Genese 21 - Pupu Oharo Āre 1963 Genese 1970 Rute 1972

Isako ve epape hari

¹ Iehova Sara kai leia horerape, areve la oharo hovea, kai Iehova Sara leipe areve la okoare hovea hovea.

² Laelave Sara ero‐ila leipe, kai Aberahamo ve auapau hoa, akore hekai epape, Iehova arero maeape la hoa hovea hovea.

³ Sara epape la akore, Aberahamo are v'ila epape la akore hekai rare Isako rare itavape.

⁴ Iehova ve la pupu hovea, akore hekai hare 8 leipe hoa, Aberahamo areve he oropa ve iilu haerapape.

⁵ Areve akore Isako epape la hoa Aberahamo va hitolo 100 leipe.

⁶ Sara maeape: “Aualari arave area iele lei horerape; ma oharo iapavahaeaki haela oaria area leivahaeakilai.”

⁷ Are kai maeape: “Leita Aberahamo maeakilai ‘Akore hekai Sara ve amae apu larilai ha?’ Aka arave lauapau hoa ara areve akore hekai epape?”

Hagara i Isamaela ila haruapape hari

⁸ Akore hekai ahai lou ve amae hakurepape; Isako amae hakurepape la hare Aberahamo hurae eapapo leipe.

⁹ Aka, Sara Hagara, Aigupito uamari, Aberahamo v'ila epape la akore hekai i Isako ila erau leivila eavape.

¹⁰ Laelave, are Aberahamo maeape: “Ma au hahape uamari i akore ila haruapaki; ehovea ma au hahape uamari ve akore hekai arave akore Isako ila haruku herehere lei v'arekaea.”

¹¹ Aberahamo ikihairihairi eapapo leipe, ehovea areve akore v'ila.

¹² Aka Aualari Aberahamo maeape: “A va ikihairihairi kalailue ehovea ave la akore hekai i ave la au hahape uamari ila; Sara aro maeaki la oharo leiki, ehovea ave meavohula Isako ve la okiharo ve rare iele avakilai.

¹³ Ara kai au hahape uamari ve akore v'ila vilaipi eapapo leikilai, ehovea are kara ave epape akore.”

¹⁴ Laelave Aberahamo vevelare havahu iele uroupe, are pai i ma ve kavapu haroapo ila Hagara avarape, are areve horo akea ve aipepe, arero i akore hekai ila hoa haroapo ila haruapape. Are leia harepai Beera‐sieba la huakara naoae aula kelaripe.

¹⁵ Kavapu ve la ma karia leipe la hoa, are akore hekai kora ipi ve hakurepape.

¹⁶ Are perehekai apehai aupe, harita heaki hoa hovea, kai leia haiavape, ehovea are mariape: “Ara arave akore hekai ve apaki hoa eavaki ave.” Are leia haiavape la hoa, akore hekai āra hai itavi hi le ape.

¹⁷ Aualari akore hekai ve hi iapape; Aualari ve aneru Hagara kaia ve itavi arero maeape: “Hagara, a va le heraho ha? Oaoka kalailue! Aualari akore hekai ve hi la iapaila.

¹⁸ Urou, akore hekai kaivi mai aheke paeaki, ehovea ara are v'ila vilaipi eapapo leikilai.”

¹⁹ Kahara, Aualari areve ovohae hapape, are ma hoho eavape; are iki kavapu ve ma hivape, kai akore hekai au larive ma avarape.

²⁰ Kahara, Aualari la akore koarape, are kai ahai huakara aeaveape, are kai apo i harita ila ve horova ore havahu leipe.

²¹ Are Parana la huakara aeaveape; areve lou arero Aigupito ve mari areve uva ve laeakive avarape.

Aberahamo i Abimeleka ila ve Okoare

²² La hoa Abimeleka i areve hevehe haela ve kapena Pikola ila Aberahamo maeape: “A va leivila horova oaria Aualari aro hukapaivila;

²³ laelave, Aualari ve oropa ve a va araro okoare arive, a va araro kai arave akoremari kai arave meavohula amuraea va ka, aka, ehovea ara aro mai veveke hiki leipe, a va araro kai a aeaveape la ita haela kara lei ikiheheroe hiki leivahaeakilai.”

²⁴ Aberahamo kavale maeape: “Ara okoare arilai.”

²⁵ Abimeleka ve horova haela ma karu aea korea leiveape la hari Aberahamo Abimeleka maeape la hoa,

²⁶ Abimeleka kavale maeape: “Ma horova leivahaeape haela ara haveva, a va araro au kileaila, ara va ma oharo overa au iapaila, ara va mave lai iapaila.”

²⁷ Laelave, Aberahamo mamoe i boromakau ila karai Abimeleka aiarape, kai erealila okoare avahaeape.

²⁸ Aberahamo areve mamoe abu āre 7 kaili hiru lahua le leipe.

²⁹ Abimeleka Aberahamo maeape: “A va ma mamoe abu āre 7 hiru lahua laleila iele le ha?”

³⁰ Aberahamo maeape: “A va ma mamoe abu āre 7 ila arave mai ve aeakilai, ihova hovea, ehovea a va ovohae eavaki haela, ma ma karu ara havahu ihape.”

³¹ Ehoveala, ere la ita rare Beera‐sieba rare itavape, ehovea leia erealila okoare avahaeape.

³² Laelave erealila Beera‐sieba leia okoare avahaeape. La hoa Abimeleka i Pikola, areve hevehe haela ve kapena ila, urahukai Filistia haela ve la ita helari auvahaeape.

³³ Aberahamo hehe kora Beera‐sieba leia aporape, are kai leia Iehova ve rare itavape, mea oaria aeavila la Aualari.

³⁴ Kahara, Aberahamo hare perehekai oaria Filistia haela ve la ita aeaveape.