Genese 33 - Pupu Oharo Āre 1963 Genese 1970 Rute 1972

Iakobo i Esau ila havila leipe

¹ Iakobo ovohae iupepe, kai are Esau i haela 400 ila ekevahaelula ovohae eavape. Laelave, are akoremari Lea i Rahela i horova marita ila ve aru ve hamureape.

² Are horova marita i ereve akoremari ila oropaki paparaehape, aire Lea i areve akoremari ila, Rahela i Iosepa ila aireaki havahu.

³ Are havahu ereve oropa ve aupe; are hoa 7 ila mea ve ekaopape aiai are akoreapo maeamaea pavape.

⁴ Aka Esau harava vivila arero koarai meae hahape; are areve karave heropi arero ape popoa hi eapapo ape.

⁵ Esau ovohae iupe uavila i akoremari ila ovohae eavape la hoa are mariape: “A i hareho ila ma haela va leita ha?” Iakobo maeape: “Aualari ave horova haela ikiheroe lei ma akoremari aikiarape.”

⁶ La hoa horova marita iki areve oropa ve ekaopape;

⁷ Lea i areve akoremari ila kara iki areve oropa ve ekaopape, aireaki Iosepa i Rahela ila iki areve oropa ve ekaopape.

⁸ Esau maeape: “Ara oropa lakoaraila la eharu oaria ve iele le ha?” Iakobo maeape: “Ehovea arave amua ara i ikiveveke leikive.”

⁹ Aka Esau maeape: “Akoreheari e, arave eharu oaria hovea hovea apearo, ave la eharu a havahu aeakive, heroe.”

¹⁰ Iakobo maeape: “Ka, ara aro here leive, a va araro ikivere la leikilava, arave ma meru arave mai ve avaki; ehovea, o iele, ara ave oropape laeavila, hovea hovea Aualari ve oropape, ehovea a araro ikiheroe lei auhohi maria laleila.

¹¹ Aro lapaparaehaeaila arave ma meru hela aeaki, ehovea Aualari araro lei veveke havahu leipe, kai arave eharu oaria.” Are arero ape karava maeape, laelave are le aeape.

¹² Kahara, Esau maeape: “Elaviila elare oki auvahaeakilai, ara kai ave oropa aukilai.”

¹³ Aka Iakobo maeape: “Iki amua haela e, a v'ore arave akoremari va maea mahuka, kai ehovea amae lalavahaelula la mamoe i nanikosi ila, ara va heraho leivila; ela erero hare kepea la kari laukilava, ere apihaeaki ave.

¹⁴ Arave haelapo e, ave horova haela ve oropa itaukive, ara va hahari hahari itaukilai, arave la mamoe i nanikosi ila ve loa hoa hovea, kai akoremari ve la loa hoa hovea, aiai ara Seira, arave haelapo ve la ita leia horeavakilai.”

¹⁵ Esau maeape: “Lehae, arave ma haela uku ara a v'ila haitapakilai ha?” Aka are maeape: “Arekaea, hovea ka. Ara arave haelapo ve oropa hiki lei veveke leikive, heroe.”

¹⁶ Laelave, la hare havahu, Esau elare oki Seira ve leia itaupe.

¹⁷ Kahara, Iakobo Sukota leia hahi itaupe, are elare uvi kai mamoe i nanikosi ila ve uvi kukueape; ehoveala la ita ve rare va Sukota rare itavape.

¹⁸ Iakobo Padana‐arama hakurepai Kanana ita karikara Sekema leia ovokake ila itaupe; are areve kovo ita karikara oropa ve avape.

¹⁹ Areve kovo leipe la ita ve kekele ve, are Sekema ve oa, Hamora, ve akoremari, moni hiru 100 ila ilaea leipe.

²⁰ Are leia arura haha ukape, kai rare El‐Elohe‐Iseraela rare itavape.