹³ Isakara ve akoremari: Tola, Puva, Iopa i Simerona ila.

¹⁴ Sebulona ve akoremari: Sereda, Elona i Ialeela ila:

¹⁵ (Ma va Lea Padana‐arama Iakobo ve erape akoremari, areve mari Dina kara: areve akoremari i marita ila hareho ve numera 33 ila);

¹⁶ Gada ve akoremari: Sipiona, Hagi, Suni, Esebona, Eri, Arodi i Areli ila.

¹⁷ Asera ve akoremari: Imina, Isiva, Isuvi, Beria, i ereve mariheari Sera ila. Kai Beria ve akoremari Hebera i Malakiela ila:

¹⁸ (Ma va Labana areve mari Lea avarape horova mari Silipa ve akoremari, ma akoremari are Iakobo ve erape, ere haela 16 ila).

¹⁹ Iakobo ve uamari Rahela ve akoremari: Iosepa i Beniamina ila.

²⁰ Iosepa Aigupito ita erape akoremari: Manase i Eparaima ila; Potipera Ona ve oharo haela ve mari Asenata ma akoremari v'ila erape.

²¹ Beniamina ve akoremari: Bela, Bekera, Asebela, Gera, Naamana, Ehi, Rosi, Mupimi, Hupimi i Arida ila.

²² (Ma va Rahela ve akoremari, Iakobo v'ila erape, hareho 14 ila.)

²³ Dana ve akoremari: Husima.

²⁴ Napatali ve akoremari: Iaseela, Guni, Iesera i Silema ila.

²⁵ (Ma va Labana areve mari Rahela avarape horova mari Biliha ve akoremari, are Iakobo v'ila erape; haela hareho 7 ila).

²⁶ Iakobo i hareho Aigupito hoahukape meavohula oaria hareho va 66 ila. (Iakobo ve akoremari ve uavila ma numera ure va ka).

²⁷ Iosepa ve Aigupito ureve erape akoremari va orahokaila. Aigupito hoahukape Iakobo ve uvi haela oaria va 70 ila.

Iakobo i areve lalava haela Aigupito leia

²⁸ Are Iuda Iosepa ve leia oropa paraeape, Gosena la ita ve oropa aukive; ere Gosena la ita ve leia ekevahaeape.

²⁹ La hoa Iosepa areve kariota karikiki Gosena leia aupe, ehovea areve oa Iseraela leia koarakive; are areve oropa ve epavi, arero arahu hahavi hi eapapo le ape.

³⁰ Iseraela Iosepa maeape: “Arave ma hoa apakive heroe, ehovea ara ave oropape laeavila, kai ara v'ore iele a va ovokake ila.”

³¹ Iosepa areve apoheari i areve oa ve lalava haela maeaeape: “Ara pekai Parao maria maeakilai: ‘Arave Kanana apearoape apoheari i oa ve lalava haela oaria kihoahukape.

³² La haela va mamoe kiva haela, ehovea ere va animala oaria kiva leivahaeroape. Ere ereve mamoe oaria i boromakau i ereve eharu oaria ila aikihoahukape.’

³³ Parao ero itavavahaeaki maria la maeaeakilava, ‘E va le horova leilula haela?’

³⁴ E va maria maeaki: ‘Ave horova haela ereve titaeka hoa ikiki ma hoa animala kiva leivahaeaki haela.’ Laria e va Gosena la ita apeakilai; ehovea Aigupito haela oaria mamoe kiva haela oaria ikihairihairi leilula.”