Genese 41 - Pupu Oharo Āre 1963 Genese 1970 Rute 1972

Iosepa Parao ve ivahi ve iele hihika kileape

¹ Hitolo orahokaila karia leipe la hoa, Parao ivahi mari eavape: Are Nile mai poe ve epavape;

² iapai, Nile mai ve boromakau kapare i maea mekaka 7 ila kivikavahaeape; ere mehere ureve eapai lalavahaeape.

³ Iapaila, Nile mai ve boromakau pepekeke i maea heaha 7 ila ereve aire ve kivikavahaeape; ere oropa la boromakau 7 ila Nile ve mai poe ve maeamaea epavape.

⁴ Pepekeke i maea heaha ila la boromakau maea kapare i mekaka ila la boromakau 7 ila le lakarape. Kahara, Parao lei ovokake leipe.

⁵ Are aeka avuku uavi ivahi aea eavape; eavaila, wheat hae paraeapo i mekaka ila 7 ila ikupa haroapo hahaeape.

⁶ Eavaila, wheat hae pepekeke i heaha ila ereve aire huhoreavape, kauri la mea lei heaha leivahaeape wheat hae.

⁷ Maea pepekeke la wheat hae, maea paraeapo la wheat hae hoa haroapo iropi le lakarape. Parao ovokake lei ore leipe are va ivahi hiki.

⁸ Laelave, la opoa vevelare areve iki ureve heraho leipe; are Aigupito ureve la harea haela i ikiore haela oaria itavavahaeape; Parao areve ivahi erero kileavahaeape, aka ere oaria Parao ve la ivahi ve iele maeaki ore au leila.

⁹ Wine horova kiva haela Parao maeape: “Ara mahau arave haiae iki le kekela.

¹⁰ Parao elare horova haela hihiri leipe, kai ara i pai aveaki horova kiva haela ila hevehe haela ve kapena ve uvi kiva leivahaeakive paraeape la hoa,

¹¹ elalila oroa haroapo ivahi lahua lahua eavape, la ivahi lahua lahua ve iele kara lahua lahua.

¹² La hoa Heberu harokou haela ela i hoa haroapo aeape, are uvi muru kiva haela ve kapena ve horova haela; elalila arero maeape la hoa are elalilave ivahi ve iele hihika kimaeape, elarelare ivahi hovea hovea.

¹³ Are elalilara maeaeape la oharo iele, aireaki hovea hovea horerape; a araro va horova ve aeka paraeape, pai aveaki horova kiva leiki la haela a airovo le avikape.”

¹⁴ Parao Iosepa lai ekekive oharo paraeape, ere kai arero elavelave uvi muru ve lai hoaupe; are auhare koro mai, pura āre kohahai, Parao oropa ve epavape.

¹⁵ Parao Iosepa maeape: “Ara va laeavila la ivahi ve iele arive haela oaria ore au leivahaeakue; ara a v'ila la iapaila, a va ivahi oharo iapaki la hoa a va areve iele arive ore.”

¹⁶ Iosepa Parao kavale maeape: “Ara havahu ka; Aualari Parao ve kavale veveke maeakilai.”

¹⁷ La hoa Parao Iosepa maeape: “Iapai, arave ivahi ureve, ara Nile mai poe ve la pavila;

¹⁸ boromakau kapare i maea mekaka ila 7 ila, Nile mai ve leia la kivikavahavaila; ere mehere ureve eapai la lalavahaeaila;

¹⁹ aeka boromakau pepekeke i maea heaha ila 7 ila, ereve aire la kivikavahavaila; ara lahovea boromakau Aigupito ita oaria overa au eavaila.

²⁰ Pepekeke i maea heaha ila la boromakau, kapare i maea mekaka ila la boromakau le lakaraila,

²¹ aka ere la lalavahaeaila la hoa, aire ere lalavahaeaila la maea haela ore au leikue, ehovea ere va oropa la maea pepekeke hovea laleivahaeaila. Kahara, ara ovokake laleila.

²² Ara aeka ivahi hoa eavape, wheat hae kapare i mekaka ila 7 ikupa haroapo akea ve huhoreavape;

²³ aeka wheat hae pepekeke i heaha ila, kauri mea koape wheat hae hovea, 7 ila, ereve aire huhoreavape;

²⁴ pepekeke la hae 7 ila, mekaka ila la hae 7 ila iropi la lakaraila. Ara harea haela maeaeape, ere oaria la ivahi ve iele arive ore au leivahaeakue.”

Ivahi ve iele

²⁵ Iosepa Parao maeape: “Parao ve la ivahi ve iele haroapo; Aualari areve aireaki leiki eharu Parao hihika la kileaila.

²⁶ Boromakau mekaka 7 ila va hitolo 7 ila, kai wheat hae mekaka 7 ila va hitolo 7 ila; ivahi ve iele haroapo hiki.

²⁷ Pepekeke i maea heaha ila la boromakau 7 ila va hitolo 7 ila: pepekeke i heaha ila, kauri mea heaha la leivahaeaila la wheat hae va hohera leiki hitolo 7 ila.

²⁸ Ara Parao lamaeaila la oharo hovea, Aualari ve aireaki leiki eharu, are Parao la kileaila.

