Genese 37 - Pupu Oharo Āre 1963 Genese 1970 Rute 1972

Iosepa i apoheari ila

¹ Iakobo areve oa hahi leipe la ita le aeape, Kanana la ita.

² Iakobo ve lalava haela ve hari ma: Iosepa va hitolo 17 ila la hoa areve apoheari i hareho ila mamoe kiva leivahaeroape; areve hoahuakore hoa are i areve oa ve uavila Biliha i Silipa ila ve akoremari ila loa loa veavelaripe; Iosepa kai ereve mai hahaiae ve hari ereve oa maeape;

³ Iseraela Iosepa ikivere eapapo leipe, areve akoremari aeva perehekai, ehovea are va areve oalou iele hoa epape hoa ve akore; are areve maea pura heaikiapo mai heahapiki ila kokorape.

⁴ Areve apoheari eavape areve oa arero ikivere eapapo leipe, erero kai perehekai, ere arero ikiheaha leivahaeape; ere arero oharo veveke maeakive ikivere au leila.

⁵ Kahara, Iosepa ivahi eavape, kai are areve apoheari la ivahi maeaeape la hoa, ere aeka ikiheaha eapapo leivahaeape.

⁶ Are erero maeaeape: “Arave ma ivahi ve oharo iapaila:

⁷ Elaviila wheat hahauka oru leia hahape, iapai, arave hauka ehoe havahu urai pavape, eve hahauka arero helari hupakai arave la hauka oropa ve ekakaopape.”

⁸ Areve huhohoaha arero maeape: “O iele, a va elave amua haela leikilai ha? A va elave oropa haela leikilai ha?” Laelave ere arero aeka hihiri leivahaeape, ehovea areve ivahi i oharo ila.

⁹ Kahara, are ivahi aea eavape, kai apoheari kileavahaeape maria: “Iapaila, ara aeka ivahi laeavila; eavaila, hare, papare i kou eleven ila arave oropa ve ekaopape.”

¹⁰ Aka are la oharo areve oa i apoheari ila maeaeape la hoa, areve oa arero erereape kai maria maeape: “A va laeavila ma ivahi ve iele le ha? O iele, ara i ave lou i apoheari ila ave oropa ve mea ve ekakaopakilai ha?”

¹¹ Areve apoheari arero ikiheaha leivahaeape, aka areve oa ma oharo areve iki ureve kiva leipe.

Iosepa kakavae lei Aigupito paraeape

¹² Areve huhohoaha Sekema maeamaea leia mamoe eapai laeavaeroape.

¹³ Iseraela Iosepa maeape: “Ave huhohoaha mamoe Sekema leia mamoe eapai laea va ka ha? Ekela, ara aro ereve leia paraeakilai, heroe.” Are kavale maeape: “Ara ma.”

¹⁴ Are arero maeape: “A va hoai ovohae eavakive, ere i mamoe ila oaria veveke apearo la, kai iki araro oharo hovea kimaeakive.” Laelave are arero Heberona la hahapa ve paraeai aiai Sekema leia.

¹⁵ Haela ae arero kaipure naoae veavila eavi arero velavela leipe, “A va le la haropave ha?”

¹⁶ Are maeape: “Ara arave huhohoaha la haropave; a hela araro kimaeaki, ere mamoe kiva lahoa leivahaeailula la?”

¹⁷ La haela maeape: “Ere ma ita le hakurepai, ara ereve oharo maria iapape, ‘Elaviila Dotana leia hoahukakilai’.” Laelave Iosepa huhohoaha ve airekai aupe, kai erero Dotana leia koaravahaeape.

¹⁸ Ere arero arai ve eavape la hoa ere elarelare oharo hukavape, ehovea arero huru harive.

¹⁹ Ere elarelare oharo maria hukavape, “Ivahi eavavila haela me ekeve.

²⁰ Ekeila, elaviila huru ha maia ve karu aea koakilai; aireaki elaviila maria arilai, ‘Animala merava arero le la hape’, aireaki areve la ivahi iele leari leikilai.”

²¹ Aka Reubena ereve la oharo iapape la hoa, are arero ereve mai ve hareavi mariape: “Areve ovokake kahareavalue.”

²² Reubena kai mariape: “Apu hakaitapa v'arekaea; huakara maia ve karu aea paraeai harepakive, heroe, aka arero lei haiae lei v'arekaea.” Are va ikivere arero aireaki lei ovokake lei areve oa havahu lai aukive.

²³ Iosepa huhohoaha ve leia ekepe la hoa, ere areve la maea pura hauavi, mai heahapiki ila la pura mekakure;

²⁴ ere arero kaivi karu aea le paraeape: la karu va haroka, ehovea ma karia.

²⁵ Kahara, ere eapai larive avape; ere ovohae iupe Gileada ve ekevahaeaki Isamaela kakavae haela uku eavavahaeape; ere va kamela akea ve oraiavape eharu va avare, muo veveke muramura i muro ila; ere la eharu va Aigupito ve leia hahi aupe.

²⁶ Iuda apoheari maeaeape: “Elaviila akoreheari huru ha apu la avarapakilava, le veveke koarakilai ha?

²⁷ Elaviila arero ma Isamaela haela kakavae leikilai; elaviila arero mai haiae lei va ka, ehovea are elaviilave akoreheari, elaviilave aivau hovea.” Areve apoheari areve oharo iapape.

²⁸ Midiana haela la oki ekevahaeape; ere Iosepa karu ve leia hareavi arero Isamaela haela ilaea leipe, kavale silver have koru 20 ve; ere Iosepa Aigupito lai aupe.

²⁹ Aireaki Reubena iki karu leia ovohae eavape, Iosepa karu leia karia, la hoa are elare pura haipararapai,

³⁰ apoheari maria maeaeape: “Akore karia! Ara learia leikilai ha? Ara lahoa aukilai ha?”

³¹ Ere Iosepa ve pura kaivi nanikosi haroapo ha, areve la pura nanikosi ve apu loroape;

³² ere mai heahapiki ila la pura, ereve oa ve leia avai mariape: “Ela va ma eharu koarape, eavaki, ave akore ve pura ka, a ka?”

³³ Are arero ore leipe kai maeape: “Arave akore ve pura ma; animala merava arero hape la; Iosepa ve maea au la hurirape la.”

³⁴ La hoa Iakobo elare pura haipararapai elare hopa pura hi hearai, hare oaria areve akore v'ila ikihuru eapapo leipe.

³⁵ Areve akoremari i marita ila arero hakakaeakive ikivere leipe, aka are ereve oharo au iapaila; are maeape: “Ara va ikihuru lei lei arava api kai akore ve leia hoaukilai.” Lahovea areve oa are v'ila hi eapapo ape.

³⁶ Kahara, Midiana haela Iosepa Aigupito leia ilaea leipe; ilaea leipe haela va Potipara, Parao ve hevehe haela ve kapena.