Genese 28 - Pupu Oharo Āre 1963 Genese 1970 Rute 1972

¹ La hoa Isako Iakobo itavi lei morapaeape kai arero maeape: “A va Kanana ve uamari aea laea v'arekaea.

² Urou, Padana‐arama leia ave lou ve oa Betuela ve uvi aukive, leia ave lou ve akoreapo Labana ve mari aea laeakive.

³ Akea iele Aualari aro lei morapaeakive, aro akoremari oaria aiarakive, laria, a va vilaipi eapapo leikilai.

⁴ Are a i ave meavohula oaria Aberahamo ve la mekakure avarakilai; aireaki a va Aualari Aberahamo averape la kovo ita a iele le avakilai, a oropa hahi hiki leiki la ita!”

⁵ Kahara, Isako Iakobo le paraeape. Are Padana‐arama, Betuela Aramaea haela, Rebeka, Iakobo i Esau ila ve lou ve akoreapo, Labana ve leia itaupe.

Esau uva aea laeape

⁶ Esau eavape, Isako Iakobo lei morapaeai Padana‐arama uva leia haropakive paraeape; are kai ore leipe, are arero lei morapaeape la hoa are arero o aheke maeape maria: “A va Kanana uamari kalaealue”,

⁷ are eavape, Iakobo areve oa i lou ila ve oharo iapai Padana‐arama itaupe.

⁸ Esau ovohae eavape, areve oa Kanana haela ve uavila ikivere au leila, la hoa

⁹ Esau Isamaela leia uamari aea laeape, areve uavila orahokaila overa karape, are aire laeape Mahalata, Aberahamo ve akore Isamaela ve mari, Nebaiota ve mariloa.

Iakobo Betela leia ivahi eavape

¹⁰ Iakobo Beera‐sieba hakurepai Harana la okiharo itaupe.

¹¹ Are ita aea ekepe, kai oroa leia aeape, ehovea hare overa hoaupe. Are la ita ve have haroapo kaivi aihari ve aipepe, kai leia avuku uavape.

¹² Are ivahi eavape, papaita mea ve epavi, pekai areve haro kaia akea ve koperereape; iapai, are Aualari ve aneru pekahavaki kihoahukalula eavape.

¹³ Iapai, Iehova areve akea ve epavi mari maeape: “Ara va Iehova, ave vilali Aberahamo i ave oa Isako ila ve Aualari; a uavaki la ita ara a i ave meavohula ila avarakilai;

¹⁴ ave meavohula kekele mahuvu ve la maeakoko hovea leivahaeakilai; a va hurava ukai aea kauri ukai, paipai hoa kai diho hoa, kopurapakilai; a i ave meavohula ila ve oki ve meahaiapo vila ipipi oaria lei momorapukilai.

¹⁵ Iapai, ara a i hareho aeavila, ave aula kelari hoa ara aro kiva leikilai, kai aro ma ita ve aeka lai ekekilai; ehovea ara aro hakurepa va ka aiai ara aro maeaki eharu oaria o iele leivahaeakilai.”

¹⁶ La hoa Iakobo avuku ve urai maria maeape: “O iele, Iehova ma ita aeavila, aeva ara ore au leikue.”

¹⁷ Are oaoka lei mariape: “Ara va ma ita horahora eapapo leive! ma ka Aualari ve uvi havahu; ma va kaia akea ve okiape iele.”

¹⁸ Kahara, Iakobo vevelare havahu uroupe, are aihari leipe la have kaivi urapai areve akea ve tehoro loroape.

¹⁹ Are la ita Betela rare itavape; aka oropa hoa la ita ve rare va Lusa.

²⁰ La hoa Iakobo okoare mariape: “Aualari araro la koarakilava, kai arave okiharo oaria araro kiva la leikilava, kai araro au larive eapai i maea kohahaki pura ailakiarakilava,

²¹ ae va ara aireaki havila ila arave oa ve uvi ve aeka helari laukilava, Iehova arave Aualari leikilai.

²² Ara maia la urahukaila ma have va Aualari ve uvi iele leikilai, ae va a araro aikiaraki eharu oaria, ara hiru ten ila hamureai, hiru haroapo ara aro avarakilai.”