Genese 14 - Pupu Oharo Āre 1963 Genese 1970 Rute 1972

Aberamo Lota lei makuripe

¹ Amarapela, Sinara ve king, Arioka, Elasara ve king, Kedoralaoma, Elama ve king, Tidala, Goima ve king ila ve hoa,

² Ma king oaria va Bera, Sodoma ve king, Birisa, Gomora ve king, Sinaba, Adama ve king, kai Semeba, Seboiima ve king, kai Bela ve king (la va Soara) mare avahaeape.

³ Ma haela oaria Sidima hahapa leia hoa haroapo korukaiavahaeape, (la va Ahea Ma Kaikara).

⁴ Ere va hitolo 12 Kedoralaoma koaravahaeape, aka 13 hitolo ere arero haure leipe.

⁵ 14 hitolo Kedoralaoma i are i hareho loape la king oaria iki Aseterota?-?karenaima ve Repaimi haela kai Hamu ve Susi haela, kai Save?-?kiriataima ve Emi haela,

⁶ kai Seira kela ve la Hori haela aiai hoa El‐parana, huakara ve hoa haruapape.

⁷ Kahara, ere leia ve helaripe, kei Ene‐misapata (la va Kadesa) ekevahaeape; ere Ameleka haela ve ita eapapo kai Hasasona‐tamara apearoape la Amori haela oaria hahari lei heaorapape.

⁸ Kahara, Sodoma ve king i Gomora ve king i Adama ve king i Seboiima ve king i Bela ve king (la va Soara) horeavape; ere va Sidima hahapa leia mare avahaeape.

⁹ Ere va Kedoralaoma, Elama ve king, kai Tidala, Goima ve king, kai Amarapela, Sinara ve king, kai Arioka, Elasara ve king, mare avahaeape, ukai king 4, ukai king 5.

¹⁰ Sidima hahapa va pikuru pakara koru oaria iele; Sodoma i Gomora ila ve king vivilavahaeape la hoa uku haela la pikuru pakara koru ureve hohoape, uku kela ve leia vivilavahaeape.

¹¹ Ereve iri haela Sodoma i Gomora ila ve eharu oaria kailape, ere ereve eapai eharu ila kara kailape, kai elare oki auvahaeape;

¹² ere va Lota kara, Aberamo ve arivu, laeape, ehovea are Sodoma aeaveape, kai areve eharu oaria kara ere kaili aiaupe.

¹³ Kahara, ovokake lei hukaupe haela aea iki Heberu haela Aberamo la oharo kileape; Aberamo va Mamere ve havuhu kora maeamaea ve leia, Amori haela Esekela i Anera ila ve apoheari ve ita heheapa aeaveape.

¹⁴ Aberamo Lota laeape la oharo iapape la hoa, are areve hevehe haela, elare uvi erape haela la, hareho haela 318, kari auvahaeape, kai iri haela haruapape, hoa Dana leia.

¹⁵ Oroa hoa are elare haela hamureape, are i areve horova haela; are erero heaorapai haruapape aiai Hoba, Damaseka ve paipai hoa.

¹⁶ Are eharu oaria aeka avape, kai areve arivu Lota i eharu oaria ila kailape, areve uavila i haela oaria ila kara.

Melekisadeka Aberamo lei morapaeape

¹⁷ Aberamo Kedoralaoma i king oaria ila oropa heaorapape, aireaki Sodoma ve king arero Save hahapa (la va King ve Hahapa) koarape.

¹⁸ Kahara, Melekisadeka Salema ve king iki pai i wine ila aikihoahukape; are va Akea Iele Aualari ve arura haela.

¹⁹ Are arero lei morapaeape kai mariape: “Akea Iele kaia i meahaiapo ila karikipe la Aualari Aberamo lei veveke leiki;

²⁰ Akea Iele Aualari lei morapaeaki, ehovea are ave iri haela ave mai ve aiarape,” Kahara, Aberamo eharu oaria hamureape, hiru 10 ila, kai hiru haroapo arero avarape.

²¹ Sodoma ve king Aberamo maeape: “Haela hiki araro hela aikiaraki, a havahu eharu oaria aeakive,”

²² Aka, Aberamo Sodoma ve king maeape: “Ara va Akea Iele Aualari, kaia i meahaiapo ila karikipe la Aualari, okoare ape;

²³ Ela haroapo kai loa iilu ve ela haroapo, kai eharu aea ara aea va ka, a va maria ari ave ‘Ara Aberamo lei erohoho leipe.’

²⁴ Ara va eharu aea va ka, harokou haela lalavahaeape la eapai hiki, kai ara i hareho auvahaeape la haela ve eharu hiki; Anera, Esekola, i Mamere ila, ereve hiru hiki aeakive, heroe.”