Genese 40 - Pupu Oharo Āre 1963 Genese 1970 Rute 1972

Iosepa uvi muru haela ve ivahi ve iele kileape

¹ Aireaki, hoa aea, Aigupito ve king ve wine kiva haela, kai pai aveaki horova ve kiva haela, arero lei iki heaha leivahaeape.

² Parao areve horova kiva haela orahokaila, wine karikiki haela ve kiva haela i pai aveaki haela ve kiva haela ila hihiri leipe,

³ laelave are erealilara uvi muru kiva haela ve uvi paparaehape ehovea kiva leikive, Iosepa aeape la ita ve.

⁴ Hevehe haela ve kapena Iosepa erealilara kiva leivahaeakive maeape, kai are erealilara kiva leipe; erealila hare uku leia apeape.

⁵ Oroa aea, erealila ivahi eavape, uvi muru apeape la Aigupito king ve wine kiva haela i pai aveaki haela ila; erealila ivahi lahua lahua eavavahaeape, la ivahi ve iele kara lahua lahua.

⁶ La opoa vevelare Iosepa erealilave leia hoai ovohae eavape, erealila va iki horahora leivahaeape.

⁷ Laelave, are Parao ve uvi au hahaeai apeape la horova kiva haela velavela leivahaeape: “Ealila ve oropape ikihuru hovea ehovealeve ha?”

⁸ Erealila maeape: “Elalila ivahi laeavila, la ivahi ve iele maeaki haela karia.” Iosepa erealilara maeape: “Ivahi ve iele maeaki haela va Aualari hiki ka ha? Ivahi hela araro kimaeaki.”

⁹ Laelave wine kiva leiki haela areve ivahi Iosepa mari maeape: “Arave ivahi ureve vine kora arave oropa ve lepavila,

¹⁰ la vine kora ve mamaeako ilehoila; rorore loavila la hoa areve pupuri hulahoreavila, kai haiapo ka vine hae iele hovare le la leivahaeaila.

¹¹ Parao ve hekako ara mai le lapaeaila; ara vine hae hovare kaivi haipekeavi vine apu hekako ve lakaitavila, kai la hekako Parao ve mai ve avilarila.”

¹² La hoa Iosepa arero maeape: “Areve iele ma: Mamaeako ilehoila va hare ilehoila;

¹³ hare ilehoila karia leiki la hoa, Parao ave haro urapai aro aeka horova leikive maeakilai; a overa leipe hovea, a va areve la wine kiva leipe la hoa, lahovea a va aeka Parao ve hekako areve mai ve avarakilai.

¹⁴ A hela lei veveke leiki la hoa, araro ikikekela, araro ikiheroe hela leiki, arave rare Parao kileakive hela, ehovea ara ma uvi muru hakurepakilai.

¹⁵ Ehovea ere o iele araro Heberu haela ve ita ve korea lai kihoaupe; aeka, ara va araro uvi muru paraeakive hovea haiae au leila.”

¹⁶ Pai aveaki horova kiva haela eavape la ivahi ve iele va veveke, are Iosepa mariape: “Ara kara ivahi laeavila; ara va haro akea pai hara ilehoila oraeavi laila,

¹⁷ akea ve la hara va pai hirore lahua lahua oaria ila, ehovea Parao aiarakive, aka arave haro ve la hara ureve pai ori oaria le lakaraila.”

¹⁸ Iosepa kavale maeape: “Ivahi ve iele ma: hara ilehoila va hare ilehoila.

¹⁹ Hare ilehoila karia leiki hoa, Parao ave haro urapai haerapakilai, are aro kora akea ve airovo avikakilai; ori ave aivau le lalavahaeakilai.”

²⁰ Hare ilehoila karia leipe la hoa, Parao ve epape hare ve hurae, are horova haela oaria ve hurae eapapo leipe; are wine kiva haela i pai aveaki haela ila ve haro, are horova haela ve aru ve urapape.

²¹ Are wine horova kiva haela aeka areve la wine horova kiva leikive maeape, are kai aeka hekako Parao ve mai ve avarape.

²² Aka Parao pai aveaki horova kiva leiki la haela airovo avikape, Iosepa erealilara ivahi ve iele kileape hovea hovea.

²³ Aka wine horova kiva haela Iosepa iki au kekelaila; are arero iki hoapape.