Genese 4 - Pupu Oharo Āre 1963 Genese 1970 Rute 1972

Kaina i Abela ila

¹ Kahara, Adamu areve uva Eva ore leipe, are kai ero ila leipe; are Kaina epai mariape: “Amua araro lahukapaila, ara akore le epai”.

² Are aeka akore aea epape, rare Abela. Abela are va mamoe kiva haela, Kaina va kekele ihaki haela.

³ Hoa aea Kaina kekele ve hae uku meru hovea Iehova oropa ve aiaupe.

⁴ Abela kara, areve mamoe mere paraeapo veveke iele meru hovea avaupe. Iehova Abela ve meru ikivere leipe,

⁵ aka, are Kaina ve meru ikivere au leila. Laelave Kaina iki kakare lei oropape hihiri le leipe.

⁶ Iehova Kaina maeape: “A va ikiheaha kai oropape hihiri laleila ehovealeve ha?

⁷ A veveke la leikilava ela aro ikivere lei va ka ha? A veveke leiki aue la leikilava, mai heaha okiape mahaukaia ve aro ikivere leive: a va arero heaorapakive, heroe”.

⁸ Kahara, Kaina akoreheari Abela maria maeape: “Elavaila kaipu arahavakive”. Erealila kaipu arahavape la hoa Kaina Abela huru le hape.

⁹ La hoa Iehova Kaina maeape: “Ave akoreheari Abela lahoa ha?” Are kavale maeape: “Ara ore ka. Are arave akoreheari ve kiva haela ha?”

¹⁰ Iehova arero maeape: “A va learia laleila ha? Ave akoreheari ve apu ve āra kekele ve leia araro itavave.

¹¹ Ma hoa, ave akoreheari la apu, a mai avuhukavaeape la apu avape kekele areve ape ha aro lei haiae laleila.

¹² A va aireaki kekele ihaki la hoa are aro iele maeakoko avara va ka, a va oaoka lei vivilaki haela leikilai, kai mea oaria meahaiapo naoae veakilai”.

¹³ Kaina Iehova maeape: “Arava haiae ve kavale mehau iele, ara hovea ka.

¹⁴ Eavi, a va mahau hare araro kekele ve lavakaila, ara ave oropape ve arai ve leikilai, ara va oaoka lei vivilaki haela, meahaiapo naoae veaki haela leikilai: araro la eavaki haela araro harilai”.

¹⁵ Iehova arero maria maeape: “Laria ka! Haela aea Kaina la harilava, are kavale avakilai, hoa 7 hovea”. Iehova Kaina ve maea ve ihova leipe, arero eavaki haela arero hari ave.

¹⁶ Kahara, Kaina Iehova ve leia hakurepape; are aeaveape ita rare Noda, Edena ve kauri ukaki.

Kaina ve akoremari ve huhuve

¹⁷ Kaina areve uva ore leipe, are ero‐ila lei Enoka epape. Are karikara kupe. La karikara are areve akore ve rare itavape, rare Enoka.

¹⁸ Enoka Irada epape. Irada Mehuiaela epape, Mehuiaela Metusaela epape, kai Metusaela Lameka epape.

¹⁹ Lameka uavila orahokaila karape, haroapo rare va Ada, aeva haroapo rare va Sila.

²⁰ Ada Iabela epape, are va kovo uvi apealula haela kai boromakau kiva haela oaria ve ipi haela leipe.

²¹ Areve akoreheari ve rare va Iubala, are va auli hivi helalula kai puva hohoalula la haela oaria ve ipi vila leipe.

²² Sila Tubala‐kaina epape. Are va berasi i auri ila eharu karikivahaelula haela oaria ve ipi haela leipe: Tubala‐kaina ve mareheari ve rare va Naama.

²³ Lameka areva uavila orahokaila maeaeape: “Ada i Sila ila arave āra iapai; Lameka ve uavila arave oharo auhohi iapaila. Araro lei kakare leipe harokou haela ae ara huru lahila, ehovea are araro koape.

²⁴ Kaina ve heaha ve kavale hoa 7 la leikilava, o iele Lameka ve kavale va hoa 77 ila”.

Seta ve akoremari ve huhuve

²⁵ Adamu areve uva aeka ore leipe. Are akore epape kai areve rare Seta rare itavape, ehovea are mariape: “Aualari araro akore aea avikiarape, ehovea Abela ve ita avakive, ehovea Kaina arero huru hape”.

²⁶ Seta kara akore epape, kai arero rare Enosa rare itavape. La hoa haela Iehova ve rare ve ivaiva leikive ipopeavape.