Genese 25 - Pupu Oharo Āre 1963 Genese 1970 Rute 1972

Aberahamo i Ketura ila ve meavohula

¹ Aberahamo uamari aeva laeape, areve rare va Ketura.

² Are epape akoremari va Simerana, Iokesana, Medana, Midiana, Isabaka, i Sua ila.

³ Iokesana va Sieba i Dedana ila ve oa. Dedana ve akoremari va Asurima, Letusima i Leumima ila.

⁴ Midiana ve akoremari va Epa, Eperi, Hanoka, Abida, i Eleda ila. Ma oaria va Ketura ve akoremari.

⁵ Aberahamo eharu oaria Isako aiarape.

⁶ Aka areve aireaki karape la uavila ve akoremari, Aberahamo meru hiki aiarape, areve apaki hoa maea maea la hoa are la akoremari arai ve paparaehape, Isako maea maea ka, kauri ukaki ve la ita.

Aberahamo api kai karu ihape hari

⁷ Ma va Aberahamo ve ovokake ve hitolo oaria ma, hitolo 175.

⁸ Aberahamo oalou le leipe, kai hitolo oaria ila le apape; are kai haela eapapo, hitolo maeakoko; ere kai arero elare ita ve leia karu ihape.

⁹ Areve akoremari, Isako i Isamaela ila, have ura rare Makepela karu ihape, Eperona, Sohara, Hiti haela ve oru ureve, Mamere ve kauri ukai ve;

¹⁰ La kekele ve Aberahamo Hiti haela ilaea leipe. Ere Aberahamo areve uva Sara i hareho koru ihape.

¹¹ Kahara, Aberahamo oropa apape, aireaki Aualari areve akore Isako lei morapaeape. Isako Beera‐lahai‐roi aeaveape.

Isamaela ve meavohula

¹² Aberahamo ve akore, Isamaela, Hagara Aigupito uamari, Sara ve horova uamari, Aberahamo epape akore, Isamaela ve meavohula ma.

¹³ Isamaela ve akoremari ve rare ma: Akore koare epape aiai aireaki erape la akoremari: Nebaiota, Isamaela ve akore koare, aireaki Kedara, Adabela i Mibisama ila,

¹⁴ Misima, Duma i Masa ila,

¹⁵ Hadada, Tema, Ietura, Napisa i Kedema ila.

¹⁶ Ma va Isamaela ve akoremari, ereve rare rare ma, ereve karikara karikara ve, ereve apearoape hoa ve, eravo oropa haela 12 ila, ereve koru ipi ve hoa.

¹⁷ (Isamaela ve ovokake hitolo hovea ma, hitolo 137 ila; areve ove karia lei le apape, kai lalava haela ve la kapu ita koru ihape.)

¹⁸ Ereve apeape ita va Havila aiai Sura, Aigupito ve oropa ve, Asiria ve la ukai ve; are i areve haela ila apearoape laria.

Esau i Iakobo ila erape hari

¹⁹ Aberahamo ve akore, Isako ve meavohula ma; Aberahamo Isako ve oa,

²⁰ Isako Rebeka laeape hoa are va hitolo 40 ila; Rebeka va Betuela Padana‐arama ve Aramaea haela ve mari, Aramaea haela, Labana, ve mariheari.

²¹ Isako areve uva v'ila Iehova ve ivaiva leipe, ehovea are korovu; Iehova areve ivaiva iapape kai Rebeka ero i avi ape.

²² Akoremari areve eharau mihua mahua hahari hovea leipe; are mariape: “Laria la leikilava, ara ovokake leve leikive?” Kahara, are Iehova velavela leipe.

²³ Iehova arero kavale maeape: “Ave eharau ureve vilaipipi orahokaila apearo, a v'ila eraki vila‐ipi orahokaila, au kovaelakilai; haroapo aheke leikilai, haroapo mahuka leikilai. Akore koare akoreheari ve horova leikilai.”

²⁴ Kahara, akoremari erape la hoa maraehae areve eharau ureve apeape.

²⁵ Akore koare ve epape hoa areve maea ovoka ai maea koro ila, koro pura hovea, laelave ere arero rare itavape rare Esau.

²⁶ Aire akore epape hoa, areve mai Esau ve loa ikipi le paeape; laelave ere arero rare Iakobo rare itavape. Akoremari erape la hoa Isako va hitolo 60 ila.

Esau akore koare ve haruku ilaea leipe

²⁷ Akoremari aheaupe hoa, Esau hahie haela aheke iele leipe, huakara veavila haela, aka Iakobo va ita hiki aeaveape haela, are ita au hiki aeaveape.

²⁸ Isako Esau ikivere eapapo leipe, ehovea are hahie mea haeape eharu lape. Rebeka Iakobo ikivere leipe.

²⁹ Hare aea Iakobo papaa mekakure aepape, la hoa Esau huakara ve kihorerape, are eroa eapapo hape.

³⁰ Esau Iakobo maeape: “Ave la papaa perehekai hela araro hivi avikiara, ehovea ara eroa havahu hahave.” (Laelave areve rare Edoma rare itavape.)

³¹ Iakobo maeape: “Oropa ave la akore koare ve haruku araro avikiarakive.”

³² Esau maeape: “Ara apaki maeamaea, akore koare ve haruku arav'ila iele le ha?”

³³ Iakobo maeape: “Okoare havahu arive.” Kahara, are okoare ape, kai areve akore koare ve haruku Iakobo ilaea le leipe.

³⁴ La hoa Iakobo pai i papaa ila Esau avarape, are eapai i ma ila lape kai elare oki le aupe. Lahovea Esau areve akore koare ve la haruku haure leipe.