Genese 27 - Pupu Oharo Āre 1963 Genese 1970 Rute 1972

Rebeka i Iakobo ila ve hehepo

¹ Isako oalou lei ovohae le hoaeape, laelave are mekari au eavaila, la hoa are akore koare, Esau, itavi mari maeape: “Arave akore e!” Are kavale maeape: “Ara ma!”

² Are maeape: “Iapai, ara haela eapapo iele, ara ore ka arave apaki hoa maeamaea.

³ A hela ma hoa hahie eharu mai paeaki, ave apo i harita ila, huakara araeaki, e karave ara v'ila haropaki.

⁴ Ara v'ila eapai veveke karikiki, ara mea oaria ikivere lahovea, iki araro avikiaraki, ara larilai, kai aro lei morapaeakilai, aireaki ara apakilai, horahora ka.”

⁵ Kahara, Isako Esau oharo maeape la hoa, Rebeka iapape. Laelave Esau hahie ve araeape e karave haropakive, la hoa,

⁶ Rebeka areve akore Iakobo maria maeape: “Ara ave oa Esau lamaeaila oharo ara maria la iapaila,

⁷ ‘E karave mekakure aviki arave eapai veveke karikikive, ara larilai; ara aro oropa lei morapaeakilai, aireaki ara apakilai, horahora ka’.

⁸ Laelave, akore e, ara aro maeaki oharo auhohi iapaki,

⁹ A v'ai nanikosi hiru ve leia ve nanikosi mere mekaka orahokaila arave maia aikekive, ara ere v'ila ave oa ve eapai karave karikikilai, are v'ikivere la hovea.

¹⁰ a va arero oa ve leia avaukilai, are larive: are aro lei morapaeakilai, aireaki apakilai.”

¹¹ Aka Iakobo areve lou Rebeka maeape: “Iapai, arave akoreapo Esau va maea koro oaria ila, arave maea koro karia,

¹² ore ka, arave oa arave maea iilu mai la koharakilava, are arave hehepo ore le leikilai, kai araro lei morapaea va ka, aka o heaha hiki arilai.”

¹³ Areve lou arero maeape: “O heaha ve mehau arave ukai, heroe, arave akore e; arave oharo hiki iapaki, aula, nanikosi mere aikeila.”

¹⁴ Laelave, are ai erealilara lou ve leia aikepe; areve lou e karave eapai karikipe, areve la oa ve ikivere la hovea.

¹⁵ La hoa Rebeka akore koare Esau ve pura mekaka uku, areve uvi apeape pura uku la, akoreheari Iakobo ve maea la pura kohahape;

¹⁶ nanikosi mere ve iilu are are ve mai ve orape, kai areve avea ve la iilu hahilaka kara orape.

¹⁷ Are karikipe la e karave i pai ila are Iakobo ve mai ve avarape.

¹⁸ Kahara, are iki areve oa ve leia ai maeape: “Arave oa e!” Are maeape: “Ara ma, arave akore e, a leita ha?”

¹⁹ Iakobo areve oa maeape: “Ara ave akore koare, Esau. Ara leikila, ava araro kimaeape la oharo hovea; a haiavaki, arave ma e karave eapai larive, heroe, kai araro lei morapaeakive.”

²⁰ Aka Isako areve akore maeape: “Learia, a va la eharu elavelave lakoaraila?” Are kavale maeape: “Ehovea Iehova, ave Aualari, araro lakoaraila.” La hoa Isako Iakobo maeape:

²¹ “Maea maea ekela, ara aro mai koharakilai, akore e, ara v'ore leikilai, a va o iele arave akore Esau la, a ka.”

²² Laelave, Iakobo areve oa Isako maea maea le epavape, are arero mai kohari mariape: “Ape auhari va Iakobo ve ape auhari, aka mai va Esau ve mai.”

²³ Are arero ore au leila, ehovea areve mai ve la iilu va kolo oaria, akoreapo Esau ve la mai hovea; kahara, are arero lei morapaeape.

²⁴ Are maeape: “A va o iele arave akore Esau ha?” Are kavale maeape: “O iele!”

²⁵ La hoa are maeape: “Eapai avikela, ara arave akore ve e karave eapai larilai, kai aro lei morapaeakilai.” Kahara, are areve leia avaupe, are eapai lape; are wine ma kara avarape, are lape.

²⁶ La hoa areve oa Isako arero maeape: “Iki araro ape popoakive, akore e.”

