Genese 2 - Pupu Oharo Āre 1963 Genese 1970 Rute 1972

¹ Laria, kaia i meahaiapo ila karikivahaeape horova karia le leipe, eharu oaria hovea hovea.

² Hare 7 ila, Aualari horova karia le leipe. Are hare 7 ila are leivahaeape horova oaria v'ila iki le paraeape.

³ Aualari hare 7 ila lei morapaeape, kai lei hehe leipe, ehovea la hare are iki paraeape, kai horova aeva au leila.

⁴ Ma va kaia i meahaiapo ila ve karikivahaeape eharu ve hoa hoa oaria, Aualari meahaiapo i kaia ila karikivahaeape la hare.

⁵ La hoa kekele ureve kora mere karia, kai oru ve la hohe au aheaila, ehovea Aualari lai ihaukive au maeaila, kai kekele ihaki haela karia.

⁶ Aka mea oro meahaiapo ve pekape, kai kekele hoa haroapo lei huruhuru leipe.

⁷ La hoa Iehova Aualari haela kekele ve mahuvu karikipe, kai areve overa ura ureve ovokake ve mea hohoape; kahara, haela va ovokake iele le leipe.

Edena la Oru

⁸ Iehova Aualari Edena ureve, kauri ukai ve, oru hahape. Are karikipe la haela are leia aepape.

⁹ Maea mekaka i eapai mekaka ila la kora oaria Iehova Aualari kekele ve lei aheaupe; oru ve aru hihi ve are Ovokake ve la kora aporape, kai Veveke i Heaha ila lei ore leiki la kora kara.

¹⁰ Mai ma Edena ve leia horerape, ehovea oru ma veveke avarakive: are leia kovaela mai titaeka hari ila leipe.

¹¹ Oropa mai ve rare va Pisona, are Havila la ita hoa haroapo helarivila la ita va gold ila.

¹² Areve gold veveke hiki, bedeliuma i onika ila have kara le apearo.

¹³ Mai orahokaila ve rare va Gihona; la mai va Kusa ve ita hoa haroapo helarivila.

¹⁴ Mai ilehoila ve rare va Hidekela, are Asiria ve kauri ukai ve horerave, kai mai hari ila ve rare va Euperate.

¹⁵ Iehova Aualari haela kaivi Edena oru le paraeape, ehovea kekele ihakive, kai oru kiva leikive.

¹⁶ Iehova Aualari haela ape karava maeape: “A va oru ureve la kora hae oaria larive heroe.

¹⁷ Aka veveke i heaha ila lei ore leiki la kora ve hae a v'ila pupu leipe, a le v'arekaea. Ehovea a larikilai la hare a le apakilai”.

¹⁸ Iehova Aualari mariape: “Veveke ka, haela lahua aeakive; ara areve koarai aeaki kake haropakilai”.

¹⁹ Laelave, Iehova Aualari loa loalula eharu oaria i akea ve la ori oaria, karikivahaeape; are erero haela ve leia kari auvahaeape, ehovea are erero rare itavakive; haela ereve rare itavape la rare, la va ereve rare iele le leivahaeape.

²⁰ Haela boromakau oaria ve rare itavape, kai ori oaria kara, kai loa loalula eharu oaria kara; aka haela ve koarai aeaki kake karia.

²¹ Laelave, Iehova Aualari haela avuku huru le avarape; are avuku uavape la hoa Iehova Aualari areve kararapi haroapo hareavape kai areve la ita aivau le kokaukape.

²² Iehova Aualari haela ve hareavape la kararapi v'ila uamari karikipe; are arero haela ve leia lai aupe.

²³ La hoa haela maeape: “Ma va arave uki ve uki, kai arave aivau ve aivau; arero rare Uamari rare itavakilai, ehovea are haela ve maea ve hareavape”.

²⁴ Laelave haela areve oa i lou ila haitapai uva havahu i hareho aeakilai; erealila aivau haroapo leikilai.

²⁵ Vila i uva ila maheheare ila apearoape, kai maea makiri au leila.