Genese 15 - Pupu Oharo Āre 1963 Genese 1970 Rute 1972

Aualari i Aberamo ila Okoare leipe

¹ Ma eharu karia leipe la hoa, Iehova ve oharo ivahi hoa Aberamo maeape maria: “Aberamo e, oaoka kalailue; ara ave laua hovea. A va aireaki kavale veveke avakilai.”

² Aka Aberamo maeape: “Iehova Aualari, a va araro le eharu aikiarakilai, ehovea ara va akoremari karia, kai arave haruku avaki haela va Eliesera, Damaseka haela, arave uvi kiva haela.”

³ Aberamo aeka maeape: “Eavaki, a va arave mere aea au avikiaraila; arave uvi ureve epape horova akore hiki haruku avakilai.”

⁴ Iapai, Iehova ve oharo areve leia kihoaupe maria: “Ma haela haruku avaki haela lei va ka; a havahu ve akore ave haruku avakilai.”

⁵ Are arero mea lai hoaupe kai mariape: “Ovohae kaia iupeki, kou ve numera kaoakive, a va erero kaoakive hovea ha?” La hoa are arero maeape: “Ave meavohula lahovea leivahaeakilai.”

⁶ Are Iehova ve oharo iapai kekelape; are kai arero lei ehoe lei kekelape.

⁷ Are arero maeape: “Ara va Iehova. Ara aro Kaladea haela ve Ura karikara lai kihoaupe, ehovea aro ma ita avarakive, ehovea o iele avakive.”

⁸ Aka are maeape: “Iehova Aualari e, ara learia ore leikilai, ara va iele avakilai ha?”

⁹ Are arero maeape: “Boromakau abu āre hitolo 3 hovea, nanikosi abu, hitolo 3 hovea, hivi haroapo kai huva āre ara v'ila aikiaraki.”

¹⁰ Are ma eharu oaria aikepe, erero ukai ukai kovavaelape, kai ukai hiru ukai hiru aea koperereape, aka ori are au kovavaelaila.

¹¹ Ori merava iki la aivau korea larive, la hoa Aberamo erero haruapape.

¹² Hare hoaupe la hoa Aberamo avuku havahu uavape, kai oaoka eapapo leipe; kai mea muru arero aerape.

¹³ Iehova Aberamo maeape: “A ore iele havahu leiki, ave meavohula ita lahua apeakilai, kai haela ae ve ita haiapo apeakilai, kai ereve horova haela leivahaeakilai, kai hitolo 400 hovea leia heraho leivahaeakilai.

¹⁴ Aka, ere horova leivahaeaki la ita haela ara heheavakilai; ere va aireaki eharu oaria ila la ita ve kihoahukakilai.

¹⁵ A havahu maria leikilai, a va havila ila ave houva hoa haela ve leia hoaukilai; a va haela eapapo lei karu ihaki hoa avakilai.

¹⁶ Ere va aireaki vilakao 4 hovea kihoahukakilai, ehovea Amori haela ve haiae karia havahu au leila.”

¹⁷ Hare overa hoaupe la hoa, mea muru leipe hoa, iapai, la hakakaea ve aru hihi ve, kemo ahea i mahuvu ila, kai a hari eapapo ila, kihoaupe.

¹⁸ La hare Iehova Aberamo ila okoare mariape: “Ara ma ita ave meavohula aiarakilai, Aigupito ve la mai aiai mai eapapo rare Euperate,

¹⁹ Keni haela, Kenisi haela, Kademoni haela ila ve ita,

²⁰ Hiti haela, Perisi haela, Repaimi haela ila ve ita ila,

²¹ Amori haela, Kanana haela, Giragasa haela, Iebusi haela ila ve ita ila.”