Genese 16 - Pupu Oharo Āre 1963 Genese 1970 Rute 1972

Hagara i Isamaela ila

¹ Sarai, Aberamo ve uva, are v'ila akoremari au eraila. Are va Aigupito horova mari ila; la mari ve rare va Hagara.

² Sarai Aberamo maeape: “Eavaila, Iehova arave ero leiki oki le hereavape; arave ma horova mari koarai — ore ka, ara areve oki ve akoremari aeakilai.” Aberamo Sarai ve oharo iapape.

³ Laelave, Aberamo Kanana ve ita hitolo 10 oropa aeaveape, la hoa, Sarai, Aberamo ve uva, Aigupito horova mari rare Hagara hareavape, kai arero Aberamo areve uva hovea avarape.

⁴ Are Hagara koarape, kai are ero ila leipe. Are ero ila lei ore leipe la hoa, are la uva koare oropa ve maea pelaea leipe.

⁵ Sarai Aberamo maeape: “Araro lei haiae leipe la haiae ve mehau a avakilai, ara arave horova mari aro avarape. Kahara, are ore leipe are va ero ila, la hoa are araro kai haure le leipe. Iehova elalila ve aru hihi ve heheavaki.”

⁶ Aka Aberamo Sarai maeape: “Eavaki, ave horova mari va ave mai ureve — a va ikivere leiki mai arero leiki.” La hoa Sarai arero mai aheke havahu leipe, laelave la mari oaoka lei hukaupe.

⁷ Iehova ve aneru arero huakara ve leia ma hoho ukai ve koarape; la va Sura ve okiharo ve la ma hoho ve.

⁸ Are maeape: “Hagara, Sarai ve horova mari, a va lahoa ve ekepe, kai lahoa aukilai ha?” Are maeape: “Ara va la uva koare, Sarai, ve oaoka lei vivilave.”

⁹ Iehova ve aneru arero maeape: “A va helari la uva koare ve leia kai aukive, kai areve oharo iapai leikive.”

¹⁰ Iehova ve aneru aeka arero maeape: “Ara va ave meavohula lei maeakoko leivahaeakilai, laelave haela ereve numera kaoaki va hovea lei va ka.”

¹¹ Iehova ve aneru arero maeape; “Iapai, a va ero ila, kai akore hekai epakilai. A va areve rare Isamaela rare itavakilai, ehovea Iehova ave heraho hoa aro iki kekelape.

¹² Are va asini merava hovea haela leikilai, are haela oaria ve iri haela leikilai, kai haela oaria areve iri haela leivahaeakilai; are areve apavara oaria ve oropa ve aeakilai.”

¹³ Laelave, are arero oharo maeape la Iehova ve rare are rare itavape: “A va ovohae eavaki Aualari”, ehovea are elare mariape: “Ara va o iele Aualari ovohae eavape ha? kai ovokake leipe ha?”

¹⁴ Laelave ere la ma hoho rare itavape rare va Beera‐lahai‐roi, are va Kadesa i Bereda ila va aru hihi ve.

¹⁵ Hagara Aberamo ve akore epape; Hagara are v'ila epape la akore Aberamo rare itavape rare Isamaela.

¹⁶ Hagara Aberamo v'ila, Isamaela epape la hoa, Aberamo va hitolo 86.