Genese 32 - Pupu Oharo Āre 1963 Genese 1970 Rute 1972

Iakobo Esau eavakive aupe

¹ Iakobo elare oki aupe, kai Aualari ve aneru arero koarape;

² Iakobo erero eavape la hoa are maeape: “Ma va Aualari ve hevehe haela!” Laelave are la ita rare Mahanaima rare itavape.

³ Iakobo meu haela uku Esau, Seira ve leia, Edoma la ita ve, oharo maeakive paparaehape,

⁴ are erero maria kileape: “E va haelapo Esau maria maeakive, ‘Ave horova haela Iakobo mariave, ara Labana ve leia ve aeaveape aiai ma hoa;

⁵ ara va boromakau, asini, mamoe ve hiru oaria ila, horova haela, i horova marita ila kara; ara kai ma oharo haelapo paraeaive, ehovea areve oropa ve lei veveke leikive’.”

⁶ Meu haela Iakobo ve leia helari ekepe, kai mari maeape: “Ela va ave apoheari Esau ve leia leikila; are i haela 400 ila aro koarakive ekevahaeairo.”

⁷ Iakobo la hoa oaoka lei iki heraho leipe; are i hareho la haela, kai mamoe, nanikosi i kamela ila hiru orahokaila hamureape,

⁸ are iki maria kekelape, “Esau iki hiru aea hai ka la leikilava, hiru aea hukaukilai hovea.”

⁹ Iakobo maeape: “Arave oa Aberahamo i oa Isako ila ve Aualari e, arave Iehova e, a araro maria kimaeape, ‘Ave ita i apavara ila ve leia helari aukive, ara aro lei veveke leikilai’.

¹⁰ A ave horova haela leipe la ikiheroe eapapo i mai ehoe ila ara va hovea ka, ehovea ara mai kaika ila hiki ma Ioridana mai ve overa kilaupe, kai, ara ka mahau hiru orahokaila la leila.

¹¹ Arave apoheari Esau ve mai ve araro hela hareavaki, ara arero oaoka leivila, are elaro oaria hareho haeaki ave, lou i akoremari ila hareho.

¹² Aka a araro maeape ‘Ara aro lei veveke leikilai; ara ave meavohula ahea ma ve la kekele ve numera hovea leivahaeakilai, la numera eapapo haela kaoaki hovea lei va ka’.”

¹³ Laelave, are la oroa leia avuku uavape, areve eharu uku are Esau ve meru leikive hareape.

¹⁴ Nanikosi abu 200 ila, nanikosi mea 20 ila, mamoe abu 200 ila, mamoe mea 20 ila,

¹⁵ amae ila kamela ereve mere ila 30 ila, boromakau abu 40 ila, boromakau mea 10 ila, asini abu 20 ila, kai asini mea 10 ila.

¹⁶ Are ma eharu areve horova haela ve mai ve aiarape, animala ve hiru lahua lahua ila; are kai areve horova haela maeaeape: “E va arave oropa ve auvahaeaki, kai hiru hiru arai ve lahua lahua kari aukive.”

¹⁷ Oropa auvahaeaki la haela are maria maeaeape: “Arave akoreapo Esau ero koaraki velavela maria la leikilava, ‘E va leita ve haela? E lahoa aukive ha? Ma animala leita ve ha?’

¹⁸ E kavale maeaki, ‘Ma va ave horova haela Iakobo ve eharu, are erero haelapo Esau ve meru hovea paraeaive, are kai elave aire kai ekeve’.”

¹⁹ Are kai aireaki auvahaeaki haela kara laria maeaeape: “E va Esau koaraki la hoa la oharo hovea hovea maeakive.

²⁰ E va aeka maria avahaeakilai, ‘Ave horova haela Iakobo elave aire le ekeve’.” Ehovea are maria kekelape “Ara va oropa paraeaki ma meru ve ara arero kurupaeakilai, kai ara areve oropape aireaki eavaki la hoa, are araro auhohi leikilai.”

²¹ Laelave, meru eharu oropa paparaehape, are havahu la oroa kovo ita hiki aeape.

Iakobo Peniela leia ve la hahari

²² La oroa havahu are urai areve uavila orahokaila, horova marita orahokaila, areve akoremari 11 ila, karai Iaboka la oki ve mai ukai paparaehape.

²³ Are erero mai ukai ve paparaehape, areve eharu oaria kara.

²⁴ Iakobo lahua aeape; kahara, haela ae are i hareho hahari ape aiai mea opaki hoa.

²⁵ La haela ovohae eavape are Iakobo au heaorapaila, la hoa are Iakobo ve mauki aru ureve koharape; kahara, Iakobo arero hahari leipe la hoa areve mauki la aru haiae le leipe.

²⁶ Are la hoa maeape: “Araro paraea, mea opaki maea maea.” Aka Iakobo maeape: “Ara aro paraea ka aiai a araro lei morapaeakive.”

²⁷ Are arero maeape: “Ave rare leita ha?” Are maeape: “Iakobo.”

²⁸ La hoa are arero maeape: “Ave rare aireaki Iakobo rare itava va ka, a va Iseraela rare itavakilai, ehovea a va Aualari i haela ila hahari lei heaorapape.”

²⁹ La hoa Iakobo maeape: “Ave rare hela araro kimaeaki.” Aka are arero maeape: “A va arave rare ve velavela ehovealeve ha?” Kahara, are la hoa arero lei morapaeape.

³⁰ Iakobo la ita rare Peniela rare itavape, kai mariape: “Ara Aualari ve oropape ovohae laeavila, aka arave ovokake au havoavakue.”

³¹ Hare pekaki la hoa are Peniela hakurepape; are maea hilau hilau aupe ehovea areve mauki la kakare.

³² Laelave la hoa ikiki mahau mauki aru ureve la elele Iseraela haela lalavahaea va ka, ehovea are Iakobo ve mauki aru ve la elele mai paeape.