Genese 34 - Pupu Oharo Āre 1963 Genese 1970 Rute 1972

Dina ve korea ve la kavale

¹ Lea Iakobo ve epape la mari Dina, la ita ve marita ovohae eavakive hoaupe.

² Hivi haela Hamora ve akore Sekema, la ita ve amua haela, arero eavape la hoa, are arero mai paeape; are are i hareho uavi arero lei makiri leipe.

³ Are va Iakobo ve la mari Dina ikiheroe eapapo leipe; kai are arero ikivere leiki oharo veveke maeape.

⁴ Laelave Sekema, areve oa Hamora maria maeape: “Ara v'ikivere ma mari arave uva ve laeakive.”

⁵ Iakobo ore leipe, are va areve mari Dina lei haiae leipe, aka areve akoremari va mamoe i nanikosi ila kaipure leia kiva leivahaeape, laelave Iakobo oharo au maeaila aiai ere kihoreavape.

⁶ Sekema ve oa Hamora iki Iakobo ve leia are i oharo hukavakive.

⁷ Iakobo ve akoremari la oharo iapape la hoa ere kaipure ve kihoreavape, la haela ikiheaha leivahaeai hihiri eapapo leivahaeape, ehovea are Iakobo ve mari korea leipe la maea ve, are Iseraela kara lei haiae leipe, ehovea la eharu va pupu eapapo.

⁸ Aka Hamora erero oharo maria maeaeape: “Arave akore, Sekema, ave la mari ikivere havahu leive, ara aro here leive, eve la mari arero uva ve avarakive hela.

⁹ Ela i hareho uva i vila ila leiki mai leikive; eve marita elaro aikiaraki, elave marita ero aiarakilai.

¹⁰ E va ela i hareho apeakive; ita eapapo e herehere avakilai, e va ma ita apeapea kakavae horova leikive, kai eharu oaria korukaiavahaeakive.”

¹¹ Sekema kara areve oa i huhohoaha ila maeaeape: “E va arave ukai iki veveke hela leivahaeaki. E araro maeaki eharu ara aiarakilai.

¹² E va eharu maeakoko va eva i meru ila aiaraki la maeakilava, ara lahovea aiarakilai: ikiheroe, hela, la mari hela araro uva hovea leikive avikiaraki.”

¹³ Iakobo ve akoremari Sekema i areve oa Hamora ila hehepo ila kavale oharo maeaeape, ehovea are ereve mariheari Dina lei haiae leipe.

¹⁴ Ere maeape: “Ela v'ila hovea ka, elave mariheari peritome aue haela avarakive, ehovea laria elaro lei makiri leivahaeaki ave.

¹⁵ Eharu haroapo okoare hovea, a leikilai, heroe; e oaria ve maea elave maea hovea hovea leivahaeakive, e haela oaria peritome maea leivahaeakive.

¹⁶ La hoa elave marita ero aiarakilai, ela kara eve marita karakilai; la hoa ela e i hareho apeapea vilaipi haroapo leikilai.

¹⁷ Aka e elave oharo iapaki aue la leikilava, kai peritome mai haure la leikilava, ela va elave mari hareavi auvahaeakilai.”

¹⁸ Hamora i areve akore Sekema ila ereve oharo ikivere leivahaeape.

¹⁹ Harokou haiapo ka la maea leipe, ehovea are Iakobo ve mari ikivere havahu leipe. Kahara, are va areve lalava haela oaria ve akea haela.

²⁰ Laelave Hamora i areve akore Sekema ila ereve karikara ve okiape kihoahuka karikara haela maeaeape:

²¹ “Ma haela ela i kake la leivahaeaila: ere va elave ita apea kakavae horova leivahaeakive; iapai, ita va eapapo, ereve kara hovea; elaviila ereve marita karakilai, elaviilave marita kara elaviila erero aiarakilai.

²² Aka okoare haroapo elaviilave ukai ve, elaviila ve haela oaria ve maea peritome mai la leivahaeakilava, ereve la peritome mai hovea, ere va elaviila i hareho apeakilai, kai vilaipi haroapo hovea leikilai.

²³ Ereve mamoe hiru, ereve eharu oaria, ereve boromakau oaria, elaviilave leivahaea va ka ha? Veveke, elaviila ereve ikivere oharo avakive, la hoa, ere ela i hareho apeakilai.”

²⁴ Karikara ve okiape hoahukape la haela oaria Hamora i areve akore Sekema ila ve oharo iapape; karikara ve okiape hoahukape la haela oaria peritome maea leivahaeape.

²⁵ Hare 3 karia leipe la hoa ere maea kakare leivahaeape la hoa, Iakobo ve akoremari orahokaila, Dina ve huhohoaha, Simeona i Levi ila, poke kaili la karikara muruhari hoahukape; ere la vilahoaha oaria huru le haeape.

²⁶ Erealila Hamora i areve akore Sekema ila poke ila haeape, kai erealila Dina Sekema ve uvi ve hareavape.

²⁷ Iakobo ve akoremari iki leia au apihaeape haela oaria ovohae eavavahaeape la hoa ere la karikara haela ve eharu oaria naoae le aeape, ehovea ereve mariheari lei haiae leipe la mai.

²⁸ Ereve mamoe i nanikosi ila, ereve asini, karikara i oru ila ureve la eharu oaria;

²⁹ ereve erohoho eharu, ereve akoremari titaeka, ereve uavila, ereve uvi ureve la eharu oaria, la eharu oaria ere lori le aeape.

³⁰ La hoa Iakobo Simeona i Levi ila mari maeaeape: “Ealila araro heraho eapapo leipe, ehovea ealila ma ita haela ve oropa ve, Kanana haela i Perisi haela oropa ve, ealila arave rare heaha le leipe; elaviila haela oaria ka; ere hoa haroapo korukaiavahaeai araro hahari la leivahaeakilava, ere araro hai ka leikilai, ara i arave uvi haela oaria.”

³¹ Aka erealila maeape: “Are elave mariheari harari mari hovea leve leikive ha?”