Genese 18 - Pupu Oharo Āre 1963 Genese 1970 Rute 1972

Isako ve epaki hoa ve okoare

¹ Iehova Aberahamo oropa ve hihika leipe, Mamere ve ita heheapa leia, are areve kovo uvi ve okiape haiavape, hare ahea la hoa.

² Are ovohae iupei ovohae eavape, haela ilehoila areve oropa ve urahuka apearoape. Are erero eavape la hoa are okiape ure kihoaupe, ehovea erero koarakive.

³ Are maeape: “Arave Amua e, e va araro ikivere la leikilava, ave horova haela haure lei heaorapa va ka.

⁴ Ere va ma perehekai avikekilai, ehovea eve loa huhelakive, e va la kora ipi ve iki perehekai papararaehakive;

⁵ ara va pai perehekai kara avikekilai, e va elare maea oropa lei mekaka leivahaeaki, kai aireaki ev'elare oki auvahaeakilai, ehovea e va eve horova haela ve oki ve ekevahaeape.” Laelave ere maeape: “A laila la oharo hovea, a leikive heroe.”

⁶ Aberahamo elavelave kovo uvi ureve pekape kai Sara maeape: “Flour mekakure hiru ilehoila karikiki, kai pai kokororu ilehoila airoavakive.”

⁷ Aberahamo mahokaea ve leia vivilape, kai boromakau mere mahuka i veveke ila horova akore avarape; la akore arero elavelave karikipe.

⁸ La hoa are laa apu i amae apu ila kailape, kai au karikipe la boromakau mere kara, kai ereve oropa ve aipepe; kahara, ere eapai lalavahaeape la hoa are kora ihau ve ereve maeamaea epavape.

⁹ Ere arero maeape: “Ave uva Sara lahoa ha?” Are erero maeaeape: “Are va kovo uvi ureve.”

¹⁰ Are mariape: “O iele ara va hitolo are hoa eve maia kihelarikilai: aeka ave uva Sara akore hekai epakilai.” Sara kovo uvi ve okiape ureve pavape, kai ereve oharo iapape.

¹¹ Kahara, Aberahamo i Sara ila va haela hoaha, oa i lou maea le leivahaeape. Sara uavila āre la mai karia overa leipe.

¹² Laelave, Sara elare iki ureve area keape, kai mariape: “Ara va lauapau la hoa, kai arave vila kara auapau iele, ara ikiveveke leikilai ha?”

¹³ Iehova Aberahamo maeape: “Ehovealeve Sara area keape, kai mariape ‘Ara iele epakilai ha, arave uamari eapapo leiki hoa ha?’

¹⁴ Le eharu Aualari va hovea hovea ka ha? Hoa hovea hovea ara aeka kihoaukilai, hitolo āre hoa. Sara akore epakilai.”

¹⁵ Sara mariape: “Ara va area au leikue”; ehovea are oaoka leipe. Are maeape: “Ka! a va area la keaila.”

Aberahamo Sodoma v'ila apevelavela leipe

¹⁶ La hoa la haela leia hakurepai Sodoma ve ukaki ovohae eavape. Aberahamo ere i hareho aupe, ehovea erero paparaehakive.

¹⁷ Iehova maeape: “Arave ikivere leiki okiharo ara Aberahamo kilea va ka ha?

¹⁸ Ehovea Aberahamo ve vilaipi eapapo i aheke ila leikilai, kai are v'ila meahaiapo ve vila ipipi oaria lei mekaka leivahaeakilai?

¹⁹ Ka! Ipi ara arero ikivere lei hareavape, ehovea are areve akoremari i ereve uvi haela oaria ila mai iele i ehoe ila kileavahaeakilai: Iehova ve okiharo kiva leivahaeakive; laria Iehova Aberahamo okoare avahaeape la eharu o iele leivahaeakilai.”

²⁰ Kahara, Iehova maeape: “Ehovea haela oaria Sodoma i Gomora ila ve heaha oaria lei hi eapapo arura, erealila ve haiae eapapo iele.

²¹ Ara va hoaukilai ehovea ovohae eavakive, ara va iapape la haiae ve hi eapapo va iele la, aka iele ka; ara kai ore leikilai.”

²² Laelave la haela leia ki helari Sodoma ve ukai aupe. Aka Aberahamo aeka Iehova oropa ve epavape.

²³ Aberahamo maeamaea iki mariape: “A va o iele mai ehoe haela i mai haiae haela ila hoa haroapo haeakilai ha?

²⁴ Lehae, karikara ureve mai ehoe haela 50 lapeakilava, a va la ita hai ka leikilai, kai mai ehohoe haela 50 lei ovokake leivahaea va ka ha?

²⁵ A va lahovea eharu lei v'arekaea, mai ehoe haela i mai haiae haela ila hoa haroapo kahaealue, laria mai ehoe i mai haiae ila haela hovea hovea leivahaeakilai! Laria v'arekaea! Meahaiapo hareho heheavaki la Iehova mai ehoe lei va ka ha?”

²⁶ Iehova maeape: “Ara Sodoma ureve mai ehohoe haela 50 la koarakilava, ara la karikara lei ovokake leikilai.”

²⁷ Aberahamo maeape: “Ara kekele mahuvu i a hurae ila hovea hiki haela, ara Iehova hilahila leikive oaoka au leila.

²⁸ Mai ehohoe haela 50 ve 5 hiki karia la leikilava, a va karikara hai ka leikilai, ehovea 5 hiki karia ha?” Are kai kavale maeape: “Ara 45 la koarakilava, ara karikara hai ka lei va ka.”

²⁹ Are aeka maeape: “Lehae, 40 hiki lapeakilava ha?” Are kavale maeape: “Ehovea 40 hiki leia, ara karikara hai ka lei va ka.”

³⁰ Are aeka maeape: “Iehova e, araro hihiri kalailue, ehovea ara aeka hilahila leikilai; A va 30 hiki leia la koarakilava ha?” Are kavale maeape: “Ara 30 la koarakilava, ara arero hai ka lei va ka.”

³¹ Are maeape: “Iapai, ara Iehova aeka velavela leive, a va 20 hiki lakoarakilava ha?” Are kavale maeape: “Ehovea ara 20 hiki lakoarakilava, ara karikara hai ka lei va ka.”

³² Are aeka maeape: “Iehova e, araro hihiri kalailue, ara aeka hoa haroapo velavela leikilai, a va 10 hiki la koarakilava ha?” Are kavale maeape: “Ara 10 hiki la koarakilava, ara arero hai ka lei va ka.”

³³ Kahara. Iehova Aberahamo oharoharo ape la oharo karia lei, elare okiharo aupe. Aberahamo kara elare ita helari ekepe.