²⁹ Maea maea hitolo 7 ila eapai maeakoko koarakilai, Aigupito ve ita oaria hareho,

³⁰ aka aireaki la hitolo 7 ila mea hohera eapapo leikilai, eapai oaria la hitolo haela haveva leivahaeakilai, Aigupito ve ita oaria ureve, la hohera ita eapapo hoa haroapo leikilai.

³¹ Eapai maeakoko ita oaria ere haveva leivahaeakilai, ehovea aireaki la hohera hoa, ehovea la hoa va heraho eapapo iele leikilai.

³² Parao ivahi orahokaila laeavila ve iele maria, la va Aualari ve ikivere okiharo, are kai haiapo ka, o iele leikilai.

³³ Laelave, veveke maria, Parao va ikiore i ikikekela veveke ila haela haroapo hareavakive, ehovea Aigupito ita hoa haroapo ovopakive.

³⁴ Parao aeka ita ve hiru lahua lahua ve kiva haela maeaeaki, ere Aigupito la mea ve la eapai hamureai hiru 5 ila mekaka la hitolo 7 ila ureve, are va hiru haroapo kaivi kiva leikive.

³⁵ Ere la hitolo mekaka ve eapai hoa haroapo korukaiakilai; wheat hae oaria Parao havahu kiva leikilai.

³⁶ Ere va la eapai kiva leikilai, ehovea aireaki hohera ila la hitolo 7 ila, Aigupito la ita oaria ve koarakilai, hohera hoa haela oaria apihaeaki ave.”

Iosepa Aigupito ve Amua leipe

³⁷ Parao i areve horova haela oaria ila ma okiharo ikivere leivahaeape.

³⁸ Parao areve koaraki haela maeaeape: “Aualari ve Ove ila mahovea haela elaviila koarakilai ha?”

³⁹ Laelave, Parao Iosepa maeape: “Ehovea Aualari ma eharu oaria aro lakileaila, ikiore i ikikekela veveke ila haela ae karia, a hiki;

⁴⁰ a arave uvi kiva leikilai, arave haela oaria ave oharo hiki iapai leivahaeakilai; terona akea ve hiki ara ave akea ve.”

⁴¹ Parao Iosepa maeape: “Eavaki! Ara Aigupito ita hareho aro avilarila, ehovea kiva leikive.”

⁴² La hoa Parao areve mai lekoka ve la maimari hareavi, Iosepa ve mai lekoka orape, areve maea pura mekakure kohahape, kai gold ela haroapo areve karave heropape;

⁴³ are arero areve aire la kariota horeakive maeape; ere areve oropa ve āra hai itavape maria: “Loa ari ekaopaila!” Laria are arero Aigupito la ita hoa haroapo ve kiva haela leipe.

⁴⁴ Parao aeka Iosepa maeape: “Ara va Parao! a maeaki aue la maeakilava, Aigupito ita oaria ve haela mai aka loa hara urahuka va ka.”

⁴⁵ Parao Iosepa rare Sapenata?-?panea rare itavape; are Ona ve oharo haela Potipera ve mari Asenata uva ve avarape. Kahara, Iosepa Aigupito la ita ve oki lahua loa veavelaripe.

⁴⁶ Iosepa Aigupito ve king, Parao, ve horova ipopeavape hoa areve hitolo 30 ila. Iosepa Parao ve leia hoai Aigupito la ita hareho loa veavelaripe.

⁴⁷ Hitolo mekaka 7 ila hoa, oru eapai maeakoko leivahaeape.

⁴⁸ Aigupito ureve la hitolo mekaka 7 ila la hoa, are eapai oaria karikara ureve korukaiavahaeape, oru oaria ve la eapai oaria ereve maeamaea la karikara ureve korukaiavahaeape.

⁴⁹ Iosepa koni maeakoko korukaiavahaeape, ahea ma ve la kekele hovea, areve numera au koaila, ehovea areve numera kaoakive hovea au leila.

⁵⁰ Hohera la hitolo aireaki, Iosepa akoremari orahokaila oropa erape; Ona ve oharo haela Potipera ve mari Asenata are v'ila epape.

⁵¹ Iosepa akoare koare rare Manase rare itavape; are maeape: “Ehovea arave heraho oaria, kai arave oa ve lalava haela Aualari araro lei haveva la leipe.”

⁵² Aire la akore are rare Eparaima rare itavape, “Ehovea ara heraho leipe la ita Aualari araro lei veveke leipe.”

⁵³ Aigupito la ita ureve eapai oaria la hitolo mekaka 7 ila karia le leivahaeape.

⁵⁴ Hohera eapapo la hitolo 7 ila le ipopeavape, Iosepa maeape oharo hovea hovea. Ita oaria hohera leivahaeape, aka Aigupito la ita oaria va pai ila.

⁵⁵ Aigupito haela oaria eroa haeai Parao ve leia eapai v'ila hivavara avahaeape la hoa, Parao erero maeaeape: “E va Iosepa ve leia auvahaeaki, are ero maeaeaki hovea, leivahaeaki.”

⁵⁶ Laelave, ita oaria hareho hohera eapapo leipe la hoa, Iosepa la eapai uvi hapape kai Aigupito haela ilaea leivahaeape, ehovea Aigupito la ita oaria hohera heaha eapapo leipe.

⁵⁷ Aeka, ita lahua lahua haela kara Aigupito Iosepa leia eapai ilaea leivahaeakive auvahaeape, ehovea meahaiapo ita oaria hohera heaha eapapo leivahaeape.