²⁷ Kahara, are arero maea maea ai arero ape popoape, are areve la maea pura ve muo koape, kai arero lei morapaeape maria: “Ovohae eava, arave akore ve maea muo va Aualari lei morapaeape la kaipure ve muo hovea!

²⁸ Aualari kaia ve la heaoa avaraki, mea ve la kapare kara; koni i vine ma ila oaria kara.

²⁹ Haela oaria ave horova haela leivahaeakilai, vilaipipi oaria ave oropa ve ekaopakilai. A va apoheari oaria ve amua leikilai; ave lou ve akoremari oaria ave oropa ve ekaopakilai. Aro o heaha maeaki haela oaria lei heahaha leivahaeakilai. Aro o veveke maeaki haela oaria lei mekaka leivahaeakilai.”

Esau ve hi oharo

³⁰ Isako Iakobo lei morapaea karia leipe la hoa, Iakobo areve oa Isako ve ita hakorepape; haiapo ka, areve akoreapo, Esau, hahie ve la mea kihorerape.

³¹ Are kara e karave eapai kariki oa ve leia avaupe. Are areve oa maeape: “Arave oa e, urou, ave akore ve e karave eharu larive, kai araro lei morapaeaki.”

³² Areve oa Isako arero maeape: “A leita ha?” Are kavale maeape: “Ara ave akore koare, Esau.”

³³ La hoa Isako maea paiala paiala eapapo leipe kai mariape: “Oropa e karave haropi koarai arave maia avileikila la haela leita ha? Ara la eapai le lala, kai arero overa lei lamorapaeaila, o iele, are lei veveke leikilai.”

³⁴ Esau areve oa ve oharo iapape la hoa are hi eapapo havahu ape, are oa maeape: “Araro kara lei morapaeaki, arave oa e!”

³⁵ Aka are maeape: “Ave akoreheari hehepo ila leikila, ave la morapaeaki oharo are le avi.”

³⁶ Esau maeape: “Ere arero Iakobo rare itavape heroe ha? ehovea are hoa orahokaila araro hereavape. Are arave akore koare ve haruku avape; ma hoa are arave oa ve lei morapaeaki hoa lavila.” La hoa are maeape: “A va lei morapaeaki oharo kepea perehekai ara v'ila kiva au leila ha?”

³⁷ Isako Esau kavale maeape: “Iapai; ara arero ave amua laleila; areve apoheari oaria areve horova haela leivahaeakilai; koni i wine ila arero lei ovokake laleila. Ara a v'ila learia leikilai, arave akore e?”

³⁸ Esau areve oa maeape: “Lei morapaeaki oharo haroapo karia ha, arave oa e? Araro kara lei morapaeaki, arave oa e!” Esau hi eapapo iele ape.

³⁹ Isako la hoa arero kavale maeape: “Iapai, ave aeaki ita va e karave la ita ve, apehai ve, kaia akea ve la heaoa ve kara arai iele vea.

⁴⁰ A va poke ila lei ovokake leikilai, a va akoreheari ve horova haela leikilai; a va arero harepaki la hoa, a va ave karave la arote le haerapakilai.”

Isako Iakobo ita lahua paraeape

⁴¹ Esau Iakobo iki heaha leipe, ehovea areve oa ve lei morapaeaki oharo are le avape, kai Esau elare iki kekelape: “Arave oa ve ikihuru leiki hoa maea maea; ara va la hoa arave akoreheari Iakobo huru harilai.”

⁴² Aka, Esau ve la oharo are Rebeka maeape, laelave are akoreheari Iakobo itavi maria maeape: “Iapai, ave akoreapo aro harive ikivere, ehovea elare hakakaeakive.

⁴³ Arave akore e, arave oharo iapai; urou, arave akoreapo Labana, Harana ve leia vivilaki,

⁴⁴ areve leia perehekai aeakive, aiai ave akoreapo va hihiri perehekai karia leikilai;

⁴⁵ aiai areve iki heaha haerapai are ave haiae iki le hoapakilai. La hoa ara aro aeka ekekive oharo paraeakilai. Hare haroapo ureve arave akoremari orahokaila hareavaki ehovealeve?”

⁴⁶ Rebeka Isako maeape: “Ara arave ovokake haure leive, ehovea Hiti uavila. Iakobo mahovea Hiti uamari la laeakilava, ma ita ve uamari aea, arave ovokake veveke lahoa la koarakilai ha?”